Filipibi 2 - BAIBLO ALOO NGMAMI KLƆUKLƆU Ɔ

Kristo he si bami kɛ e we agboje

¹ Nɛ nyɛ ngɔ nyɛ he ngɔ ha Kristo ɔ, e woɔ nyɛ he wami, nɛ e suɔmi ɔ haa nyɛ bua jɔmi. Nyɛɛ kɛ mumi ɔ ngɛ bɔe, nɛ lɔ ɔ he ɔ, nyɛ nuɔ nɔ́ he ha nyɛ sibi, nɛ nyɛ naa mɛ mɔbɔ.

² Enɛ ɔ he je ɔ, nyɛ tsuo nyɛɛ pee nyɛ yi mi kake; nyɛɛ suɔ nyɛ sibi, nɛ nyɛ we oti, kɛ juɛmi hu nɛ pee kake. Kɛkɛ ɔ, imi hu ma na bua jɔmi babauu.

³ Nyɛ ko pee nɔ́ ko nɛ tsɔɔ kaa nyɛ ti nɔ ko ngɛ lɛ nɔ kake pɛ e nɔ́ mi foe, loo e ngɛ hlae nɛ e fĩa yaka. Be tsuaa be ɔ, nyɛɛ pee nyɛ he humi, nɛ nyɛɛ bu nyɛ sibi pe nyɛ nitsɛmɛ nyɛ he.

⁴ Nɔ tsuaa nɔ nɛ fo e nyɛmi nɔ́ mi; e ko fo lɛ nitsɛ pɛ e nɔ́ mi.

⁵ Kristo Yesu juɛmi ɔ nɛ pee nyɛ hu nyɛ juɛmi.

⁶ E hɛɛ Mawu su lɛɛ, se e pee we lɛ kaa doo ɔ, a na lɛ kaa e kɛ Mawu sɔ.

⁷ Mohu ɔ, lɛ nitsɛ e suɔmi nya a, e ngmɛɛ blɔ nya tsuo nɛ e ngɛ ɔ he, nɛ e ba plɛ e he sɔmɔlɔ. E ba pee kaa nɔmlɔ, nɛ e je e he si kaa adesa.

⁸ E ba e he si, nɛ e bu tue hluu kɛ ya su gbeje tete; e gbo sɛumi tso nɔ gbenɔ.

⁹ Enɛ ɔ he je nɛ Mawu wo e nɔ gojoo, nɛ e ha lɛ biɛ nɛ kle pe biɛhi tsuo.

¹⁰ Kɛkɛ ɔ, he tsuaa he nɛ a maa wo e biɛ ta ngɛ ɔ, nihi nɛ ngɛ hiɔwe, kɛ ni nɛmɛ nɛ ngɛ zugba a nɔ, kɛ ni nɛmɛ nɛ ngɛ zugba a sisi ɔ, mɛ tsuo a ma kpla si ha Yesu,

¹¹ nɛ a maa jaje paa ke, Yesu Kristo ji Nyɔmtsɛ; a maa pee ja kɛ wo Tsɛ Mawu ɔ hɛ mi nyami.

Nyɛɛ pee kaa la nɛ ngɛ kpɛe ngɛ je ɔ mi

¹² Ye nyɛmimɛ nɛ i suɔ! E he hia wawɛɛ kaa amlɔ nɛ ɔ tete nɛ i be nyɛ ngɔ ɔ, nyɛɛ bu mi tue wawɛɛ pe kekle ɔ po. Nyɛɛ kɛ gbeye yemi, kɛ he domi blibliibli nɛ tsu ní wawɛɛ, konɛ a he nyɛ yi wami.

¹³ Ejakaa be tsuaa be ɔ, Mawu ngɛ nyɛ he ní tsue, konɛ nyɛ na bua jɔmi nɛ nyɛ kɛ pee e suɔmi nya ní.

¹⁴ Nɔ́ tsuaa nɔ́ nɛ nyɛ ngɛ pee ɔ, nyɛ ko wo nyɛ mi mi la, nɛ nyɛ ko sã nya ngɛ he.

¹⁵ Ke nyɛ pee ja a, nyɛ he ma tsɔ, nɛ piami ko piami ko be nyɛ he hie; nyɛ maa pee Mawu bimɛ nitsɛnitsɛmɛ ngɛ yayami peeli, kɛ nihi nɛ a tue wa a a kpɛti. Ejakaa nyɛ je mi bami he tsɔ kaa bɔ nɛ dodoe kpɛɔ.

