Ezra 6 - BAIBLO ALOO NGMAMI KLƆUKLƆU Ɔ

A ya na mlaa nɛ Matsɛ Sirus wo ɔ

¹ Kɛkɛ nɛ Matsɛ Darius fa, nɛ a ya kpa matsɛmɛ ɔmɛ a yi nɔ sanehi womihi nɛ ngɛ Babilon ɔ a mi fitsofitso.

² Se Ekbatana nɛ ji ma ngua nɛ ngɛ Media kpokpa a nɔ ɔ loko a ya na womi kpo ko ngɛ. Nɔ́ nɛ a ngma ngɛ mi ji, “Sane ko nɛ ba!

³ “Benɛ Matsɛ Sirus ngɛ tsɛ yee ɔ, kekleekle jeha a mi ɔ, e fa ke a ya ma Mawu we ɔ ngɛ Yerusalem ekohu, konɛ a sã bɔhi, kɛ sami bɔhi ngɛ lejɛ ɔ. Mawu we ɔ hiɔwe yami nɛ pee gugue nyɔngma kɛ enuɔ, nɛ e blimi hu nɛ pee gugue nyɔngma kɛ enuɔ.

⁴ Ke a ngɔ tɛ agboagbohi kɛ wo zã etɛ ɔ, kɛkɛ á ngɔ tso hu kɛ wo zã kake hu kɛ fɔ nɔ. Á ngɔ sika ngɛ matsɛ ɔ nito he ɔ kɛ wo ní tsumi ɔ tsuo he hiɔ.

⁵ Jehanɛ hu, sika tsu, kɛ sika hiɔ níhi nɛ Matsɛ Nebukadnezer ya muɔ ngɛ Mawu we ɔ ngɛ Yerusalem kɛ ba Babilon ɔ, á ngɔ ya to a blɔ hehi pɛpɛɛpɛ ngɛ Mawu we ɔ ngɛ Yerusalem.”

Darius fa ke a tsa ní tsumi ɔ nɔ

⁶ Kɛkɛ nɛ Matsɛ Darius tsɔ kɛ heto nɛ ɔ kɛ mane ke, “Mo amlaalo Tatenai, kɛ Sheta Bozenai, kɛ nyɛ nyɛmimɛ tsɔli nɛ nyɛ ngɛ Yufrate pa a se! “Nyɛ je nyɛ nine ngɛ ní tsumi ɔ he.

⁷ Nyɛ ko tsi Mawu we ɔ mami nya. Nyɛɛ ngmɛɛ Yuda amlaalo ɔ, kɛ Yuda ma nimeli ɔmɛ a he nɛ a ma Mawu we ɔ ngɛ he nɛ e hi sa a.

⁸ Jehanɛ, nɔ́ nɛ i ngɛ fae nɛ nyɛɛ pee ha Yuda ma nimeli ɔmɛ ngɛ ní tsumi ɔ he ji nɛ ɔ nɛ. Tó nɛ a ma na kɛ je Yufrate pa a se kɛ wo matsɛ nito he ɔ, hiɔ nɛ a maa bɔ ngɛ ní tsumi ɔ he ɔ, a jé tó ɔ mi eko kɛ ha Yuda ma nimeli ɔmɛ nɛ a kɛ wo hiɔ ɔ tsuo ngɛ be nɛ sa mi.

⁹ Níhi tsuo nɛ maa hia nɛ osɔfo ɔmɛ nɛ ngɛ Yerusalem ɔ ma bi kɛ maa sã sami bɔ ha hiɔwe Mawu ɔ, na kuyo, agbosu, jijɔ, ngma, ngo, dã, loo oliv nu ɔ, nyɛ ha mɛ daa ligbi nɛ nyɛ ko po mi.

¹⁰ Nyɛɛ pee jã, konɛ a nyɛ nɛ a sã bɔhi nɛ maa sa Mawu nɛ ngɛ hiɔwe ɔ hɛ mi, nɛ a kpa pɛɛ ha imi nitsɛ, kɛ ye bimɛ ɔmɛ nɛ wa yi nɛ na wami.

¹¹ I ngɛ fae hulɔ ke nɔ tsuaa nɔ nɛ ma tɔ̃ mlaa nɛ ɔ, a hia e tsu yi mi plai kake kɛ ma si nɛ a sɛu lɛ ngɛ nɔ; nɛ e we ɔ hu nɛ plɛ pee kuku.

