Ezekiel 9 - BAIBLO ALOO NGMAMI KLƆUKLƆU Ɔ

A gbla Yerusalem tue

¹ Kɛkɛ nɛ i nu nɛ Mawu wo gbi wawɛɛ ke, “Nyɛɛ ba hiɛ ɔ, nyɛ nihi nɛ nyɛ ma kpata ma a hɛ mi. Nɔ tsuaa nɔ nɛ hɛɛ awi yemi dade ngɛ e dɛ kɛ ba!”

² Amlɔ nɔuu ɔ, nyumuhi ekpa je yiti je agbo nɛ ngɛ omleyi je ɔ mi kɛ ba kɛ a dɛ mi awi yemi dadehi. Nɔ ko hu nɛ ha kploba, nɛ e kpla womi ngmami nɔ́ ko ngɛ e kasa nya kɛ mɛ ba. A ba da si ngɛ bɔ sami la tɛ nɛ a kɛ akɔblee pee ɔ he.

³ Jehanɛ, Israel Mawu ɔ hɛ mi nyami ɔ je kerub ɔ nɔ kɛ ba we ɔ kpoku ɔ nya. Kɛkɛ nɛ Yawɛ tsɛ nyumu ɔ nɛ ha kploba, nɛ e kpla womi ngmami nɔ́ ngɛ e kasa nya a.

⁴ E de lɛ ke, “Yaa kpa si kɛ gu Yerusalem ma a mi tsuo. Nihi nɛ ngɛ haoe, nɛ a ngɛ kɔmɔ yee ngɛ ní hiemi níhi nɛ a ngɛ pee ɔ a he ɔ, pee okadi ngɛ a hɛ nya.”

⁵ Se ni kpa amɛ lɛɛ nɔ́ nɛ Mawu de mɛ nɛ i nu ji, “Nyɛɛ nyɛɛ e se kɛ ya kpa ma a mi, nɛ nyɛɛ gbe ni ɔmɛ. Nyɛ ko baa nɔ ko nɔ ko yi; nyɛ ko na nɔ ko nɔ ko mɔbɔ.

⁶ Nyɛɛ gbe ni ɔmɛ tsuo: nikɔtɔmahi, nihewi, yihewi, jokuɛwi, bimwɔwi kɛ a nyɛmɛ. Se nɔ tsuaa nɔ nɛ okadi ɔ ngɛ e hɛ nya a lɛɛ nyɛ ko ta e he. Nyɛɛ je sisi kɛ je ye he klɔuklɔu ɔ.” Kɛkɛ nɛ a bɔni ni ɔmɛ gbemi kɛ je ma nimeli ɔmɛ nɛ daa si ngɛ Yawɛ we ɔ hɛ mi ɔ a nɔ.

⁷ Mawu de mɛ ke, “Nyɛɛ ya nɛ nyɛ ya ble we ɔ! Nyɛ ha nɛ kue ɔmɛ a mi nɛ a hyi kɛ ni gbogboehi. Nyɛɛ je kpo!” Kɛkɛ nɛ a je kpo, nɛ a ya gbe ni ɔmɛ ngɛ ma a mi.

⁸ Benɛ a ngɛ ni ɔmɛ gbee ɔ, e ba piɛ imi nɔ kake too nɛ a gbi mi. I ngɔ ye hɛ mi ngɔ bu si, nɛ i kpa ngmlaa ke, “Ao, Nyɔmtsɛ Yawɛ, bɔ nɛ o ngɔ o mi mi la kɛ kple Yerusalem nɔ nɛ ɔ, anɛ o miɔ nɛ o kpata Israel bi nɛ piɛ ɔ tsuo a hɛ mi lo?”

⁹ Mawu he nɔ ke, “Israel kɛ Yuda bi ɔmɛ pee yayami agbo; fɔ nɛ a ye ɔ kle tsɔ. Zugba a nɔ tsuo hyi tɔ kɛ muɔ si puemi; nɛ Yerusalem ma a mi hu a yi dami sane. A ngɛ dee ke imi Yawɛ, i kua zugba a, nɛ i nɛ mɛ.

¹⁰ Se i be mɛ mɔbɔ nae; i be a yi bae. Bɔ nɛ a pee ni kpa amɛ ɔ, ja pɛpɛɛpɛ ma pee mɛ.”

¹¹ Jehanɛ, nyumu ɔ nɛ ha kploba, nɛ e kpla womi ngmami nɔ́ ngɛ e kasa nya a kpale kɛ ba, nɛ e ba bɔ Yawɛ amaniɛ ke, “I pee bɔ nɛ o fa mi ɔ.”