Ezekiel 7 - BAIBLO ALOO NGMAMI KLƆUKLƆU Ɔ

Israel tue gblami be ɔ su ta

¹ Yawɛ de mi ke,

² “Nɔmlɔ adesa, bɔ nɛ imi Nyɔmtsɛ Yawɛ, i ngɛ Israel zugba a dee ji nɛ ɔ nɛ: O gbe nya pɛ! Israel zugba a tsuo, o nyagbe ɔ su jehanɛ!

³ “Israel, o nyagbe ɔ su jehanɛ. O maa na bɔ nɛ ye mi mi wo la ha; ejakaa ma gbla o tue ngɛ níhi nɛ o pee ɔ a he. Ní hiemi níhi nɛ o tsu ɔ tsuo, ma wo mo a he hiɔ.

⁴ I be o yi bae; i be mo mɔbɔ nae. Se ma gbla o tue mohu ngɛ ní hiemi níhi nɛ o ngɛ pee kpamisa a he. Kɛkɛ ɔ, o maa le kaa imi ji Yawɛ.”

⁵ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Amanehlu nyɛɛ amanehlu se kɛ ma!

⁶ Nyagbe ɔ su oo! E ná mo jehanɛ! O yi ta pɛ!

⁷ Nyɛ nihi nɛ nyɛ ngɛ zugba a nɔ, be nɛ a to ha nyɛ ɔ su. Jehanɛ lɛɛ be ɔ su. A be ose hee, nɛ a be nyae ngɛ jami he ɔmɛ ngɛ yo ɔmɛ a nɔ hu; ejakaa amanehlu be ɔ su jehanɛ.

⁸ “E be kɛe kulaa nɛ ye mi mi la ma kple o nɔ. Ma kojo mo ngɛ ní hiemi níhi tsuo nɛ o pee ɔ kulaa a he. Ma gbla o tue wawɛɛ ngɛ ní hiemi níhi tsuo nɛ o pee ɔ a he.

⁹ O be mɔbɔ nami ko kulaa nae ngɛ ye hɛngmɛ mi, nɛ i be o yi bae hulɔ; se ma gbla o tue wawɛɛ mohu ngɛ ní hiemi níhi nɛ o ngɛ pee kpamisa a he. Kɛkɛ ɔ, o maa le kaa imi Yawɛ lɛ i ngɛ o tue gblae ɔ nɛ.”

¹⁰ Hyɛ, ligbi ɔ ji nɛ ɔ nɛ! O nyagbe ɔ su! Israel, amanehlu be ɔ ba na mo. Nɔ sisimi ngɛ nɔ yae wawɛɛ kaa tso nɛ gba mɔmɔ, nɛ he womi hu nya wa kaa blɛfo nɛ je deke.

¹¹ Yi wu tso ní peemi wo wu. Kikɛmɛ a nimli nɛ ɔmɛ a ti nɔ ko nɔ ko be je mi hie hu; jã kɛ̃ a níhi nɛ a ngɛ, a juetli, kɛ a hɛ mi nyami tsuo maa laa.

¹² Be ɔ ma. Ligbi ɔ su jehanɛ. Ní juami, kɛ ní hemi tsuo he be se nami hu, ejakaa Mawu maa gbla nɔ tsuaa nɔ tue, nɔ́ jualɔ jio, nɔ́ helɔ jio.

¹³ Jua yelɔ ko jua yelɔ ko be je mi tlɔe nɛ e ma ya bi nɔ́ ko nɛ e ye nya momo ɔ si; ejakaa Mawu mi mi fu ma a tsuo. Yayami peeli a yi be wami nae.

¹⁴ A ma kpa titimati, nɛ nɔ tsuaa nɔ maa pee klaalo kɛ ha ta. Se nɔ ko nɔ ko be ta yae, ejakaa Mawu mi mi fumi maa ba nɔ tsuaa nɔ nɔ.

A maa gbla Israel tue ngɛ e yayami ɔmɛ a he

¹⁵ A maa hia klaate kɛ nyɛɛ gbɛjegbɛ ɔmɛ a nɔ; nɛ gbenɔ hiɔ maa ba we ɔmɛ a mi. Nɔ nɛ ngɛ ta nga nɔ ɔ maa nɔ ngɛ ta a nya; nɔ nɛ ngɛ ma a mi ɔ, gbenɔ hiɔ, loo hwɔ ma kpata e hɛ mi.

