Ezekiel 42 - BAIBLO ALOO NGMAMI KLƆUKLƆU Ɔ

Tsu enyɔ komɛ ngɛ Yawɛ we ɔ kasa nya

¹ Jehanɛ nyumu ɔ kɛ mi je kpo kɛ ba agbo nya kue ɔ he ngɛ Yawɛ we ɔ we omleyi je. Lejɛ ɔ kɛ tsu ɔ nɛ ngɛ we ɔ bonyoku je ɔ he kɛ we.

² Kue nɛ ngɛ omleyi je nɛ ɔ kami ji gugue nyingmi enyɔ kɛ enuɔ, nɛ e blimi ji gugue nyɔngma kɛ enyɔ kɛ fa.

³ Blɔ nɛ ngɛ tsu nɛ ɔ, kɛ kpo ɔ nɔ je nɔ́ ɔ a kpɛti ji gugue enuɔ, nɛ tsu ɔmɛ ngɛ a sibi a hanɔ. A ka tɛ ngɛ lejɛ ɔ zugba a. Agbo nya tsu nɛ ɔ, a ma lɛ siaudo etɛ, nɛ ablanaa ngɛ eko tsuaa eko hɛ mi.

⁴ Blɔ nɛ ngɛ omleyi je ɔ blimi ji gugue enyɔ kɛ fa, nɛ e kami ji gugue nyingmi enyɔ kɛ enuɔ kɛ ya na sinya nɛ ngɛ lejɛ ɔ.

⁵ Yiti tsu ɔmɛ a mi bli we kulaa; ejakaa ablanaa amɛ hé a blɔ he ɔmɛ pe sisi ní ɔmɛ, kɛ kpɛti ní ɔmɛ.

⁶ Tsuhi nɛ ngɛ hiɛ ɔ, a ma mɛ siaudo etɛ, se a be titimahi kaa bɔ nɛ kpo nɔ je tsu ɔmɛ a titima amɛ ngɛ ɔ. Lɔ ɔ he ɔ, tsuhi nɛ ngɛ kpɛti siaudo ɔ nɔ ɔ ya pee wayowayo pe sisi tsu ɔmɛ, nɛ tsuhi nɛ ngɛ siaudo enyɔne ɔ nɔ ɔ hu ya pee wayowayo pe kpɛti ní ɔmɛ.

^7-8 Tsu ɔ kami mi fa nɛ ji gugue nyɔngma kɛ enyɔ kɛ fa ngɛ zugba mi ɔ, gbogbo sɔuu kɛ ya pue; gugue nyɔngma kɛ enyɔ kɛ fa nɛ piɛ ɔ lɛɛ tsuhi ngɛ lejɛ ɔ. Tsuhi ngɛ yi mi siaudo ɔ tsuo nɔ kɛ ya su nyagbe ɔ.

^9-10 Tsu nɛ ɔmɛ a sisi kɛ yaa beleku je, he nɛ a fia gbogbo ɔ kɛ je ɔ, blɔ ngɛ lejɛ ɔ kɛ yaa kpo nɔ je kue ɔ mi. Tsu kpa ko nɛ je nɔ́ nɛ ngɛ Yawɛ we ɔ beleku je ɔ ngɛ Yawɛ we ɔ leneyi je, nɛ e kɛ enɛ ɔ he kɛ we kulaa.

¹¹ Blɔ ngɛ tsu nɛ ɔmɛ a hɛ mi kaa nɔ́ nɛ ngɛ omleyi je ɔ. E kami kɛ e blimi kɛ hehi nɛ a guu kɛ sɛɛ mi ɔ ngɛ kaa kaketsɛ ɔ nɔuu.

¹² Sinya ko ngɛ tsu ɔmɛ a sisi kɛ yaa beleku je, he nɛ a fia gbogbo ɔ kɛ je ɔ.

¹³ Kɛkɛ nɛ nyumu ɔ de mi ke, “Tsu enyɔ nɛ ɔmɛ ngɛ klɔuklɔu. Osɔfohi nɛ baa Yawɛ we ɔ, tsu nɛ ɔmɛ a mi a yeɔ bɔ klɔuklɔu pe kulaa a ngɛ. Tsu nɛ ɔmɛ ngɛ klɔuklɔu, nɛ a mi nɛ osɔfo ɔmɛ toɔ bɔ klɔuklɔu pe kulaa nɛ ɔmɛ ngɛ: niye ní bɔ, yayami pami bɔ, kɛ fɔ yemi bɔ.

¹⁴ Ke osɔfo ɔmɛ sɛ he klɔuklɔu ɔ, a be kpo jee kɛ ya kpo nɔ je kue ɔ mi; mohu a ma je a tade ɔmɛ nɛ a kɛ sɔmɔ ɔ kɛ pue si, ejakaa tade ɔmɛ ngɛ klɔuklɔu. A maa wo tade kpahi loko a maa je kpo kɛ ya he nɛ ma a ngɛ ɔ.”

A susu Yawɛ we ɔ

¹⁵ Benɛ nyumu ɔ susu Yawɛ we ɔ mi ta a, e kɛ mi je kpo kɛ gu agbo nɛ ngɛ beleku je ɔ mi kɛ ba kpo ɔ nɔ; nɛ e ba susu lejɛ ɔ hulɔ.

¹⁶ E ngɔ e tso ɔ kɛ susu kpo ɔ nɔ tsuo kɛ kpe. E ná gugue lafa kɛ nyingmi enyɔ kɛ enuɔ ngɛ beleku je ɔ.

^17-20 Jehanɛ e susu omleyi je, leneyi je, kɛ bonyoku je tsuo; lɛ tsuo sɔ fiee, gugue lafa kɛ nyingmi enyɔ kɛ enuɔ. Gbogbo po he klɔuklɔu ɔ, kɛ he nɛ ji nihi tsuo a nɔ́ ɔ a kpɛti.