Ezekiel 39 - BAIBLO ALOO NGMAMI KLƆUKLƆU Ɔ

A ye Gog nɔ

¹ Nyɔmtsɛ Yawɛ de mi ke, “Nɔmlɔ adesa, gbaa kɛ si Gog, ganɔ ngua nɛ yeɔ Meshek kɛ Tubal je ma amɛ a nɔ ɔ, nɛ o de lɛ ke, i kɛ lɛ ná.

² Ma dɔ e yi kɛ gu he kpa; ma ngɔ lɛ kɛ je tsitsaa omleyi je tɔɔ kɛ ba Israel yo ɔmɛ a nɔ.

³ Kɛkɛ ɔ, kɛ̃ɛ̃ nɛ ngɛ e muɔ nine mi ɔ, ma fia lɛ nɔ́ nɛ e nɔ zugba, nɛ kɛ̃ɛ̃ mi bihi nɛ ngɛ e hiɔ nine mi ɔ ma pue si.

⁴ Gog maa nɔ ta ngɛ Israel yo ɔmɛ a nɔ; e tabo ɔ, kɛ je ma amɛ nɛ piɛ e he ɔ tsuo a hɛ mi ma kpata. Ma ha a gbogboe ɔmɛ maa pee niye ní ha lohwe pɛlitsɛmɛ nɛ yeɔ lo, kɛ nga mi lohwe awi yeli tsuo.

⁵ A ma gbo kɛ pue nga kplanaa a nɔ. Imi, Nyɔmtsɛ Yawɛ lɛ i de.

⁶ Magog zugba a, kɛ wo nya ma amɛ nɛ a mi bi a tue mi jɔ mɛ ɔ, ma mɛ mɛ tsuo a he la; nɛ nɔ tsuaa nɔ ma na maa le kaa imi ji Yawɛ.

⁷ Ma ha ye ma Israel maa le ye biɛ klɔuklɔu ɔ; nɛ i be hae nɛ a ble ye biɛ nɛ he tsɔ ɔ hu. Kɛkɛ ɔ, je ma amɛ tsuo maa le kaa imi Yawɛ ji Israel Mawu Klɔuklɔu ɔ nɛ.”

⁸ Nyɔmtsɛ Yawɛ ke, “Ligbi ɔ nɛ i to ɔ ji kikɛmɛ a ligbi nɛ ɔ nɛ. Hyɛ, e maa ba kokooko.

⁹ Israel ma mi bi ɔmɛ maa je kpo, nɛ a ma ya mɛ ta hwumi ní ɔmɛ a he la. A maa sã a tsɛ̃i wawi, kɛ̃ɛ̃ mi bihi, akplɔhi, kɛ tso kpokuhi babauu nɛ he nyɛli ɔmɛ si ɔ. A kɛ maa pee lɛ́ nɛ a ma slɛ jeha kpaago sɔuu.

¹⁰ E be hiae kaa a ya lɛ lɛ́, loo a ya poo tso kɛ pee lɛ́. Ejakaa ta hwumi ní nɛ a bua nya a, a kɛ maa pee lɛ́ nɛ a ma slɛ. Nihi nɛ ha a níhi, nɛ a fia mɛ ojo ɔ, Israel bi ɔmɛ hu maa ha a níhi, nɛ a maa fia mɛ ojo ja nɔuu.” Nyɔmtsɛ Yawɛ lɛ de.

A maa pu Gog

¹¹ Yawɛ ke, “Ke ní nɛ ɔmɛ na ba mi ɔ, ma ha a maa pu Gog ngɛ Israel zugba a mi, ngɛ ‘Blɔ hiali a kɔ̃’ ɔ mi, ngɛ Ngo wo ɔ beleku je. A maa pu Gog kɛ e ta a tsuo ngɛ kɔ̃ ɔ mi, nɛ a maa wo lejɛ ɔ biɛ ke ‘Gog ta buli a kɔ̃.’

¹² Israel bi ɔmɛ maa ngɔ nyɔhiɔ kpaago kɛ pu gbogboe ɔmɛ tsuo, nɛ a kɛ maa tsu zugba a he ekohu.

¹³ Zugba a nɔ bi ɔmɛ tsuo ma bla kɛ pu mɛ. Ligbi ɔ nɛ a maa ye kunimi nɛ ɔ, a maa wo ye hɛ mi nyami. Imi, Nyɔmtsɛ Yawɛ lɛ i de.

¹⁴ Nyɔhiɔ kpaago ɔ se ɔ, a maa hla ni komɛ nɛ maa kpa zugba a nɔ kɛ ya kɛ ba, konɛ gbogboehi nɛ piɛ ngɛ zugba a nɔ ɔ, a pu mɛ, nɛ a tsu zugba a he.