¹⁶ Ni komɛ maa tu fo kɛ ya yo ɔmɛ a nɔ ya hi lejɛ ɔ kaa lahuɛhi nɛ a fie mɛ kɛ je a hi he. Mɛ tsuo a maa ye kɔmɔ; nɔ tsuaa nɔ ma fo ya ngɛ lɛ nitsɛ e he yayamihi a he.

¹⁷ Nɔ tsuaa nɔ nine mi maa je wu, nɛ nakutso tsuaa nakutso mi maa wo nyu.

¹⁸ A ma bu kpekpe ya bo; sawale maa nu mɛ. A ma sã mɛ tsuo a yi nɔ ha mɛ, nɛ zo maa gbe mɛ kpɔtɔɔ.

¹⁹ A ma sake a sika tsu, kɛ sika hiɔ ngɔ pue gbɛjegbɛ ɔmɛ a nɔ kaa níhi nɛ a he tsɔ we. Ligbi ɔ nɛ Yawɛ we abofu maa ba ma a nɔ ɔ, a sika hiɔ, kɛ sika tsu ɔ be nyɛe ma he a yi wami; a be nyɛe maa ye kaa niye ní nɛ a tɔ, konɛ a na bua jɔmi. Ejakaa sika tsu, kɛ sika hiɔ ji níhi nɛ ha nɛ a pee yayami ɔ nɛ.

²⁰ A ngɔ a he dlami ní saminyawiiwi nɛ ɔmɛ kɛ pee amagahi, níhi nɛ a hiee, kɛ níhi nɛ ngɛ tai. Enɛ ɔ he ɔ, Yawɛ ha nɛ a june ɔmɛ plɛ pee níhi nɛ he tsɔ we ha mɛ.

²¹ Yawɛ ke, “Ma ha nibwɔhi ma ba kpɔ ní nɛ ɔmɛ ngɛ nyɛ dɛ, nɛ yiwutsotsɛmɛ nɛ ngɛ zugba a nɔ maa ha ní, nɛ a ma ble zugba a.

²² Ke a ngɛ ye we ɔ june blee po, i be a nya tsie; juli ma nyɛ maa sɛ mi ya ble lejɛ ɔ faa.

²³ “Nɔ́ tsuaa nɔ́ maa pee basaa; zugba a tsuo nɔ ma hyi kɛ muɔ si puemi, nɛ ma a mi maa pee gidigidi.

²⁴ Ma ha je mahi nɛ a yi mi wa wawɛɛ ɔ maa ba, nɛ a ma ba ngɔ nyɛ we ɔmɛ. Kã peeli nɛ ngɛ nyɛ kpɛti ɔ maa je fɔ̃, nɛ he nyɛli ɔmɛ ma ba ble nyɛ he klɔuklɔu ɔmɛ.

²⁵ Nyɛ nine mi maa je wu. Jamɛ a be ɔ, nyɛ ma hla tue mi jɔmi, se nyɛ be nae.

²⁶ Amanehlu maa nyɛɛ amanehlu se; nɛ munyu yobu maa nyɛɛ munyu yobu se; nyɛ ma hla nina kɛ je gbali ɔmɛ a ngɔ, se osɔfo ɔmɛ po mlaa maa laa mɛ kulaa; nɛ nyɛ ma nimeli ɔmɛ hu be ga kpakpa ko nyɛe maa wo.

²⁷ Matsɛ ɔ maa ye kɔmɔ; ganɔ ɔ nine mi maa je wu, sawale maa nu ma a, nɛ mɛ tsuo a he maa do blibliibli. Bɔ nɛ ma gbla nyɛ tue ngɛ níhi nɛ nyɛ pee ɔ a he ji nɛ ɔ nɛ. Bɔ nɛ nyɛ kojoɔ ni komɛ ɔ, jã imi hu ma kojo nyɛ. Kɛkɛ ɔ, nyɛ maa le kaa imi ji Yawɛ.”