Ezra 10 - BAIBLO ALOO NGMAMI KLƆUKLƆU Ɔ

A to ga nɛ a kɛ maa gu futufutu gba si himi

¹ Jehanɛ Ezra ya Mawu we ɔ hɛ mi. E fa kue ha Mawu, nɛ e jaje Israel ma a he yayami. Jamɛ a be ɔ tsuo ɔ, e ngɛ ya foe, nɛ e ngɔ e he kɛ ngɛ si fiae. Kɛkɛ nɛ Israel bi babauu, nyumihi, yihi, kɛ jokuɛwi ba bua a he nya ngɛ lejɛ ɔ, nɛ a wo yana.

² Kɛkɛ nɛ Elam we puɔ nya no ko nɛ a tsɛɛ lɛ Yehiel ɔ bi Shekania de Ezra ke, “Niinɛ, wa ya ngɔ ma se yihi, nɛ wa yi wa Mawu ɔ anɔkuale, se kɛ̃, hɛ nɔ kami ngɛ ha Israel.

³ Lɔ ɔ he ɔ, jehanɛ, nyɛ ha wa ka wa Mawu ɔ kita kaa wa maa wo kikɛmɛ a yi nɛ ɔmɛ, kɛ a bimɛ ɔmɛ tsuo pɛpɛɛpɛ blɔ. Nɔ́ nɛ mo, ye nyɔmtsɛ, kɛ nihi tsuo nɛ yeɔ Mawu mlaa a gbeye ma de ɔ, wa maa pee. Ee, wa maa ye Mawu mlaa a nɔ.

⁴ Tee si; o ní tsumi ji nɛ ɔ nɛ; wa ngɛ o se kpɛii. Pee kã, nɛ o tsu.”

⁵ Kɛkɛ nɛ Ezra te si, nɛ e ha nɛ osɔfo ɔmɛ a hɛ mi nyɛɛli ɔmɛ, Levi bi ɔmɛ, kɛ Israel ma a tsuo ka kita kaa a maa pee nɔ́ nɛ Shekania de ɔ.

⁶ Jehanɛ, Ezra je Mawu we ɔ hɛ mi, nɛ e ya sɛ Eliashib bi Yehohanan se tsu mi. E hi lejɛ ɔ nyɔ mi tsuo; e yi nɔ́ ko nɔ́ ko, nɛ e nui nyu hulɔ; kɔmɔ sɔuu e ngɛ yee, ejakaa Israel bi nɛ je ma se kɛ ba a yi Mawu anɔkuale.

⁷ A fiɛ ngɛ Yerusalem kɛ Yuda tsuo kaa nihi tsuo nɛ je ma se kɛ ba a, a ba kpe ngɛ Yerusalem.

⁸ Ligbi etɛ se, ke nɔ ko bɛ́ kaa bɔ nɛ ma tsɔli ɔmɛ, kɛ ma nimeli ɔmɛ fa ke a pee ɔ, á kpɔ e níhi tsuo ngɛ e dɛ; lɛ nitsɛ lɛɛ a ko bu lɛ ngɔ si e ma mi bi ɔmɛ a nɔ hu.

⁹ Ligbi etɛne ɔ pɛpɛɛpɛ ɔ, Yuda, kɛ Benyamin bi tsuo ba bua a he nya ngɛ Yerusalem. Nyɔhiɔ nɛɛne ɔ we ligbi nyingmi enyɔ ji jamɛ a ligbi ɔ nɛ. Ma a tsuo ba pue si ngɛ magbɛ mi ngɛ Mawu we ɔ hɛ mi, nɛ a he ngɛ doe blibliibli ngɛ sane nɛ ɔ, kɛ jehanɛ hiɔmi nɛ ngɛ nɛe wawɛɛ ɔ he.

¹⁰ Kɛkɛ nɛ osɔfo Ezra te da si, nɛ e de mɛ ke, “Nyɛ tɔ̃; ejakaa nyɛ ya ngɔ ma se yihi; nɛ enɛ ɔ ha nɛ Israel he yayami ɔ ba hiɛ pe sa a.

¹¹ Lɔ ɔ he ɔ, nyɛɛ jaje nyɛ he yayami ɔmɛ kɛ ha Yawɛ, nyɛ nɛmɛ a Mawu ɔ, nɛ nyɛɛ pee nɔ́ nɛ sa e hɛ mi. Nyɛ tsɔ nyɛ he kɛ je nibwɔ ɔmɛ nɛ ngɛ wa zugba a nɔ ɔ a he; nyɛɛ ngmɛɛ nyɛ ma se yi ɔmɛ a he.”

¹² Kɛkɛ nɛ ma a tsuo he nɔ kɛ ngmlaa ke “Saminya! Bɔ nɛ o de ɔ, wa maa pee jã.”

¹³ A ya nɔ nɛ a de ke, “Ni ɔmɛ a he hiɛ tsɔ, nɛ hiɔmi hu lɛ ngɛ nɛe wawɛɛ nɛ ɔ nɛ. Wa be nyɛe maa da si ngɛ magbɛ mi kikɛ nɛ ɔ. Sane nɛ ɔ, pi nɔ́ nɛ a ma nyɛ maa gbe nya ligbi kake, loo ligbi enyɔ pɛ; ejakaa wɔ nihi nɛ wa he ngɛ sane yobu nɛ ɔ mi ɔ, wa he hiɛ.

