Ezekiel 41 - BAIBLO ALOO NGMAMI KLƆUKLƆU Ɔ

He klɔuklɔu pe kulaa a

¹ Pee se ɔ, nyumu ɔ kɛ mi ba Yawɛ we ɔ mi nitsɛ. E susu sinya a nya titima a; kɛ je hiɛ kɛ yaa a, peeɔ gugue kake kɛ fa, nɛ kɛ je hiɛ kɛ yaa hu peeɔ gugue kake kɛ fa; ja nɔuu bo tsu mi blimi peeɔ.

² Sinya a nya peeɔ gugue enyɔ kɛ fa, nɛ sinya a blimi peeɔ gugue kake kɛ nine mi blimi kake ngɛ hiɔ nɔ; nɛ muɔ nɔ hu ja nɔuu. E susu tsu ɔ nitsɛ hulɔ; e kami ji gugue nyɔngma, nɛ e blimi ji gugue enuɔ.

³ Lɔ ɔ se ɔ, e sɛ tsu ɔ mi, nɛ e ya susu ní nɛ ɔmɛ: titima a ngɛ gugue fa; sinya a peeɔ gugue kake kɛ fa; nɛ sinya a blimi peeɔ gugue kake kɛ fa kɛ nine mi blimi enyɔ.

⁴ Jehanɛ e susu tsu ɔ mi nitsɛ. E ná gugue enuɔ ngɛ tsu ɔ kasa kake, nɛ e ná ja nɔuu ngɛ kasa kpa amɛ tsuo. Tsu nɛ ɔ ngɛ kpɛtikpɛti tsu ɔ se. Kɛkɛ nɛ e de mi ke, “Hiɛmɛ nɛ ɔ ji he klɔuklɔu pe kulaa.”

Yawɛ we ɔ gbogbo ɔmɛ a he tsuhi

⁵ Jehanɛ nyumu ɔ susu Yawɛ we ɔ gbogbo ɔ timi; e na gugue kake kɛ fa. Tsu wawi nɛ eko tsuaa eko blimi ji gugue kake bɔle we ɔ kɛ kpe.

⁶ A ma tsu wawi nɛ ɔmɛ siaudo etɛɛtɛ; tsu ɔ eko ma eko yi mi, nɛ tsu nyingmi etɛ ngɛ siaudo tsuaa siaudo mi kɛ bɔle we ɔ kɛ kpe. A ma tsu ɔmɛ slɛnɛɛ kɛ wo gbogbo ɔ he kɛ kpla si, se a ma we we ɔ gbogbo ɔ nitsɛ nɔ.

⁷ Lɔ ɔ he ɔ, ke a ngɛ we ɔ gbogbo ɔ hyɛe ngɛ kpo nɔ je ɔ, e ngɛ kaa nɔ́ nɛ gbogbo ɔ timi sɔ kɛ je zugba kɛ ya su e yi mi, se tsu ɔmɛ a mi bli kaa bɔ nɛ níhi nɛ hɛɛ siaudo enyɔne kɛ etɛne ɔmɛ ngɛ ɔ; lɔ ɔ he ɔ, hiɔwe tsu ɔmɛ a mi bli pe sisi ní ɔmɛ. A kuɔɔ Yawɛ we ɔ gbogbo nɛ ngɛ kpo nɔ je ɔ he atlakpe kɛ guu tsu ɔmɛ a se kɛ yaa kekleekle siaudo ɔ, kɛ enyɔne ɔ a nɔ.

^8-11 Tsu wawi nɛ ɔmɛ nɛ ngɛ kpo nɔ je ɔ, eko tsuaa eko gbogbo timi ji gugue kake kɛ nine mi blimi enyɔ. A guu sinya ko nɛ ngɛ lejɛ ɔ mi kɛ yaa tsu ɔmɛ a mi ngɛ Yawɛ we ɔ we omleyi je, nɛ a guu kake hu mi kɛ yaa ní nɛmɛ nɛ ngɛ leneyi je ɔ a mi. I na kpoku ko nɛ e hiɔwe yami ji gugue kake kɛ nine mi blimi enyɔ kɛ bɔle Yawɛ we ɔ he tsuo kɛ kpe. E hiɔwe yami ji gugue kake kɛ fa; e yi mi ya ta tsu ɔmɛ nɛ ngɛ we ɔ gbogbo ɔmɛ a he ɔ a sisi tomi ɔ nɔ pɛpɛɛpɛ. He ko gbajaa ngɛ kpoku ɔmɛ, kɛ tsuhi nɛ osɔfo ɔmɛ hii mi ngɛ Yawɛ we ɔ kasa nya a a kpɛti; e kami ji gugue enuɔ.

