Ezekiel 4 - BAIBLO ALOO NGMAMI KLƆUKLƆU Ɔ

Ezekiel pee okadi kɛ tsɔɔ kaa a sa Yerusalem ma a yi

¹ Mawu de mi ke, “Nɔmlɔ adesa, yaa ngɔ bliikisi nɛ o kɛ fɔ o hɛ mi; nɛ o tɛni Yerusalem ma a ngɛ nɔ.

² Moo ma mɔ, nɛ o fia gbogbo kɛ kpoku kɛ wo he. Ngɔɔ ta buli kɛ gbogbo kuɔmi níhi kɛ bɔle lɛ kɛ kpe kɛ tsɔɔ kaa a sa ma a yi.

³ Ngɔɔ dade pɛtɛɛ ko nɛ o kɛ pee dade gbogbo ngɛ o kɛ ma a nyɛ kpɛti. Lɔ ɔ se ɔ, plɛ o hɛ mi kɛ kpee ma a. A sa ma a yi! Mo ji nɔ nɛ sa ma a yi ɔ nɛ. Enɛ ɔ maa pee okadi kɛ ha Israel ma a.

^4-5 “Jehanɛ, yaa hwɔ si ngɛ o muɔ nɔ. Ma ngɔ Israel ma a he yayami ɔmɛ ngɔ fɔ o nɔ. O maa tloo a he yayami ɔmɛ, nɛ o maa na nɔ́ ligbi lafa etɛ kɛ nyingmi nɛɛ ngɛ fɔ nɛ a ye ɔ he. Ligbi kake tue gblami daa si ha jeha kake nɔ́.

⁶ Ke o gbe enɛ ɔmɛ a nya a, kpale nɛ o hwɔ o hiɔ nɔ, nɛ o tloo Yuda ma a hu a he yayami ɔmɛ ligbi nyingmi eywiɛ. Ligbi kake tue gblami daa si ha jeha kake nɔ́.

⁷ “Ngɔɔ o hɛ mi kɛ ka Yerusalem ma a nɛ a sa yi ɔ. Je o nine kɛ tsɔɔ ma a. Gbaa kɛ si ma a.

⁸ Ma fi mo kpa, nɛ o be nyɛe ma plɛ o he kɛ je kasa hiɛ kɛ ya kasa hiɛ kɛ yaa su be nɛ o ma sa ma a yi kɛ gbe nya.

⁹ “Jehanɛ, ngɔɔ ngma, akoko, abɔtlamɔ, yɔ, blɛfo akoko, kɛ blɛfo kɛ wo nɔ́ kake mi, nɛ o kɛ pee abolo. Ligbi lafa etɛ kɛ nyingmi nɛɛ ɔ nɛ o maa hwɔ o muɔ kasa nɔ ɔ, nɔ́ nɛ o maa ye ji nɛ ɔ nɛ.

¹⁰ O niye ní nɛ o maa ye ligbi kake ɔ, e jiimi maa pee kilo mi dlami eywiɛ mi kake.

¹¹ Nyu nɛ o maa nu daa ligbi maa pee nyu kɔɔpoo enyɔ.

¹² O maa ngɔ nɔmlɔ fĩ kɛ slɛ la; o maa sã abolo ngɛ nɔ, nɛ o maa ye ngɛ ma hɛ mi.”

¹³ Yawɛ de mi ke, “Ja pɛpɛɛpɛ Israel bi ɔmɛ maa ye a niye ní nɛ a ble ɔ ngɛ je ma amɛ a kpɛti he nɛ ma fie mɛ kɛ maa ho ɔ.”

¹⁴ Kɛkɛ nɛ i de ke, “Kpaoo, Nyɔmtsɛ Yawɛ, i ble we ye he; kɛ je ye jokuɛwi a si hluu kɛ ba su be nɛ ɔ mi tsuo ɔ, nɔ́ ko nɛ lɛ nitsɛ e gbo, loo lohwe ko tsɔtslɔɔ mi ɔ, i yi hyɛ; jehanɛ hu, lo nɛ a hiɔ yɛ ye nya mi hyɛ.”

¹⁵ Se Mawu de mi ke, “Saminya! Ma ha o maa ngɔ na fĩ kɛ sã abolo ɔ, se pi nɔmlɔ fĩ.”

¹⁶ E de mi hu ke, “Nɔmlɔ adesa, ma ha nɛ niye ní he maa hia ngɛ Yerusalem. Niye ní nɛ ma mi bi ɔmɛ maa ye ɔ, a maa ngmɛ ngɛ sɛni tɛ nɔ, nɛ nyu nɛ a maa nu hu a ma susu ha mɛ. A he maa hia mɛ, nɛ a maa ye a tsui ngɛ nyu kɛ ngma he.

¹⁷ Ma ha a niye ní, kɛ nyu maa ta kulaa, nɛ a maa hi a sibi a hɛ mi hyɛe mɔbɔmɔbɔ. A tue gblami ɔ ma ha a maa ta he lo kanyakanya.”