Ezra 7 - BAIBLO ALOO NGMAMI KLƆUKLƆU Ɔ

Ezra ba su Yerusalem

¹ Ní nɛ ɔmɛ a se benɛ Artaherhes ngɛ tsɛ yee ngɛ Persia zugba a nɔ ɔ, nyumu ko ba hi si. E biɛ ji Ezra. E tsɔɔ e weku kpa hluu kɛ ya pi osɔfo nɔkɔtɔma Aaron kikɛ nɛ ɔ: Ezra tsɛ ji Seraya, Seraya tsɛ ji Azaria, Azaria tsɛ ji Hilkia.

² Hilkia tsɛ ji Shalum, Shalum tsɛ ji Zadok, nɛ Zadok hu tsɛ ji Ahitub.

³ Ahitub tsɛ ji Amaria, Amaria tsɛ ji Azaria, nɛ lɛ hu e tsɛ ji Merayot.

⁴ Merayot tsɛ ji Zerahia, Zerahia tsɛ ji Uzi, nɛ Uzi tsɛ ji Buki.

⁵ Buki tsɛ ji Abishua, Abishua tsɛ ji Finehas, Finehas tsɛ ji Eleazar, nɛ Eleazar tsɛ ji Aaron.

^6-7 Ezra nɛ ɔ, womi ngmalɔ ji lɛ, nɛ mlaa a nɛ Yawɛ, Israel Mawu ɔ ngɔ ha Mose ɔ, e le lɛ tsuo fitsofitso. Akɛnɛ Yawɛ, Mawu ɔ nɛ Ezra jaa lɛ ɔ, gbaa Ezra he je ɔ, e nine su nɔ́ tsuaa nɔ́ nɛ e bi matsɛ ɔ nɔ. Matsɛ Artaherhes tsɛ yemi ɔ we jeha kpaagone ɔ mi ɔ, Ezra kɛ Israel bi komɛ hia blɔ kɛ je Babilonia kɛ ba Yerusalem. Nimli nɛ ɔmɛ ji osɔfohi, Levi bi, Mawu we ɔ lali, Mawu we ɔ buli, kɛ ní tsuli.

^8-9 A je Babilonia kekleekle nyɔhiɔ ɔ we kekle ligbi ɔ, nɛ Mawu dloomi nya a, a ba su Yerusalem nyɔhiɔ enuɔne ɔ we kekle ligbi ɔ.

¹⁰ Ezra ngɔ e wami tsuo ngɔ ha kaa e maa kase Yawɛ mlaa a nɛ e tsu he ní. E suɔ hu kaa e maa tsɔɔ Israel ma a Mawu mlaa a, kɛ blɔ nya tomi ɔmɛ tsuo.

Matsɛ Artaherhes ha Ezra womi ko

¹¹ Womi nɛ Matsɛ Artaherhes ngɔ ha Ezra nɛ ji osɔfo, kɛ womi ngmalɔ nɛ le Yawɛ mlaa amɛ, kɛ blɔ nya tomi ɔmɛ fitsofitso kɛ ha Israel ma a ní tsɔɔmi ɔ mi munyu ji nɛ ɔ nɛ:

¹² “Osɔfo Ezra, mo womi ngmalɔ nɛ o le Mawu nɛ ngɛ hiɔwe ɔ mlaa a saminya; imi Matsɛ Artaherhes nɛ i ngɛ mo womi nɛ ɔ ngmae. Mo he manye!

¹³ “Israel bi nɛ ngɛ ye nɔ yemi he ɔmɛ tsuo, a we osɔfohi, kɛ Levi bi nɛ a suɔ kaa a maa ya Yerusalem ɔ, i ngɛ fae ke a kɛ mo nɛ ya faa.

¹⁴ I kɛ ye ga woli kpaago ɔmɛ wa ngɛ mo tsɔe kɛ yaa Yerusalem kɛ Yuda nɛ o ya slaa lejɛ ɔmɛ, konɛ o Mawu ɔ mlaa nɛ ngɛ o dɛ ɔ, o hyɛ bɔ nɛ a ngɛ nɔ yee ha.

¹⁵ Sika tsu, kɛ sika hiɔ nike ní nɛ ɔmɛ ɔ, ngɔɔ kɛ ya. Nike ní nɛ ɔmɛ ɔ, i kɛ ye ga woli ɔmɛ wa je wa tsui mi faa wa ngɔ ke Israel Mawu ɔ nɛ e hi he ji Yerusalem ɔ.

¹⁶ Ngɔɔ ní nɛ ɔmɛ hu kɛ piɛ he: sika hiɔ, sika tsu tsuo nɛ o ma bua nya ngɛ Babilonia zugba a nɔ, kɛ nike níhi nɛ Israel ma a, kɛ osɔfo ɔmɛ wo si kaa a ma ha kɛ je a tsui mi faa a; nɛ o ngɔ lɛ tsuo kɛ ya Mawu we ɔ nɛ ngɛ Yerusalem ɔ.