Tsu nɛ ngɛ bonyoku je ɔ

¹² Tsu ko ngɛ Yawɛ we ɔ se ngɛ bonyoku je. Tsu nɛ ɔ kami ji gugue nyingmi enyɔ kɛ enyɔ kɛ fa; e blimi ji gugue nyɔngma kɛ kpaago kɛ fa, nɛ gbogbo nɛ bɔle lɛ kɛ kpe ɔ timi ji gugue kake kɛ nine mi blimi enyɔ.

Yawɛ we ɔ klemi

¹³ Jehanɛ nyumu ɔ susu Yawɛ we ɔ nitsɛ; e kami ji gugue nyingmi enyɔ kɛ enuɔ; tsu ɔ se, kɛ tsu ɔ, kɛ gbogbo ɔmɛ a kami tsuo peeɔ gugue nyingmi enyɔ kɛ enuɔ;

¹⁴ e blimi ngɛ beleku je kɛ kpo ɔ nɔ tsuo ji gugue nyingmi enyɔ kɛ enuɔ.

¹⁵ E susu tsu ɔ kami ngɛ bonyoku je, e susu e he ablanaa amɛ hiɛ kɛ hiɛ, nɛ e na gugue nyingmi enyɔ kɛ enuɔ. Yawɛ we ɔ kpɛti tsu ɔ, he klɔuklɔu ɔ, kɛ he klɔuklɔu pe kulaa a,

Yawɛ we ɔ he ní komɛ

¹⁶ a ka tso kɛ wo lɛ tsuo he kɛ je zugba kɛ ya ta saflɛ ɔmɛ a nya. Saflɛ ɔmɛ hu a ha a he.

¹⁷ A tɛni ní kɛ wo we ɔ mi gbogbo ɔmɛ a he kɛ ya si sinya a yi mi ngɛ tsu ɔ mi.

¹⁸ Tãhi, kɛ kerubhi sɔuu a tɛni, nɛ tã ngɛ kerub kɛ kerub a kpɛti kɛ bɔle tsu ɔ mi tsuo. Kerub tsuaa kerub ngɛ hɛ mi enyɔ.

¹⁹ Nɔmlɔ hɛ mi nɛ plɛ ngɔ kpee tã ji hɛ mi kake, kɛ jata hɛ mi nɛ plɛ ngɔ kpee tã ngɛ enyɔne ɔ. Kikɛ nɛ ɔ a tɛni ní ɔmɛ kɛ wo we ɔ gbogbo ɔ he tsuo kɛ kpe.

²⁰ A tɛni kerubhi, kɛ tãhi ngɛ gbogbo ɔ he kɛ je zugba kɛ ya ta sinya a yi mi.

²¹ A pee Yawɛ we ɔ he klɔuklɔu ɔ sinya tso ɔmɛ kɔ nya eywiɛɛywiɛ. Ngɛ he klɔuklɔu pe kulaa hɛ mi ɔ, nɔ́ ko maa si ngɛ lejɛ ɔ nɛ ngɛ kaa

Bɔ sami la tɛ nɛ a kɛ tso pee ɔ

²² bɔ sami la tɛ nɛ a kɛ tso pee. E hiɔwe yami ji gugue fa kɛ nine mi blimi enyɔ, nɛ e kami ji gugue fa, kɛ e blimi hu gugue fa. E kɔ nya amɛ, e nane ɔmɛ, kɛ e kasa nya amɛ tsuo tso a kɛ pee. Nyumu ɔ de mi ke, “Okplɔɔ nɛ maa Yawɛ hɛ mi ji nɛ ɔ nɛ.”

Sinya amɛ

²³ A guu sinya kake mi kɛ sɛɛ he klɔuklɔu ɔ, nɛ ngɛ tsu ɔ nyagbe ɔ, a guu sinya kpa mi kɛ sɛɛ he klɔuklɔu pe kulaa a.

²⁴ A pee sinya nɛ ɔmɛ blablɛ enyɔɔnyɔ; sinya amɛ eko tsuaa eko bliɔ ngɛ kpɛti.

²⁵ A tɛni kerubhi, kɛ tãhi ngɛ sinya amɛ a he ngɛ he klɔuklɔu ɔ kaa bɔ nɛ a pee ngɛ gbogbo ɔmɛ a he ɔ. A kɛ tso pee gba ngɛ kue ɔ hɛ mi ngɛ kpo nɔ je.

²⁶ Saflɛhi nɛ a pee puɔhi ngɛ a mi, nɛ a tɛni tãhi ngɛ a he ngɛ kue ɔ gbogbo ɔmɛ a he hiɛ kɛ hiɛ.