Ezekiel 5 - BAIBLO ALOO NGMAMI KLƆUKLƆU Ɔ

Ezekiel sɛ e yi kɛ e kpɛni

¹ Yawɛ de mi ke, “Nɔmlɔ adesa, ngɔɔ klaate nɛ nya ba kɛ sɛ o yi bwɔmi, kɛ o kpɛni kaa bɔ nɛ a kɛ asoyi ngmlaa yi ɔ. Lɔ ɔ se ɔ, ngmɛɛ bwɔmi ɔ ngɛ sɛni mi, nɛ o dla mi.

² Ke a sa ma a yi se ɔ, ngɔɔ la kɛ sã bwɔmi ɔ mi dlami etɛ mi kake ngɛ ma a kpɛti. Mi dlami etɛ ɔ mi kake hu ngɔɔ klaate ɔ kɛ poo mi kɛ bɔle ma a kɛ kpe. Mi dlami etɛ ɔ mi kake nɛ maa piɛ ɔ, ngɔɔ kɛ fĩa kɔɔhiɔ mi; kɛkɛ ɔ, ma hia klaate ɔ kɛ nyɛɛ a se.

³ Ngɔɔ bwɔmi nɛ ɔ mi bɔɔ ko pɛ kɛ muɔ o tade ɔ nya.

⁴ Lɔ ɔ se ɔ, je lɔ ɔ mi eko nɛ o sake kɛ pue la a mi nɛ e sã. Enɛ ɔmɛ a mi la maa je kɛ ba ha Israel ma a tsuo.”

Nɔ́ he je nɛ a kpata Yerusalem hɛ mi

⁵ Nyɔmtsɛ Yawɛ ke, “Nyɛɛ hyɛ, Yerusalem ji nɛ ɔ nɛ; i ngɔ lɛ kɛ ma je ma amɛ a kpɛti, nɛ ma kpahi bɔle lɛ kɛ kpe.

⁶ Se Yerusalem tsɔ atuã; e yi ye mlaa amɛ a nɔ, mohu e pee yayamihi nɛ nya wa babauu pe je ma kpa amɛ nɛ bɔle lɛ ɔ. E wa tue, nɛ e bui nɔ́ ko nɔ́ ko. Yerusalem yi ye mlaa amɛ a nɔ.

⁷ Lɔ ɔ he ɔ, Yerusalem, bu tue; bu nɔ́ nɛ imi Nyɔmtsɛ Yawɛ, i ngɛ mo dee ɔ tue. Akɛnɛ o tue gbo pe je ma amɛ nɛ bɔle mo ɔ, nɛ ye blɔ nya tomi ɔmɛ, kɛ mlaa amɛ hu, o yi a nɔ, se mohu je ma amɛ a kusumi níhi o peeɔ ɔ,

⁸ imi Nyɔmtsɛ Yawɛ hu, i kɛ mo ná. Ma gbla o tue ngɛ je ma amɛ a hɛ mi paa.

⁹ Ní hiemi níhi tsuo nɛ o pee he je ɔ, ma gbla o tue wawɛɛ bɔ nɛ i pee we nɔ ko hyɛ, nɛ i be pee gblegbleegble hulɔ.

¹⁰ Bɔ nɛ e maa ba ji kaa fɔli ngɛ Yerusalem maa ye mɛ nitsɛmɛ a bimɛ, nɛ bimɛ ɔmɛ hu maa ye a fɔli. Ma gbla o tue wawɛɛ; nɛ nihi nɛ a yi ma na wami ɔ, ma gbɛ mɛ ngɔ fĩa je ɔ mi tsuo.

¹¹ “Lɔ ɔ he ɔ, be a bɔ nɛ imi Nyɔmtsɛ Yawɛ, i ngɛ nɛ ɔ, akɛnɛ o ngɔ tai níhi, kɛ níhi nɛ a hiee tsuo kɛ ble ye he klɔuklɔu ɔ, imi Yawɛ hu, i be mo mɔbɔ nae, nɛ i be o yi bae; mohu ma kpata o hɛ mi pɛsɛpɛsɛ.

¹² Gbenɔ hiɔ, kɛ hwɔ maa gbe ma mi bi ɔmɛ a mi dlami etɛ mi kake; mi dlami etɛ mi kake maa nɔ ngɛ klaate nya kɛ maa bɔle ma a kɛ kpe, nɛ mi dlami etɛ mi kake ɔ hu, ma gbɛ mɛ ngɔ fĩa je ɔ mi tsuo; nɛ ma hia ta kɛ nyɛɛ a se.

¹³ “Ma gbla nyɛ tue wawɛɛ kɛ yaa si be nɛ ye mi mi la a se maa po, nɛ́ ye bua maa jɔ. Ke e ba mi ja a, kɛkɛ nyɛ maa le kaa imi Yawɛ, i kɛ nyɛ tu munyu kikɛ nɛ ɔ, ejakaa nyɛ yi mi anɔkuale, nɛ lɔ ɔ nɛ wo ye mi mi la a nɛ.

¹⁴ Ma ha Yerusalem maa pee ma doku, kɛ ma nɛ bɔ ahlua ngɛ je ma amɛ a kpɛti. Nihi nɛ maa be ngɛ lejɛ ɔ tsuo maa hie lɛ.

¹⁵ “Ke ye mi mi fu, nɛ ye hɛ dɔ, nɛ i gbla nyɛ tue kikɛ ɔ, je ma amɛ nɛ bɔle nyɛ ɔ tsuo maa ye gbeye; a maa hie nyɛ, nɛ a maa ye nyɛ he fɛu.

¹⁶ Ma ha nɛ nyɛ niye ní se maa po kulaa. Hwɔ maa ye nyɛ, nɛ nyɛ maa nu hwɔ ɔ he wawɛɛ kaa nɔ́ nɛ kɛ̃ɛ̃ mi bihi kɛ a nya duɔ nɛ i ngɔ kɛ ngɛ nyɛ hɛ mi kpatae.

¹⁷ Ma ha nɛ hwɔ, kɛ lohwe awi yeli ma kpata nyɛ bimɛ ɔmɛ a hɛ mi. Ma ha gbenɔ hiɔ, kɛ ta ma ba kpata ma a hɛ mi. Imi, Yawɛ lɛ i de.”