Ezekiel 6 - BAIBLO ALOO NGMAMI KLƆUKLƆU Ɔ

Yawɛ sume amaga jami

¹ Yawɛ de mi ke,

² “Nɔmlɔ adesa, plɛ o hɛ mi kɛ kpee Israel yo ɔmɛ, nɛ o ha mɛ sɛ gbi nɛ ɔ.

³ De Israel yo ɔmɛ ke a bu Nyɔmtsɛ Yawɛ munyu ɔ tue. De mɛ ke a nu nɔ́ nɛ imi Nyɔmtsɛ Yawɛ, i ngɛ yo gagaa amɛ, yoku ɔmɛ, dɔgba amɛ, kɛ kɔ̃ ɔmɛ tsuo dee ɔ. Imi nitsɛ ma hia ta kɛ wo nyɛ; ma gbɛ nyɛ jami he ɔmɛ.

⁴ Ma ku nyɛ bɔ sami la tɛ ɔmɛ, kɛ nyɛ tsopa kɛ e he via bɔ sami la tɛ ɔmɛ tsuo kɛ pue si. Ma gbe ni ɔmɛ nɛ a ngɛ lejɛ ɔ ngɔ pue nyɛ we amaga amɛ a nɔ.

⁵ Israel bi nɛ ma gbe ɔ, a gbogboe ɔmɛ ma pue si ngɛ amaga amɛ a hɛ mi; nɛ a wuhi ma fĩa kɛ bɔle bɔ sami la tɛ ɔmɛ kɛ kpe.

⁶ Nyɛ ma amɛ nɛ nyɛ ngɛ a mi ɔ ma ba pee ma dokuhi. Nyɛ jami he ɔmɛ a hɛ mi ma kpata; kɛkɛ ɔ, nyɛ bɔ sami la tɛ ɔmɛ, kɛ amaga amɛ maa ku dukuduku ngɔ pue si. Níhi nɛ nyɛ sãã tsopa kɛ e he via ngɛ mi ɔ maa ywia, nɛ nyɛ nine nya ní tsumi ɔmɛ tsuo a hɛ mi ma kpata.

⁷ Nihi babauu ma gbo ngɛ nyɛ kpɛti; lɔ ɔ loko nyɛ nihi nɛ maa piɛ ɔ ma na maa le kaa imi ji Yawɛ.

⁸ “Se kɛ̃ ɔ, ma ha ni komɛ maa piɛ. Nihi nɛ maa tu fo kɛ je gbenɔ nya a,

⁹ a maa nuu mɛ nyɔguɛ kɛ ho ma se ya. A ma kai mi ngɛ lejɛ ɔ; nɛ a maa le kaa imi nitsɛ lɛ i gbla a tue, nɛ i pue a hɛ mi si ɔ nɛ. Ejakaa a yi mi anɔkuale kɛ ji a tsui mi; se a kua mi, nɛ a ya ja amagahi mohu. Jehanɛ lɛɛ, mɛ nitsɛmɛ a he mi maa nyɛɛ mɛ ngɛ yayamihi, kɛ ni hiemi níhi tsuo nɛ a pee ɔ a he.

¹⁰ A maa le kaa imi ji Yawɛ ɔ nɛ; nɛ nɛ́ i de ke ma gbla a tue ɔ, pi nya mi nɛ i pee.”

¹¹ Bɔ nɛ Nyɔmtsɛ Yawɛ de ji nɛ ɔ nɛ: “Tsɛ̃ o nguɛ nya! Ngɔɔ o nane kɛ si si! De ke akuanyɛ, musu tloo Israel ma a ngɛ yayamihi tsuo nɛ a pee ɔ he. Ta ma kpata ni komɛ a hɛ mi; mi mi hwɔ maa gbe ni komɛ; nɛ gbenɔ hiɔ maa ngɔ ni komɛ hu kɛ ho!

¹² Nihi nɛ ngɛ se lokoo ɔ maa nu hiɔ, nɛ a ma gbo; nihi nɛ ngɛ kpo nya a maa nɔ ngɛ ta mi; nihi nɛ maa piɛ ɔ, hwɔ maa gbe mɛ. Bɔ nɛ ye mi mi la nɛ nya wa a ma tsu ní ji nɛ ɔ nɛ.

¹³ A maa na nihi nɛ a kpata a hɛ mi ɔ a gbogboe ɔmɛ nɛ pueɔ si ngɛ amaga amɛ, kɛ bɔ sami la tɛ ɔmɛ a he tsuo kɛ kpe. A maa na gbogboe ɔmɛ ngɛ yokuhi nɛ ya hiɔwe, kɛ yohi tsuo a yi mi. A maa na mɛ ngɛ tsohi tsuo nɛ bɔ kusuu, kɛ tso ngua amɛ a sisi. Hehi tsuo nɛ a sãã bɔ nɛ jeɔ via ngɛ kɛ haa a we amaga amɛ hu a maa na a gbogboe ɔmɛ nɛ pueɔ si ngɛ lejɛ ɔmɛ ja nɔuu. Lɔ ɔ loko nyɛ ma na maa le kaa imi ji Yawɛ.

¹⁴ Niinɛ, ma wo ye nine nɔ ngɛ a nɔ, nɛ ma kpata zugba a hɛ mi bɔ nɛ nɔ ko nɔ ko be nɔ nyɛe maa hi. Kɛ je leneyi je nga kplanaa a nɔ kɛ ya su Ribla ma a he ngɛ omleyi je, hehi nɛ Israel bi ɔmɛ hii ɔ, ma kpata lejɛ ɔmɛ tsuo a hɛ mi. Kɛkɛ ɔ, a ma na maa le kaa imi ji Yawɛ.”