¹⁵ Ke a ngɛ zugba a nɔ kpae, nɛ nɔ ko ya na wu ko ɔ, e pee okadi ngɛ wu ɔ he kɛ yaa si a maa ngɔ wu ɔ ya pu ngɛ Gog ta buli a kɔ̃ ɔ mi.

¹⁶ (Ma ko ngɛ lejɛ ɔ kasa nya nɛ a ngɔ tabo ɔ biɛ kɛ wo lɛ.) Bɔ nɛ a maa pee kɛ tsu zugba a he ji nɛ ɔ nɛ.”

¹⁷ Nyɔmtsɛ Yawɛ de mi ke, “Nɔmlɔ adesa, tsɛ lohwe pɛlitsɛmɛ ɔmɛ, kɛ lohwe nane eywiɛɛywiɛtsɛmɛ ɔmɛ kɛ je he tsuaa he nɛ a ngɛ ɔ kɛ ba nɛ a ba ye ní. Ma sã bɔ nguaa ko ngɛ Israel yo ɔmɛ a nɔ ha mɛ, konɛ a ye lo, nɛ a nu muɔ.

¹⁸ A maa ye katsɛmɛ ɔmɛ a lo, nɛ a maa nu zugba a nɔ ganɔ ɔmɛ a muɔ. Ni nɛ ɔmɛ tsuo ngɛ kaa Bashan agbosuhi, loo jijɔhi, loo akpakpohi, loo na kuhi nɛ wo zɔ.

¹⁹ Ke i gbe ni ɔmɛ kaa a gbeɔ lohwe kɛ sãã bɔ ɔ, a maa ye zɔ ɔ hluu kɛ yaa si e maa gbe a nya, nɛ a maa nu muɔ ɔ hluu kɛ yaa si a maa pee gbedee kaa nihi nɛ tɔ dã.

²⁰ Ma ngɔ okpɔngɔhi, ta zugba lɛhi, katsɛmɛ, kɛ ta buli slɔɔtoslɔɔto babauu kɛ ngmɛ mɛ okplɔɔ; a maa ye ní nɛ a maa tɔ saminya. Imi, Nyɔmtsɛ Yawɛ lɛ i de.”

Israel maa bɔ ekohu

²¹ Yawɛ ke, “Ma ha je ma amɛ maa na ye hɛ mi nyami ɔ; ma tsɔɔ mɛ bɔ nɛ i gblaa ni nɛmɛ nɛ peeɔ nɔ́ nɛ dɛ ɔ a tue wawɛɛ ha.

²² Nɛ kɛ je jamɛ a ligbi ɔ kɛ yaa a, Israel bi ɔmɛ maa le kaa imi ji Yawɛ, a Mawu ɔ nɛ.

²³ Je ma amɛ hu maa le kaa imi lɛ i ha Israel bi ɔmɛ ya hi ma se kaa nyɔguɛhi, ejakaa a pee yayami kɛ si mi. I kua mɛ, i ha a he nyɛli ba ye a nɔ ngɛ ta mi, nɛ a gbe mɛ.

²⁴ I kɛ mɛ to ní ngɛ mu ní tsumihi nɛ a tsu, kɛ yi wu tso níhi nɛ a pee ɔ a he; nɛ i kua mɛ.”

²⁵ Nyɔmtsɛ Yawɛ ke, “Jehanɛ lɛɛ, ma na Yakob nina a mɔbɔ; ma na Israel ma a tsuo mɔbɔ, nɛ ma ha a maa bɔ ekohu. Ma pee enɛ ɔ, konɛ a na kaa nɔ klɔuklɔu ji mi.

²⁶ Ke a kpale kɛ ba mɛ nitsɛmɛ a zugba a nɔ ngɛ tue mi jɔmi, kɛ he jɔmi mi, nɛ nɔ ko wui a he gbeye ɔ, a hɛ maa je nɔ kaa a pue a hɛ mi si, nɛ a tsɔ ye hɛ mi atuã.

²⁷ Bɔ nɛ pee nɛ je ma amɛ tsuo nɛ a le kaa i ngɛ klɔuklɔu ɔ, ma kpale ye ma a kɛ je a he nyɛli a zugba amɛ tsuo a nɔ kɛ ba.

²⁸ Kɛkɛ ɔ, ye ma a maa le kaa imi ji Yawɛ, a Mawu ɔ nɛ. A maa le enɛ ɔ; ejakaa imi nitsɛ lɛ i ha a ngɔ mɛ kɛ ho ma se ya kaa nyɔguɛhi ɔ nɛ. Se jehanɛ lɛɛ i bua a nya, nɛ i kpale mɛ kɛ ba mɛ nitsɛmɛ a zugba nɔ, nɛ e píɛ a ti nɔ ko nɔ ko ngɛ ma se.

²⁹ Ma ngɔ ye mumi kɛ pue Israel ma a nɔ, nɛ i be mɛ kuae hu. Imi, Nyɔmtsɛ Yawɛ lɛ i de.”