Ezra 5 - BAIBLO ALOO NGMAMI KLƆUKLƆU Ɔ

¹ Jehanɛ gbali enyɔ, Hagai kɛ Ido bi Zakaria ba bɔni fiɛmi ngɛ Yuda kɛ Yerusalem ngɛ Israel Mawu ɔ nɛ hyɛɔ a nɔ ɔ biɛ mi.

² Kɛkɛ nɛ Shealtiel bi Zerubabel, kɛ Yehozadak bi Yoshua ya bɔni Mawu we ɔ mami ekohu, nɛ Mawu gbali ɔmɛ piɛ a he kɛ tsu ní ɔ.

³ Jamɛ a be ɔ mi kɛ̃ ɔ, amlaalo Tatenai nɛ ngɛ Yufrate pa a se ɔ, kɛ Sheta Bozenai, kɛ a nyɛmimɛ ɔmɛ ba Yerusalem, nɛ a ba bi ke, “Mɛnɔ ha nyɛ he wami ke nyɛɛ ma Mawu we ɔ, nɛ nyɛɛ fia gbogbo ɔ?”

⁴ A ya nɔ bi ke, “Nyɛɛ tsɔɔ wɔ nihi nɛ ngɛ we ɔ mae ɔ a biɛhi.”

⁵ Se Mawu piɛ Yuda ma nimeli ɔmɛ a he, nɛ Persia bi ɔmɛ tsi we ní tsumi ɔ nya ha mɛ. Mohu ɔ, Persia bi ɔmɛ to a yi mi kaa a maa ngma womi ya ha Darius, nɛ a maa mlɛ kɛ yaa si a nine maa su heto nɔ.

⁶ Womi nɛ amlaalo Tatenai, kɛ Sheta Bozenai, kɛ a nyɛmimɛ tsɔli nɛ ngɛ Yufrate pa a se ɔ ngma ya ha Matsɛ Darius ji nɛ ɔ nɛ:

⁷ “Matsɛ Darius, o yi nɔ nɛ jɔ!

⁸ “Nɛnɛ, wa ngɛ hae nɛ o le kaa wa ya Yuda, he nɛ Mawu kpetekpleenyɛ ɔ we ɔ ngɛ ɔ. Wa na kaa a ngɔ tɛ agboagbohi kɛ ngɛ gbogbo ɔ fiae, nɛ a ngɛ tso toe kɛ ngɛ nɔ puee. Ni ɔmɛ ngɛ ní tsumi ɔ tsue kɛ hɛdɔ, nɛ nɔ́ tsuaa nɔ́ ngɛ nɔ yae bɔ nɛ sa.

⁹ “Wa bi Yuda ma nimeli ɔmɛ ke a tsɔɔ wɔ nɔ nɛ ha mɛ he wami kaa a ma Mawu we ɔ ekohu, nɛ a fia gbogbo ɔ.

¹⁰ Wa bi a biɛhi hulɔ, bɔ nɛ pee nɛ wa ha nɛ o le ní tsumi ɔ nya dali.

¹¹ “Heto nɛ a ha wɔ ji, ‘Hiɔwe kɛ zugba Mawu ɔ tsɔli ji wɔ. We nɛ Israel matsɛ nguaa ko ma nɛ e gbe nya blema lokoo ɔ, lɔ ɔ wa ngɛ mae ekohu.

¹² Akɛnɛ wa nɛmɛ ɔmɛ wo hiɔwe Mawu ɔ mi mi la he je ɔ, e ngɔ mɛ ngɔ wo Babilonia matsɛ, Nebukadnezer, Kaldea no ɔ dɛ mi. Nebukadnezer ba ku Mawu we ɔ ngɔ pue si, nɛ e nuu ni ɔmɛ nyɔguɛ kɛ ho Babilonia ya.

¹³ Pee se, benɛ Matsɛ Sirus ba ngɛ tsɛ yee ngɛ Babilonia a, kekleekle jeha a mi ɔ, e fa ke a ma we ɔ ekohu.

¹⁴ Sika tsu, kɛ sika hiɔ níhi nɛ Nebukadnezer ba muɔ ngɛ Mawu we ɔ ngɛ Yerusalem kɛ ya wo lɛ, Nebukadnezer lɛɛ e mawu ɔ we ɔ ngɛ Babilon ɔ, matsɛ ɔ ngɔ ní nɛ ɔmɛ tsuo ngɔ ha Sheshbazar. Matsɛ Sirus wo nyumu nɛ ɔ amlaalo ngɛ Yuda.

¹⁵ Matsɛ ɔ de lɛ ke e ngɔ ní ɔmɛ kɛ ya Mawu we ɔ ngɛ Yerusalem, nɛ e ya ma Mawu we ɔ ekohu ngɛ he nɛ we ɔ hi kekle ɔ.

¹⁶ Kɛkɛ nɛ Sheshbazar ba nɛ e ba fia we ɔ sisi tomi ɔ ngɛ Yerusalem. Kɛ je jamɛ a be ɔ hluu kɛ ba su amlɔ nɛ ɔ, a ngɛ we ɔ he ní tsue, se a gbi nya lolo!’

¹⁷ “Nɛnɛ, lɔ ɔ he ɔ, ke o suɔ ɔ, ha nɛ a hyɛ matsɛmɛ ɔmɛ a yi nɔ sanehi womi ɔmɛ a mi ngɛ Babilon kaa e ngɛ mi niinɛ kaa Matsɛ Sirus fa ke a ma Mawu we ɔ ekohu ngɛ Yerusalem lo. Ke o na anɔkuale ɔ, konɛ o ha nɛ waa le bɔ nɛ o susu ngɛ sane nɛ ɔ he.”