¹⁷ “Hyɛ sika nɛ ɔ nɔ saminya, konɛ o kɛ he na kuhi, agbosuhi, jijɔhi, blɛfo, kɛ wai, nɛ o kɛ ya sã bɔ ngɛ bɔ sami la tɛ ɔ nɔ ngɛ nyɛ Mawu ɔ we ɔ ngɛ Yerusalem.

¹⁸ Sika tsu, kɛ sika hiɔ nɛ maa piɛ ngɛ ní nɛ ɔmɛ a hemi se ɔ, nɔ́ tsuaa nɔ́ nɛ sa o kɛ o nyɛmimɛ ɔmɛ nyɛ hɛ mi kaa nyɛɛ kɛ maa pee, nɛ maa sa Mawu hɛ mi ɔ, nyɛɛ pee.

¹⁹ Níhi tsuo nɛ a ngɔ ha mo nɛ a kɛ sɔmɔ ngɛ O Mawu we ɔ, ngɔɔ kɛ ya ha Mawu ngɛ Yerusalem.

²⁰ Enɛ ɔmɛ a se ke ní kpa komɛ a he maa hia nɛ a kɛ ma tsu ní ngɛ o Mawu ɔ we ɔ, yaa ngɔ sika ngɛ matsɛ ɔ nito he ɔ nɛ a kɛ pee.

²¹ “Imi Matsɛ Artaherhes, i ngɛ nyɛ matsɛ nito he ɔ nɔ hyɛli tsuo nɛ ngɛ Yufrate pa a se ɔ mlaa woe ke nɔ́ tsuaa nɔ́ nɛ osɔfo Ezra, Mawu nɛ ngɛ hiɔwe ɔ mlaa tsɔɔlɔ ɔ ma bi nyɛ ɔ, nyɛ ha lɛ esɔ.

²² Níhi nɛ e ma bi nyɛ ɔ, nyɛ ha lɛ kɛ yaa su kaa kikɛ nɛ ɔ: sika hiɔ kilo 3,400; ngma kilo 10,000; wai tɔ nyingmi enuɔ oliv nu tɔ nyingmi enuɔ kɛ ngo bɔ tsuaa bɔ.

²³ “Nɔ́ tsuaa nɔ́ nɛ Mawu nɛ ngɛ hiɔwe ɔ ma fa nyɛ ke nyɛ tsu ngɛ we ɔ he ɔ, nyɛɛ pee pɛpɛɛpɛ, bɔ nɛ pee nɛ e mi mi ko ba fu imi, loo nihi nɛ ma ba ye tsɛ ngɛ ye se ɔ.

²⁴ I ngɛ hae nɛ nyɛɛ le hu kaa mlaa ngmɛ́ blɔ kaa nyɛ heɔ tó ko kulaa ngɛ nimli nɛ ɔmɛ a dɛ: osɔfohi, Levi bi, Mawu we ɔ lali, agbo nya buli, sɔmɔli ngɛ Mawu we ɔ, loo tsɔli kpahi ngɛ Mawu we ɔ.

²⁵ “Mo Ezra, ngɔɔ nile nɛ Mawu ha mo ɔ kɛ tsu nɔ́ nɛ ɔ; moo hla ma a nɔ hyɛli, kɛ kojoli, nihi nɛ le o Mawu ɔ mlaa a, nɛ́ a hyɛ ye nɔ yemi he ɔ nɔ ngɛ pa a se. Ni nɛmɛ nɛ li mlaa a, tsɔɔ mɛ.

²⁶ Nɔ tsuaa nɔ nɛ ma tɔ̃ o Mawu ɔ mlaa a, aloo imi matsɛ, ye mlaa a, a gbla e tue nɔuu; a gbe lɛ, loo a je lɛ we, loo a kpɔ e níhi ngɛ e dɛ, aloo a wo lɛ tsu.”

Ezra je Mawu yi

²⁷ Ezra la kɛ je Mawu yi ke, “Á je Yawɛ, wa nɛmɛ a Mawu ɔ yi. Lɛ nɛ e kɛ susumi kpakpa wo matsɛ ɔ yi mi kaa e pee nɔ́ ko kaa kikɛ nɛ ɔ kɛ wo Mawu we ɔ nɛ ngɛ Yerusalem ɔ hɛ mi nyami.

²⁸ Mawu dloomi nya a, matsɛ ɔ, kɛ e ga woli ɔmɛ, kɛ e ma ní tsuli kpanaa amɛ tsuo ná ye he bua jɔmi. Yawɛ, ye Mawu ɔ wo mi kã, nɛ i bua Israel ma nimeli ɔmɛ a nya, konɛ i kɛ mɛ tsuo waa kpale kɛ ya Yerusalem.”