Ezekiel 8 - BAIBLO ALOO NGMAMI KLƆUKLƆU Ɔ

MAWU HE NINA ENYƆNE NƐ EZEKIEL NA ( 8.1—10.22 ) A ngɛ amaga jae ngɛ Yerusalem

¹ Jeha ekpane ɔ we nyɔhiɔ ekpane ɔ we ligbi enunɔne ɔ, benɛ i kɛ Yuda ma nimeli ɔmɛ hii si ngɛ ye we ɔ mi ɔ, tlukaa a, Nyɔmtsɛ Yawɛ he wami ba ye nɔ.

² Ma hyɛ ɔ, o nɛ nɔ́ ko nɛ ngɛ kaa nɔmlɔ. Kɛ je e mlɛ mi kɛ kple si ɔ, la sɔuu; nɛ kɛ je e mlɛ mi kɛ kuɔ ɔ ngɛ kpɛe hleii kaa akɔblee nɛ a sa he.

³ E je nɔ́ ko kpo kaa nine kɛ nu ye yi bwɔmi. Kɛkɛ nɛ ngɛ nina a mi ɔ, Mawu mumi ɔ wo mi kɛ gu kɔɔhiɔ mi kɛ ya su Yerusalem. E ngɔ mi kɛ ya ma Yawɛ we ɔ we omleyi je agbo ɔ mi. Amaga ko nɛ Mawu hiee wawɛɛ ɔ maa si ngɛ lejɛ ɔ.

⁴ Kɛkɛ nɛ i na Israel Mawu ɔ hɛ mi nyami ɔ ngɛ lejɛ ɔ kaa nina nɛ i na ngɛ kɔ̃ ɔ mi ɔ.

⁵ Mawu kɛ mi tu munyu, nɛ e de mi ke, “Nɔmlɔ adesa, hyɛ omleyi je!” I hyɛ, nɛ i na jamɛ a amaga a nɛ a hiee wawɛɛ ɔ maa si ngeɛbɔ sami la tɛ agbo ɔ we omleyi je ngɛ agbo ɔ nya.

⁶ Mawu de mi ke, “Nɔmlɔ adesa, tse o na ní hiemi ní nguanguahi nɛ Israel bi ɔmɛ peeɔ ngɛ hiɛ ɔ; a peeɔ enɛ ɔmɛ konɛ ma je ye he klɔuklɔu ɔ kɛ ya se lokoo? Se o maa na ní hiemi ní nguangua kpahi pe enɛ ɔ.”

⁷ Jehanɛ, e kɛ mi ba kpo nɔ je kue ɔ sinya a nya, nɛ e tsɔɔ mi puɔ ko ngɛ gbogbo ɔ mi.

⁸ E de mi ke, “Nɔmlɔ adesa, ywia gbogbo ɔ ngɛ lejɛ ɔ.” I pee ja, nɛ i na sinya ko.

⁹ E de mi ke, “Sɛ tsu ɔ mi, konɛ o ya na ní hiemi níhi babauu nɛ a ngɛ pee ngɛ lejɛ ɔ!”

¹⁰ Benɛ i sɛ tsu ɔ mi ɔ, i na nɛ a tɛni ní nɛ ɔmɛ ngɛ gbogbo ɔ he tsuo kɛ kpe: sinɔ slɔɔtohi babauu, lohwe nane eywiɛɛywiɛtsɛmɛ nɛ a hiee, kɛ Israel bi ɔmɛ a we amaga amɛ tsuo.

¹¹ Israel ma nimeli nyingmi kpaago, kɛ Yaazania, Shafan bi ɔ daa si ngɛ lejɛ ɔ. A ti nɔ tsuaa nɔ hɛɛ ngɛyu kɛ e mi tsopa kɛ e he via nɛ la su ku ngɛ mi jee kɛ yaa hiɔwe.

¹² Mawu bi mi ke, “Nɔmlɔ adesa, tse o na nɔ́ nɛ Israel ma nimeli ɔmɛ ngɛ pee ngɛ diblii mi! Tse o na nɔ́ nɛ nɔ tsuaa nɔ ngɛ tsue ngɛ lɛ nitsɛ e we amaga jami he. Se nɔ́ nɛ a ngɛ dee ji, ‘Yawɛ nɛ wɔ! Yawɛ si e zugba a ngɔ fɔ si.’ ”

¹³ Yawɛ de mi jehanɛ hu ke, “O maa na ní hiemi ní nguangua kpahi nɛ pe nɔ́ nɛ a ngɛ pee nɛ ɔ po.”

¹⁴ Kɛkɛ nɛ e kɛ mi ba Yawɛ we ɔ agbo ɔ sinya a nɛ ngɛ omleyi je ɔ nya. Lejɛ ɔ hu, ne yihi nɛ ngɛ ya nyɛe ha Tamuz.

¹⁵ E de mi ke, “Nɔmlɔ adesa, anɛ o na enɛ ɔ hu lo? O maa na ní hiemi ní nguanguahi nɛ pe enɛ ɔmɛ.”

¹⁶ Lɔ ɔ he ɔ, e kɛ mi ba Yawɛ we ɔ kue ɔ nɛ ngɛ mi mi je ɔ mi. Nyumuhi maa pee nyingmi enyɔ kɛ enuɔ daa si ngɛ kue ɔ, kɛ bɔ sami la tɛ ɔ a kpɛti. A plɛ a se kɛ wo Yawɛ we ɔ; a ngɔ a hɛ mi kɛ kpee beleku je, nɛ a ngɛ pu nɛ te si kɛ ma a jae.

¹⁷ Jehanɛ, Yawɛ de mi ke, “Nɔmlɔ adesa, tse o na enɛ ɔ hulɔ! Anɛ ní hiemi níhi nɛ Yuda ma a ngɛ pee ngɛ hiɛmɛ nɛ ɔ pi ha mɛ lolo lo? Hyɛ, a ngɛ yi wu tso níhi pee tsɔ ngɛ zugba a nɔ. Anɛ pi ye mi mi la nɛ a ngɛ woe wawɛɛ nɛ ɔ? A ngɔ ní nɛ ɔmɛ kɛ ba sɛ ye we ɔ mi nitsɛ tɔɔ! A ngɛ tsɔɔe kaa a bui mi fɛɛ, pi jã?

¹⁸ Lɔ ɔ he ɔ, i kɛ abofu nɛ nya wa ma kple a nɔ. A be mɔbɔ nami ko kulaa nae ngɛ ye hɛngmɛ mi, nɛ i be a yi bae hulɔ. A maa fa kue boboobo kɛ tsɛ mi, se i be mɛ tue bue.”