¹⁴ Ha nɛ wa ma tsɔli ɔmɛ nɛ a da ma a tsuo nane mi ngɛ Yerusalem hiɛmɛ nɛ ɔ. Nɔ tsuaa nɔ nɛ ngɔ ma se yo ɔ, ha nɛ e ba hiɛ ɔ be nɛ a maa to lɛ ɔ. E kɛ e ma mi he nɛ e je ɔ ma nimeli, kɛ kojoli nɛ ba. A pee enɛ ɔ hluu kɛ yaa si Mawu mi mi fumi nɛ nya wa ngɛ sane nɛ ɔ he je ɔ se maa po ngɛ wa nɔ.”

¹⁵ Asahel bi Yonatan, kɛ Tikva bi Yazeya pɛ lɛ a te si kɛ si blɔ nya tomi nɛ ɔ; nɛ Meshulam, kɛ Levi no, Shabetai pi a se.

¹⁶ Nihi nɛ je ma se kɛ ba a kplɛɛ blɔ nya tomi ɔ, nɛ osɔfo Ezra hla nihi kɛ je we puɔ nya dali ɔmɛ a kpɛti we puɔ nya we puɔ nya ngɛ a biɛhi a nya. Nyɔhiɔ nyɔngmane ɔ we kekleekle ligbi ɔ, a he sɛ, nɛ a bɔni sane ɔmɛ a mi hyɛmi;

¹⁷ nɛ kekleekle nyɔhiɔ ɔ we kekleekle ligbi ɔ, a hyɛ nihi tsuo nɛ ngɔ ma se yihi a sane ɔmɛ a mi kɛ gbe nya.

Nihi nɛ ngɔ ma se yihi

¹⁸ Nihi nɛ ngɔ ma se yihi a biɛhi ji nɛ ɔmɛ. Yehozadak binyumu Yoshua kɛ e nyɛminyumu ɔmɛ: Maaseya, Eliezer, Yarib, kɛ Gedalia.

Osɔfo ɔmɛ ngɛ a we puɔ nya:

¹⁹ A wo si ke a maa ngmɛɛ a yi ɔmɛ a he; nɛ a ngɔ agbosu kake kɛ sã bɔ, konɛ a ngɔ a he yayami ɔmɛ kɛ pa mɛ.

²⁰ Imer we puɔ nya: Hanani kɛ Zebadia.

²¹ Harim we puɔ nya: Maaseya, Eliya, Shemaya, Yehiel, kɛ Uzia.

²² Pashur we puɔ nya: Elioenai, Maaseya, Ishmael, Netanel, Yozabad, kɛ Elasa. Yozabad, Shimei, Kelaya (e biɛ kpa ji Kelita), Petahia, Yuda, kɛ Eliezer. Eliashib Shalum, Telem, kɛ Uri Parosh we puɔ nya: Ramia, Izia, Malkiya, Miyamim, Eleazar, Malkiya, kɛ Benaya.

Levi bi ɔmɛ: Mawu we ɔ lali: Mawu we ɔ buli: Ni kpahi:

²⁶ Elam we puɔ nya: Matania, Zakaria, Yehiel, Abdi, Zeremot, kɛ Eliya.

²⁷ Zatu we puɔ nya: Elioenai, Eliashib, Matania, Yeremot, Zabad, kɛ Aziza.

²⁸ Bebal we puɔ nya Yehohanan, Hanania, Zabai, kɛ Atlai.

²⁹ Bani we puɔ nya: Meshulam, Maluk, Adaya, Yashub, Sheal, kɛ Yeremot.

³⁰ Pahat Moab we puɔ nya: Adna, Kelai, Benaya, Maaseya, Matania, Bezalel, Binui, kɛ Manase.

^31-32 Harim we puɔ nya: Eliezer, Ishiya, Malkiya, Shemaya, Shimeon, Benyamin, Maluk, kɛ Shemaria.

³³ Hashum we puɔ nya: Matenai, Matata, Zabad, Elifelet, Yeremai, Manase, kɛ Shimei.

^34-37 Bani we puɔ nya: Maadai, Amram, Uel, Benaya, Bedeya, Keluhi, Vania, Meremot, Eliashib, Matania, Matenai, kɛ Yaasu.

^38-42 Binui we puɔ nya: Shimei, Shelemia, Natan, Adaya, Maknadebai, Shashai, Sharai, Azarel, Shelemia, Shemaria, Shalum, Amaria, kɛ Yosef.

⁴³ Nebo we puɔ nya: Yeyel, Matitia, Zabad, Zebina, Yadai, Yoel, kɛ Benaya.

⁴⁴ Nimli nɛ ɔmɛ tsuo ngɔ ma se yihi. A wo a yi ɔmɛ, kɛ a bimɛ ɔmɛ tsuo blɔ.