Ezekiel 45 - BAIBLO ALOO NGMAMI KLƆUKLƆU Ɔ

Zugba a fa nɛ ji Yawɛ nɔ́ ɔ

¹ Ke nyɛ ngɛ zugba a mi dlae kɛ ha Israel wɛtso ɔmɛ, nɛ́ e pee a weto ní ɔ, nyɛ susu fa ko, nɛ nyɛɛ gbaa nɔ kɛ ha Yawɛ. Zugba nɛ ɔ kami nɛ pee si tomi kpaanyɔ kɛ fa, nɛ e blimi hu nɛ pee si tomi ekpa kɛ fa. Lejɛ ɔ zugba a tsuo nɛ pee klɔuklɔu.

² Zugba a he nɛ Yawɛ we ɔ maa hi ɔ, e kami nɛ e pee gugue lafa kɛ nyingmi enyɔ kɛ enuɔ, kɛ e blimi hu ja nɔuu. Zugba nɛ fɔɔ si gu gugue nyɔngma kɛ enyɔ kɛ fa nɛ bɔle we ɔ kɛ kpe.

³ Zugba nɛ ɔ mi fa nɛ e kami ji si tomi kpaanyɔ kɛ fa, nɛ e blimi ji si tomi etɛ kɛ fa maa pee he nɛ he klɔuklɔu pe kulaa maa hi.

⁴ He klɔuklɔu nɛ ɔ, a kɛ ha osɔfo ɔmɛ nɛ sɔmɔɔ ngɛ Yawɛ we ɔ. Hiɛmɛ nɛ ɔ nɛ a maa ma a wehi, kɛ Yawɛ we ɔ nitsɛ ngɛ.

⁵ Zugba a fa nɛ piɛ nɛ e kami ji si tomi kpaanyɔ kɛ fa, kɛ e blimi si tomi etɛ kɛ fa a maa pee Levi bi ɔmɛ nɛ sɔmɔɔ ngɛ Yawɛ we ɔ a hi he. A maa po mahi ha mɛ ngɛ lejɛ ɔ.

⁶ Jehanɛ, ngɛ zugba klɔuklɔu nɛ ɔ hanɔ ɔ, nyɛɛ po zugba kpa nɛ maa pee Israel wɛtso ɔmɛ tsuo a nɔ́, nɛ a maa po mahi ngɛ nɔ. Zugba nɛ ɔ kami nɛ pee si tomi kpaanyɔ kɛ fa, kɛ e blimi si tomi kake kɛ fa kɛ e se nyafii ko.

Zugba nɛ á ha ganɔ nɛ ngɛ ma a nɔ yee ɔ

⁷ Nyɛ ha ganɔ nɛ ngɛ ma a nɔ yee ɔ zugba a eko. Nyɛ ha lɛ kɛ je zugba klɔuklɔu ɔ bonyoku je huzu ɔ nya, nɛ e tsa nɔ hluu kɛ ya bonyoku je ngɛ Mediterenia wo ɔ nya. Ngɛ beleku je ɔ, huzu ɔ ya su zugba a tsuo beleku je huzu ɔ nyagbe he. Zugba nɛ ɔ kami, kɛ nɔ́ nɛ a ha Israel wɛtso ɔmɛ ɔ kami nɛ sɔ pɛpɛɛpɛ.

⁸ Zugba nɛ ganɔ nɛ ngɛ ma a nɔ yee ɔ ma na ngɛ Israel bi ɔmɛ a kpɛti ji nɛ ɔ nɛ. Ke nyɛ pee ja a, ganɔ ɔmɛ be ye ma a blɔ nya ní kpɔe ngɛ a dɛ, se mohu a maa dla zugba a mi kɛ ha wɛtso ɔmɛ pɛpɛɛpɛ.

Mlaahi nɛ a wo ganɔ nɛ ngɛ ma a nɔ yee ɔ

⁹ Yawɛ ke, “Nyɛ Israel ganɔhi, e hiɛ oo e hiɛ! Nyɛ kpa amimi kɛ awi yemi! Nyɛɛ ye dami sane, nɛ nyɛɛ pee nɔ́ nɛ da. Nyɛ ko fie ye ma a kɛ je a zugba nɔ hu. Imi, Nyɔmtsɛ Yawɛ lɛ i de.

¹⁰ “Nyɛɛ ngɔ sɛnihi nɛ hi, kɛ susumi níhi nɛ da kɛ tsu ní.

¹¹ “Susumi nɔ́ nɛ a tsɛɛ ke efa, kɛ susumi nɔ́ nɛ a tsɛɛ ke bat ɔ, nyɛ ha nɛ a sɔ fiee; bat ɔ nyɔngma lɛ peeɔ susumi nɔ́ nɛ a tsɛɛ ke homer ɔ kake; jã kɛ̃ efa a hu nyɔngma lɛ peeɔ homer kake. Homer nɔ nyɛɛ da kɛ susu níhi.

¹² “Bɔ nɛ nyɛ níhi a ngmɛmi blɔ nya tomi ngɛ ha ji nɛ ɔ nɛ: Sɛni tɛ nɛ a tsɛɛ gera a nyingmi enyɔ lɛ peeɔ shekel kake. Shekel nyingmi ekpa lɛ peeɔ mina kake.

