Filemon 1 - BAIBLO ALOO NGMAMI KLƆUKLƆU Ɔ

¹ Imi Paulo nɛ a wo mi tsu ngɛ Kristo Yesu he ɔ, kɛ wa nyɛmi Timoteo ngma womi nɛ ɔ kɛ ya ha Filemon, wa suɔlɔ, kɛ wa huɛ nɛ waa kɛ lɛ tsuɔ ní ɔ,

² kɛ asafo ɔ nɛ kpee ngɛ e we ɔ mi ɔ, kɛ wa nyɛmiyo Apia, kɛ wa huɛ ta bulɔ Arkipo.

³ Dloomi kɛ he jɔmi nɛ je wa Tsɛ Mawu ɔ, kɛ Nyɔmtsɛ Yesu Kristo dɛ mi ɔ ha nyɛ!

Filemon suɔmi kɛ e hemi kɛ yemi

⁴ Ye nyɛmi Filemon, be tsuaa be nɛ ma sɔle ɔ, i woɔ o ta, nɛ i naa Mawu si.

⁵ Ejakaa suɔmi nɛ o jeɔ kpo kɛ tsɔɔ Mawu bimɛ ɔmɛ tsuo, kɛ hemi kɛ yemi nɛ o ngɛ ngɛ Nyɔmtsɛ Yesu Kristo mi ɔ, i nu he.

⁶ Ye sɔlemi ji kaa hemi kɛ yemi ɔ nɛ waa kɛ mo wa hɛɛ mi ɔ ma ha waa nu ní kpakpahi tsuo nɛ wa naa ngɛ Kristo Yesu mi ɔ a sisi saminya.

⁷ Ye nyɛmi, o suɔmi ɔ wo mi he wami, nɛ e ha mi bua jɔmi babauu. O ha nɛ Mawu bimɛ ɔmɛ a tsui nɔ a mi.

Paulo kpa pɛɛ ha Filemon

⁸ Enɛ ɔ he je ɔ, jinɛ kaa o nyɛmi ngɛ Kristo mi ɔ, i ngɛ he blɔ nɛ ma nyɛ o nɔ, nɛ o pee nɔ nɛ sa.

⁹ Se akɛnɛ i suɔ mo he je ɔ, ma ngɔ hiami nɔ́ nɛ ɔ kɛ fɔ o hɛ mi mohu. Hyɛ, imi Paulo, Yesu Kristo tsɔlɔ kpanaa nɛ amlɔ nɛ ɔ hu a bɔ mi pã ngɛ lɛ nɔuu e he ɔ, imi nɛ i ngɛ mo nɔ́ nɛ ɔ bae ɔ nɛ.

¹⁰ I ngɛ mo pɛɛ kpae ngɛ Onesimo nɛ peeɔ ye bi ngɛ Kristo mi ɔ he. Tsu nɛ a wo mi ɔ ha i ba pee e tsɛ.

¹¹ Jinɛ sa a, e he be se nami kɛ ha mo, se jehanɛ lɛɛ e he ba se nami kɛ ha imi kɛ mo tsuo.

¹² I ha nɛ e kpale kɛ ma o ngɔ; pohu e he hia mi kaa imi nitsɛ ye hɛngmɛ.

¹³ I ko suɔ kaa e kɛ mi nɛ hi si, konɛ e sɔmɔ mi ngɛ o nane mi, be mi nɛ sane kpakpa a he ɔ, a wo mi tsu ɔ.

¹⁴ Se i sume kaa ma je o se kɛ pee nɔ́ ko, bɔ nɛ pee nɛ nɔ́ kpakpa nɛ o ko je o tsui mi faa pee ɔ, e ko ba pee kaa nɔ́ nɛ pe a nyɛ o nɔ.

¹⁵ Eko ɔ, o kɛ Onesimo nyɛ kpɛti gbɛ be bɔɔ kɛkɛ, bɔ nɛ pee nɛ jehanɛ lɛɛ e ba hi si ngɛ o ngɔ daa.

¹⁶ Jehanɛ ɔ, e pi nɔ ko nɛ a maa bu lɛ nyɔguɛ hu, se mohu nɔ nɛ pe nyɔguɛ. O nyɛmi saminya ji lɛ ngɛ Kristo mi nɛ imi po i fiɛ we e he, hluu nɛ mo nɛ he lo mi jio, Nyɔmtsɛ ɔ mi jio, o nɔ ji lɛ kulaa a.

¹⁷ Enɛ ɔ he ɔ, ke o buu mi o huɛ tutuutu nɛ o kɛ lɛ tsuɔ ní ɔ, he Onesimo atuu kaa bɔ nɛ o ma he mi.

¹⁸ Ke ji e ye mo sane yaya ko, aloo e hɛɛ mo hiɔ ko ɔ, buu jamɛ a akɔtaa tsuo ha mi.

¹⁹ Imi Paulo nitsɛ ye nine nya ji nɛ ɔ nɛ, ma wo mo hiɔ ɔ tsuo pɛpɛɛpɛ. E hia we nɛ ma wo nɔ ta ha mo kaa mo nitsɛ tete, Kristo nɛ o le amlɔ nɛ ɔ, o hɛɛ mi o yi nɔ hiɔ po.

²⁰ Lɔ ɔ he ɔ, ye nyɛmi, Nyɔmtsɛ ɔ he ɔ, i kpa mo pɛɛ, pee enɛ ɔ ha mi. Ha ma tsɛ ye tsui ngɔ wo ye tsui mi, ejakaa ye nyɛmi nɛ le Kristo ji mo.

²¹ I heɔ yeɔ kaa nɔ́ nɛ i kɛ ngɛ o hɛ mi fɔe ngɛ womi nɛ i ngma mo nɛ ɔ mi ɔ, o maa pee. I le hulɔ kaa o maa pee pe bɔ nɛ i bi nɛ ɔ tete po.

²² E piɛ nɔ́ kake; ma suɔ hu nɛ o dla nibwɔhi a to he ko kɛ ha mi. Ejakaa ye hɛ ngɛ nɔ kaa bɔ nɛ nyɛ kulaa nyɛ ngɛ kue fae ɔ, Mawu maa pee nɛ ma kpale kɛ ba nyɛ ngɔ ekohu.

Nyagbe sɛ yemi

²³ Epafra, nɛ lɛ hu Kristo Yesu he ɔ, a wo i kɛ lɛ tsu ɔ ke e biɔ mo.

²⁴ Marko, Aristarko, Dɛma, kɛ Luka, ye huɛmɛ nɛ i kɛ mɛ tsuɔ ní ɔ, mɛ hu a ke a biɔ mo.

²⁵ Wa Nyɔmtsɛ Yesu Kristo dloomi ɔ kɛ nyɛ nɛ hi si!