Ezekiel 47 - BAIBLO ALOO NGMAMI KLƆUKLƆU Ɔ

Nyu nɛ je Yawɛ we ɔ mi ɔ

¹ Nyumu ɔ ngɔ mi kɛ ba Yawɛ we ɔ agbo ɔ nya ekohu. Nyu hia kɛ je kpoku ɔ sisi, nɛ e be kɛ yaa beleku je, he nɛ Yawɛ we ɔ plɛ e hɛ mi kɛ kpee ɔ. Nyu ɔ hia kɛ je we ɔ leneyi je kɛ ya be ngɛ bɔ sami la tɛ ɔ leneyi je.

² Jehanɛ nyumu ɔ kɛ mi gu omleyi je agbo ɔ mi kɛ je kpo kɛ lɔgɔ si kɛ ba agbo ɔ nɛ hɛ mi kpee beleku je ɔ nya. Nyu ɔ ngɛ kpo jee ngɛ agbo ɔ leneyi je kɛ ngɛ bee kaa pa wayoo ko.

³ Nyumu ɔ ngɔ e nɔ́ susumi kpa a kɛ susu pa a gugue lafa enyɔ kɛ nyingmi enuɔ kɛ ya beleku je, nɛ e ha i nyɛɛ e se kɛ sɛ pa a mi ngɛ lejɛ ɔ. Nyu ɔ ba ta ye nane kpɔ mi.

⁴ E susu gugue lafa enyɔ kɛ nyingmi enuɔ kɛ tsa nɔ, nɛ nyu ɔ ba ta ye nakutso nya ngɛ he nɛ wa su ɔ. E susu gugue lafa enyɔ kɛ nyingmi enuɔ ekohu. He nɛ wa su ɔ, nyu ɔ ba ta ye mlɛ mi.

⁵ Kɛkɛ nɛ e susu gugue lafa enyɔ kɛ nyingmi enuɔ ekohu. Jehanɛ pa a mi kuɔ ngɛ lejɛ ɔ, nɛ i nyɛ we ma ya hɛ mi. Pa a mi kuɔ tsɔ, ja a sile kɛ po.

⁶ Kɛkɛ nɛ e de mi ke, “Nɔmlɔ adesa, to nɔ́ nɛ ɔ he hɛ saminya!” Jehanɛ, nyumu ɔ kɛ mi nyɛɛ pa a tue kɛ kpale kɛ ba.

⁷ I na kaa jehanɛ tsohi babauu nitsɛ maa si ngɛ pa a nya hiɛ kɛ hiɛ tsuo.

⁸ E de mi ke, “Nyu nɛ ɔ bee ngɛ zugba a mi kɛ yaa beleku je, kɛ yaa Yordan kɔ̃ ɔ mi, nɛ e ya sɛɛ Ngo wo ɔ mi. Nyu nɛ ɔ tsakeɔ wo nyu ɔ kɛ peeɔ nyu mua.

⁹ He tsuaa he nɛ pa nɛ ɔ maa be ngɛ ɔ, lohwe nane eywiɛɛywiɛtsɛmɛ slɔɔtoslɔɔtohi maa bɔ ngɛ lejɛ ɔ, nɛ a ma na pa mi lo babauu. Ke e ya sɛ Ngo wo ɔ mi ɔ, Ngo wo ɔ ma plɛ pee nyu mua, nɛ wami he maa ba he tsuaa he nɛ pa nɛ ɔ maa be ngɛ ɔ.

¹⁰ Kɛ je Engedi pa a nya kɛ yaa si Eneglaim pa a nya tsuo ma hyi kɛ wo hɛli nɛ a ngɛ a yahi kae ngɛ wo ɔ nya. A maa gbe lo slɔɔtoslɔɔtohi babauu ngɛ pa amɛ a mi kaa bɔ nɛ a naa ngɛ Mediterenia wo ɔ nitsɛ mi ɔ.

¹¹ Se taku ɔmɛ, kɛ mɔsɔ ɔmɛ lɛɛ a be tsakee; a maa nɔ ngo.

¹² Tso slɔɔtoslɔɔtohi maa bɔ ngɛ pa a nya hiɛ kɛ pa a se tsuo. Tso ba amɛ be nglae, nɛ a yiblii ɔmɛ hu be tae. Nyɔhiɔ tsuaa nyɔhiɔ ɔ, a maa wo yiblii he; ejakaa nyu nɛ a naa a, Yawɛ we ɔ mi a naa kɛ jeɔ. Tso ɔmɛ ma ha niye ní babauu, nɛ a ba amɛ ma ba pee tsopa nɛ a kɛ ma tsa ma a.”

Zugba a huzu ɔmɛ

¹³ Nyɔmtsɛ Yawɛ ke, “Nyɛɛ wo huzu nɛ ɔmɛ ha Israel wɛtso nyɔngma kɛ enyɔ ɔmɛ. Ke nyɛ maa dla zugba a mi kɛ ha mɛ ɔ, Yosef ma na ngwɔhe enyɔ.

¹⁴ I wo nyɛ nɛmɛ ɔmɛ si ke ma ngɔ zugba nɛ ɔ kɛ ha mɛ, lɔ ɔ he ɔ, nyɛɛ dla lɛ pɛpɛɛpɛ ha nyɛ he, nɛ e pee nyɛ weto ní.

¹⁵ “Zugba a we omleyi je huzu ɔ je Mediterenia wo ɔ nya kɛ ya gu Hetlon blɔ kɛ ya gu Hamat yo kpɛ blɔ ɔ, kɛ muɔ Zedad,

¹⁶ kɛ ya na Berota kɛ Sibraim ma amɛ nɛ ngɛ Damasko kɛ Hamat huzu ɔmɛ a kpɛti ɔ, kɛ ya na Tikon nɛ ngɛ Hauran huzu ɔ nya a.

¹⁷ Huzu nɛ ngɛ omleyi je ɔ ji kɛ je Mediterenia wo ɔ nya kɛ ya na Enon ma a ngɛ Damasko huzu ɔ nya, nɛ e be lejɛ ɔ he kɛ ya gu omleyi je kɛ ya muɔ Hamat huzu ɔ.

¹⁸ “Beleku je huzu ɔ je Hauran kɛ Damasko a kpɛti, kɛ Gilead kɛ Israel zugba a hu a kpɛti ngɛ Yordan pa a he kɛ ya su Tamar tɔɔ ngɛ Ngo wo ɔ nya.

¹⁹ “Leneyi je huzu ɔ je Tamar, kɛ gu Kadesh Meriba nyu ɔmɛ a he kɛ ya muɔ Egipt huzu ɔ, kɛ ya pi Mediterenia wo ɔ.

²⁰ “Bonyoku je huzu ɔ je Mediterenia wo ɔ nya hluu kɛ ya su Hamat yo kpɛ blɔ ɔ he.

²¹ “Nyɛɛ dla zugba nɛ ɔ ha nyɛ he ngɛ Israel wɛtso ɔmɛ a nya.

²² Á po zugba ha nyɛ wɛtso ɔmɛ, Israel fɔfɔɛ ɔmɛ, nyɛ nibwɔhi nɛ ba to nyɛ ɔ, kɛ a bimɛ tsuo nɛ ba pee Israel bi ɔ. A hyɛ, konɛ nɔ tsuaa nɔ nɛ na e blɔ nya pɛpɛɛpɛ kaa Israel fɔfɔɛ.

²³ Wɛtso mi he nɛ nubwɔ ko ba to ɔ, a ha lɛ weto ní ngɛ lejɛ ɔ. Imi, Nyɔmtsɛ Yawɛ lɛ i de.”