^13-15 “Nyɛɛ ngɔ bɔ nɛ ɔmɛ kɛ ba ha ganɔ nɛ ngɛ ma a nɔ yee ɔ: Ngma nɛ nyɛ naa ngɛ ní kpami mi ɔ mi dlami nyingmi ekpa mi kake. Akoko nɛ nyɛ naa ngɛ ní kpami mi ɔ mi dlami nyingmi ekpa mi kake. Oliv nu nɛ nyɛ naa ngɛ tso ɔmɛ a nɔ ɔ mi dlami lafa mi kake. Nyɛɛ ngɔ susumi nɔ́ nɛ a tsɛɛ ke bat ɔ kɛ susu nu ɔ. Bat nyɔngma peeɔ kor kake. Tohi nɛ nyɛ ngɛ lɛe ɔ, nɔ́ nɛ wo zɔ kake ngɛ lafa enyɔ mi. “Nyɛɛ ngɔ niye ní bɔhi, sami bɔhi, kɛ tue mi jɔmi bɔhi kɛ ba, konɛ a ngɔ nyɛ he yayami ɔmɛ kɛ pa nyɛ. Imi, Nyɔmtsɛ Yawɛ lɛ i de.

¹⁶ “Ma a tsuo nɛ ngɔ bɔ nɛ ɔmɛ kɛ ba ha ganɔ ɔ nɛ ngɛ Israel ma a nɔ yee ɔ.

¹⁷ Sami bɔ ɔmɛ, niye ní bɔ ɔmɛ, kɛ wai bɔ ɔmɛ nɛ a kɛ baa Nyɔhiɔhe nyami be, Hejɔɔmi ligbi, kɛ nyami be kpa amɛ tsuo nɛ Israel bi ɔmɛ yeɔ ɔ, ganɔ ɔ blɔ nya ji kaa e ha mɛ. Lɛ nɔuu lɛ e haa bɔ nɛ ɔmɛ nɛ a kɛ peeɔ kusumi kɛ kpataa Yawɛ kɛ haa Israel ma a: yayami pami bɔ, niye ní bɔ, sami bɔ, kɛ tue mi jɔmi bɔ.”

Nyami behi

¹⁸ Nyɔmtsɛ Yawɛ ke, “Kekleekle nyɔhiɔ ɔ we kekleekle ligbi ɔ, ngɔɔ na niheyo nɛ kpa ko be e he nɛ o kɛ tsukɔ Yawɛ we ɔ he.

¹⁹ Osɔfo ɔ nɛ ngɔ lohwe nɛ a kɛ maa pee kusumi kɛ kpa musu ɔ muɔ ɔ eko, nɛ e kɛ kpa we ɔ sinya tso ɔmɛ, bɔ sami la tɛ ɔ sisi kɔ nya eywiɛ ɔmɛ, kɛ we ɔ mi je kue ɔ agbo ɔ sinya tso ɔmɛ a he.

²⁰ Nyɔhiɔ ɔ we ligbi kpaago ɔ, pee jã kɛ̃ kɛ ha nɔ nɛ li e he be nɛ e tɔ̃, kɛ nɔ nɛ li kaa nɔ́ nɛ e pee ɔ peeɔ tɔmi ɔ. Blɔ nɔ nɛ o maa gu kɛ pee Yawɛ we ɔ klɔuklɔu ji nɛ ɔ nɛ.

²¹ “Kekleekle nyɔhiɔ ɔ we ligbi nyɔngma kɛ eywiɛne ɔ, nyɛ bɔni Hetsɔmi nyami be ɔ yemi. Nyɛɛ ye abolo kplolo ligbi kpaago.

²² Kekleekle ligbi ɔ, ganɔ ɔ nɛ ngɛ ma a nɔ yee ɔ nɛ ngɔ na ku nɛ e kɛ sã yayami pami bɔ kɛ ha lɛ nitsɛ e he, kɛ ma a tsuo.

²³ Ligbi kpaago ɔmɛ tsuo nɛ a ngɛ nyami be ɔ yee ɔ, daa ligbi ɔ, e ngɔ na ku kpaago, kɛ agbosu kpaago nɛ kpa ko be a he kɛ ba ha Yawɛ, nɛ e kɛ sã bɔ nɛ a sãã lohwe ɔ tsuo. E ngɔ to akpakpo kake hulɔ kɛ sã yayami pami bɔ daa ligbi.

²⁴ E ngɔ niye ní bɔ kɛ piɛ lohwe ɔmɛ a he: na ku kake ɔ, e ngɔ blɛfo lita nyɔngma kɛ kpaago kɛ fa, kɛ oliv nu lita etɛ, nɛ agbosu kake ɔ hu e ngɔ blɛfo lita nyɔngma kɛ kpaago kɛ fa, kɛ oliv nu lita etɛ ja nɔuu.

²⁵ “A je Gbasisihimi nyami be ɔ yemi sisi kɛ je nyɔhiɔ kpaago ɔ we ligbi nyɔngma kɛ enuɔne ɔ. Ke be ɔ su ɔ, ganɔ ɔ nɛ ngɛ ma a nɔ yee ɔ maa sã jamɛ a bɔ ɔmɛ nɔuu daa ligbi otsi ɔ mi tsuo. A maa sã lohwe ɔ tsuo kɛ ha yayami pami; nɛ a kɛ blɛfo, kɛ oliv nu maa piɛ he.”