Ezekiel 38 - BAIBLO ALOO NGMAMI KLƆUKLƆU Ɔ

Gog maa pee kaa ní tsumi dade ngɛ Mawu dɛ mi

¹ Yawɛ kɛ mi tu munyu ekohu.

² E ke, “Nɔmlɔ adesa, gbaa kɛ si Gog, ganɔ ngua a nɛ ngɛ Meshek, kɛ Tubal ngɛ Magog zugba a nɔ ɔ. Gbaa kɛ si lɛ.

³ De lɛ ke imi Nyɔmtsɛ Yawɛ, i kɛ lɛ ná.

⁴ Ma mlɔɔ e hɛ mi, nɛ ma ngɔ gbowe kɛ wo e tsitsa mi. Ma gbla e tabo ɔ, e we okpɔngɔ ɔmɛ, kɛ okpɔngɔ ta buli babauu nɛ a mia kɛ ha ta a kɛ je. Ta bulɔ tsuaa ta bulɔ hɛɛ tsɛ̃i, nɛ e mia kɛ klaate.

⁵ Persia bi, Sudan bi, kɛ Libia bi piɛ a he. Ni nɛ ɔmɛ tsuo hɛɛ tsɛ̃i, nɛ a bu dade pɛɛ.

⁶ Ta buli tsuo nɛ ngɛ Gomer, kɛ Bet Toga ma zugba amɛ a nɔ ngɛ omleyi je piɛ e he. Je ma kpahi babauu hu piɛ e he ja nɔuu.

⁷ De lɛ ke e pee e tabo ɔ, kɛ nɔ́ tsuaa nɔ́ klaalo.

⁸ Jeha komɛ a se ɔ, ma ha e ma ya tua nihi ngɛ Israel yo ɔmɛ a nɔ. A kɛ ta kpata zugba nɛ ɔ hɛ mi be ko, nɛ a si lejɛ ɔ ngɔ fɔ si gu jeha babauu, se jehanɛ lɛɛ a bua nihi a nya ngɛ lejɛ ɔ ngɛ tue mi jɔmi mi.

⁹ E kɛ e tabo ɔ, kɛ je mahi babauu ma ba tua lejɛ ɔ kaa ahumi; a maa ha zugba a nɔ kaa bɔku.”

¹⁰ Bɔ nɛ Nyɔmtsɛ Yawɛ ngɛ Gog dee ji nɛ ɔ nɛ: “Ke jamɛ a be ɔ su ɔ, susumi slɔɔtoslɔɔtohi maa ba o yi mi, se ga yaya mohu o maa to.

¹¹ O ma de ke o ma ya tua ma ko nɛ e mi bi hii si kpoo ngɛ tue mi jɔmi, kɛ he jɔmi mi. Gbogbo be ma amɛ a he ɔ, agbo se lami dade ko hu be.

¹² O ma ya tua ma amɛ, nɛ o maa ha a mi ní. O ma ya tua ma doku ɔmɛ nɛ amlɔ nɛ ɔ lɛɛ a mi hyi kɛ nimli ɔ. O ma ya tua ni ɔmɛ nɛ a bua a nya kɛ je je ma amɛ a mi ɔ. Nimli nɛ ɔmɛ ngɛ na, to, kɛ weto ní babauu, nɛ a ngɛ he jɔmi mi ngɛ he nɛ je ɔ tsuo nya ba kpe ngɛ.

¹³ Sheba bi, Dedan bi, kɛ jua yeli nɛ je Spania ma ba bi ke, ‘O ma nɛ o ba fia wɔ ojo lo? Anɛ o bua o tabo ɔ nya kɛ ba nɛ o ba ha ní pani nya, nɛ o muɔ wa lohwehi, wa sika tsu, wa sika hiɔ, kɛ wa weto ní tsuo kɛ ho lo?’ ”

¹⁴ Lɔ ɔ he ɔ, Nyɔmtsɛ Yawɛ tsɔ mi ke ma ya de Gog ke, “Jehanɛ, benɛ ye ma Israel ngɛ tue mi jɔmi mi ɔ, o maa hia blɔ

¹⁵ kɛ je omleyi je tsitsaa he nɛ o ngɛ ɔ, kɛ o ta buli kpanakpanaa nɛ hi okpɔngɔhi a nɔ kɛ je je mahi babauu a mi kɛ ba.

¹⁶ O ma ba tua ye ma Israel ɔ kaa ahumi nɛ ngɛ fiae huu kɛ nyɛɛ zugba a nɔ tsuo. Ke be ɔ su ɔ, ma ha o ma ba tua ye zugba a nɔ bi ɔmɛ, bɔ nɛ pee nɛ je ma amɛ nɛ a na nɔ nɛ i ji, konɛ kɛ gu nɔ́ nɛ ma pee nɛ ɔ nɔ ɔ, a na kaa nɔ klɔuklɔu ji mi.

¹⁷ Nyɔmtsɛ Yawɛ ke blema lokoo nɛ i ha ye tsɔli, Israel gbali ɔmɛ gba jehahi babauu ke be ma nɛ ma ha nɔ ko ma ba ye ye ma Israel nɔ ɔ, anɛ mo o he i de ngɛ lo?”

Mawu maa gbla Gog tue

¹⁸ Nyɔmtsɛ Yawɛ ke, “Ligbi ɔ nɛ Gog ma ba tua Israel ɔ, ye mi mi ma fu wawɛɛ.

¹⁹ I ngɔ hunga, kɛ hɛdɔ kɛ ngɛ dee ke jamɛ a ligbi ɔ, Israel zugba a ma mimiɛ wawɛɛ.

²⁰ Pa mi lohi, hiɔwe lohwe pɛlitsɛmɛ, pu mi lohwe nane eywiɛɛywiɛtsɛmɛ kɛ sisali, kɛ nimli adesahi ngɛ zugba a nɔ tsuo maa pee yoyooyo ngɛ ye hɛ mi. Yohi maa hule kɛ pue si, tɛ sa nguanguahi maa nɔ si, nɛ gbogbo tsuaa gbogbo maa hule kɛ pue si.

²¹ Ma ngɔ haomi slɔɔtoslɔɔtohi babauu kɛ wo Gog he gbeye. Imi, Nyɔmtsɛ Yawɛ lɛ i de. A maa hwu ta gbeyegbeye ko ngɛ yo ɔmɛ a nɔ. Nimli maa hia klaate kɛ wo a sibi.

²² Ma ngɔ gbenɔ hiɔ, kɛ muɔ si puemi kɛ gbla Gog tue. Ma ha hiɔmi nɛ nya wa, kɛ gbiɛ ngo ngu maa nɛ wawɛɛ, nɛ la nɛ ngɛ tsoe gegeege maa je hiɔwe ma ba kpata e kɛ e ta a, kɛ je ma amɛ nɛ piɛ e he ɔ tsuo a hɛ mi.

²³ Ke e ba mi kikɛ nɛ ɔ, je ma amɛ tsuo maa na kaa i kle, nɛ i ngɛ klɔuklɔu. Kɛkɛ ɔ, a maa le jehanɛ kaa imi ji Yawɛ.”