¹² Matsɛ tsuaa matsɛ, loo ma tsuaa ma nɛ maa te si kɛ si mlaa nɛ ɔ, nɛ́ ma hla kaa a kpata Mawu we ɔ hɛ mi ɔ, Mawu ɔ nɛ hla Yerusalem ngɔ to kaa e hi he ɔ nɛ kpata a hɛ mi. Imi Darius nɛ i ngɛ mlaa nɛ ɔ woe. Á ye nɔ pɛpɛɛpɛ.”

A bli Mawu we ɔ nya

¹³ Tatenai, amlaalo nɛ ngɛ Yufrate pa a se ɔ, kɛ Sheta Bozenai, kɛ a nyɛmimɛ ɔmɛ pee bɔ nɛ Matsɛ Darius fa mɛ ke a pee ɔ pɛpɛɛpɛ.

¹⁴ Munyuhi nɛ gbalɔ Hagai kɛ Zakaria, Ido bi ɔ tu ɔ, wo Yuda ma nimeli ɔmɛ he wami nɛ a kɛ tsa ní tsumi ɔ nɔ kɛ ya si a gbe nya. A ma Mawu we ɔ gbe nya pɛpɛɛpɛ kaa bɔ nɛ Israel Mawu ɔ, kɛ Persia matsɛmɛ, Sirus, Darius, kɛ Artaherhes fa mɛ ke a pee ɔ.

¹⁵ Benɛ Matsɛ Darius ngɛ tsɛ yee ɔ, jeha ekpane ɔ we nyɔhiɔ enyɔne ɔ nɛ a tsɛɛ Adar a, jamɛ a be ɔ nɛ a gbe Mawu we ɔ mami nya.

¹⁶ Kɛkɛ nɛ Israel ma a tsuo, osɔfo ɔmɛ, Levi bi ɔmɛ, kɛ nihi tsuo nɛ kpale kɛ je ma se kɛ ba a, ye Mawu we ɔ nya blimi nyami ligbi ɔ kɛ bua jɔmi.

¹⁷ Benɛ a ngɛ Mawu we ɔ nya blie ɔ, Israel ma a ngɔ na ku lafa, agbosu lafa enyɔ, kɛ jijɔ lafa eywiɛ kɛ ba sã bɔ ha Mawu. A ngɔ akpakpo nyɔngma kɛ enyɔ hu kɛ ba sã yayami pami bɔ ngɛ Israel wɛtso nyɔngma kɛ enyɔ ɔmɛ a nya.

¹⁸ A to osɔfo ɔmɛ, kɛ Levi bi ɔmɛ ngɛ a we asafo kuu ɔmɛ a nya kɛ ha Mawu we ɔ sɔmɔmi ní tsumi ɔmɛ ngɛ Yerusalem, kaa bɔ nɛ a ngma ngɛ Mose mlaa womi ɔ mi ɔ.

Hetsɔmi nyami ligbi ɔ

¹⁹ Ma a tsuo nɛ kpale kɛ je ma se kɛ ba a, ye Hetsɔmi ɔ kekleekle nyɔhiɔ ɔ we ligbi nyɔngma kɛ eywiɛne ɔ.

²⁰ Jamɛ a be ɔ, osɔfo ɔmɛ, kɛ Levi bi ɔmɛ tsuo tsukɔ a he nɛ mɛ tsuo a he tsɔ. Lohwehi nɛ a kɛ maa pee kusumi kɛ ye Hetsɔmi ɔ, Levi bi ɔmɛ lɛ a gbe. A gbe lohwe nɛ ɔmɛ kɛ ha ma a tsuo nɛ kpale kɛ je ma se kɛ ba a, kɛ osɔfo ɔmɛ, kɛ mɛ nitsɛmɛ hulɔ.

²¹ Nihi nɛ ye ní nɛ ɔ ji Israel bi tsuo nɛ kpale kɛ je ma se kɛ ba a, kɛ nihi tsuo nɛ kpa wɔ jami, kɛ lejɛ ɔ zugba a mi bi ɔmɛ a kusumi yayami ɔmɛ, nɛ́ ba, konɛ a ba ja Yawɛ, Israel Mawu ɔ.

²² A kɛ bua jɔmi ye Abolokplolo nyami be ɔ ligbi kpaago. A bua jɔ saminya kaa Yawɛ ha Asiria matsɛ ɔ ná a he bua jɔmi, nɛ e piɛ a he nɛ a kɛ ma Yawɛ, Israel Mawu ɔ we ɔ.