¹⁶ Ke nyɛ hɛɛ sane kpakpa a nɛ haa nɔ wami ɔ mi wawɛɛ ɔ, lɔ ɔ lɛɛ ligbi ɔ nɛ Kristo maa ba a, ma nyɛ ma fĩa kaa fo nɛ i tu, aloo dengme nɛ i gbo kɛ tsu nyɛ he ní ɔ pee we yaka.

¹⁷ Ke e maa ba mi kaa a ma plɛ ye muɔ kɛ pue nyɛ he bɔ nɛ nyɛ ngɛ sãe kɛ ngɛ nyɛ hemi kɛ yemi he ní tsue ɔ nɔ po ɔ, ye bua maa jɔ, nɛ i kɛ nyɛ ma nya.

¹⁸ Jã nɔuu kɛ̃ nyɛ hu nyɛ bua nɛ jɔ, nɛ nyɛɛ kɛ mi nɛ nya.

Timoteo kɛ Epafrodito a blɔ hiami blɔ nya tomi

¹⁹ Ke Nyɔmtsɛ ɔ maa suɔ ɔ, e be kɛe kulaa nɛ ma tsɔ Timoteo kɛ ba nyɛ ngɔ. Kɛkɛ ɔ, ke i nu nyɛ he ɔ, ye nɔ gbagba maa te.

²⁰ Timoteo pɛ ji nɔ nɛ susuu nyɛ he, nɛ e hlaa kaa e hi ha nyɛ; i li nɔ kpa ko hu kaa lɛ.

²¹ Ni ɔmɛ kulaa a ti nɔ tsuaa nɔ ko ngɛ lɛ nɔ kake pɛ e nɔ mi foe. Yesu Kristo he sane ɔ pi a kɔmɔ.

²² Nyɛ nitsɛmɛ nyɛ le Timoteo mɔde bɔmi! Nyɛ le kaa e tsu ní nɛ se bé; e kɛ mi tsu sane kpakpa a he ní kaa bi kɛ e tsɛ.

²³ Lɔ ɔ he ɔ, ke i na ye níhi a nya pɛ ma tsɔ lɛ nyɛ ngɔ.

²⁴ Imi nitsɛ hu, ye hɛ ngɛ Nyɔmtsɛ ɔ nɔ kaa e be kɛe kulaa nɛ ma ba su nyɛ ngɔ.

²⁵ Wa nyɛmi Epafrodito nɛ nyɛ tsɔ lɛ ye ngɔ ɔ, e kɛ mi ba tsu ní saminya kaa ta bulɔ kpakpa. E sɔmɔ mi bɔ nɛ sa, nɛ amlɔ nɛ ɔ, ye juɛmi nya a, e hia kaa ma wo lɛ blɔ kɛ ba nyɛ ngɔ.

²⁶ E hɛ ngɛ jae wawɛɛ ngɛ nyɛ tsuo nyɛ he, nɛ akɛnɛ nyɛ nu kaa e be he wami ɔ, e ngɛ tsui yee.

²⁷ Niinɛ, e nu hiɔ wawɛɛ, nɛ e piɛ nguɛ nya nɛ e gbo. Se Mawu na lɛ mɔbɔ; pi lɛ kɛkɛ, se mohu imi hulɔ; e je mi kɛ je kɔmɔ yemi babauu mi.

²⁸ Enɛ ɔ he nɛ e be sɔe ha mi kulaa kaa ma wo lɛ blɔ kɛ ba nyɛ ngɔ ɔ nɛ. Ke nyɛ na lɛ ekohu ɔ, nyɛ ma na bua jɔmi; kɛkɛ imi hu ma kpa tsui yemi.

²⁹ Nyɛ he lɛ atuu kɛ bua jɔmi babauu kaa nyɛ nyɛmi nɛ le Nyɔmtsɛ ɔ. Nihi tsuo nɛ ngɛ kaa kikɛ nɛ ɔ, nyɛɛ bu mɛ.

³⁰ Ejakaa Kristo ní tsumi ɔ he ɔ, e piɛ nguɛ nya nɛ e sake e he lo ngɔ fɔ he. Se e pee enɛ ɔ tsuo kɛ sɔmɔ mi ngɛ nyɛ nane mi.