Ezekiel 34 - BAIBLO ALOO NGMAMI KLƆUKLƆU Ɔ

Israel to hyɛli ɔmɛ

¹ Yawɛ kɛ mi tu munyu ekohu.

² E ke, “Nɔmlɔ adesa, gbaa kɛ si Israel nɔ yeli ɔmɛ. De mɛ ke bɔ nɛ imi Nyɔmtsɛ Yawɛ, i ngɛ mɛ dee ji nɛ ɔ nɛ. Musu tloo nyɛ Israel to hyɛli! Nyɛ nitsɛmɛ nyɛ he pɛ nyɛ ngɛ lɛe; nyɛ hyɛ we to ɔmɛ a nɔ! Anɛ pi to ɔmɛ mohu nɛ to hyɛlɔ hyɛɛ lo?

³ Se nyɛɛ lɛɛ nyɛ gbeɔ to nɛ wo zɔ ɔ nɛ nyɛ yeɔ; nyɛ ngɔɔ to he womi ɔ kɛ kpɛɔ tade nɛ nyɛ woɔ, se to ɔmɛ lɛɛ nyɛ ha we mɛ ní.

⁴ Ní nɛmɛ nɛ gbɔjɔ ɔ, nyɛ hyɛ we a nɔ bɔ nɛ sa; hiɔtsɛmɛ ɔmɛ ɔ, nyɛ tsa we mɛ; ní nɛmɛ nɛ plaa a, nyɛ fi we pa amɛ a nɔ ha mɛ; ní nɛmɛ nɛ tla blɔ ɔ, nyɛ ya kpakaa we mɛ; nɛ ní nɛmɛ nɛ laa a, nyɛ ya hla we mɛ. Se yi mi mohu nyɛ waa mɛ.

⁵ To hyɛlɔ ko be; lɔ ɔ he ɔ, to ɔmɛ gbɛ fĩa, nɛ lohwe awi yeli ya nuu mɛ nɛ a ye.

⁶ Lɔ ɔ he ɔ, ye to ɔmɛ wo lalaalo kɛ ya gu yo ɔmɛ, kɛ yokuhi nɛ ya hiɔwe tsuo a nɔ. A gbɛ mɛ fĩa je ɔ mi he tsuaa he. Nɔ ko nɔ ko be nɛ dii a se, loo e hlaa mɛ.

⁷ “Jehanɛ, nyɛ to hyɛli, nyɛɛ bu imi Yawɛ tue saminya.

⁸ Imi Nyɔmtsɛ Yawɛ, i ngɛ ye he kita kae, lɔ ɔ he ɔ, nyɛ ta tue. Nga mi lohwe awi yeli nuu ye to ɔmɛ, a gbe mɛ nɛ a ye nyamanyama, ejakaa to hyɛlɔ ko be; ye to hyɛli ɔmɛ dí to ɔmɛ a se. To hyɛli ɔmɛ ngɛ mɛ nitsɛmɛ a he lɛe; a hyɛ we to ɔmɛ a nɔ.

⁹ Lɔ ɔ he ɔ, nyɛ to hyɛli, nyɛɛ bu mi tue saminya.

¹⁰ Imi Nyɔmtsɛ Yawɛ, i ke i kɛ nyɛ ná. Ma kpɔ ye to ɔmɛ ngɛ nyɛ dɛ. I be hae nɛ nyɛɛ lɛ nyɛ nitsɛmɛ nyɛ he hu. Ma kpɔ ye to ɔmɛ kɛ je nyɛ dɛ; kɛkɛ ɔ, nyɛ be mɛ nae maa ye hu.

To hyɛlɔ kpakpa a

¹¹ “Imi Nyɔmtsɛ Yawɛ, i ngɛ nyɛ dee ke, imi nitsɛ ma hla ye to ɔmɛ a se blɔ, nɛ ma hyɛ a nɔ.

¹² Bɔ nɛ to hyɛlɔ hlaa e tohi nɛ gbɛ fĩa, nɛ e buaa a nya ekohu ɔ, jã ma hla ye to ɔmɛ a se blɔ. Ma kpaka mɛ kɛ je he tsuaa he nɛ a gbɛ fĩa ligbi ɔ nɛ jamɛ amanehlu kɔɔhiɔ yaya ba fia mɛ ɔ.

¹³ Ma je mɛ kɛ je je ma amɛ a kpɛti; ma bua a nya kɛ ba mɛ nitsɛmɛ a zugba a nɔ. Ma lɛ mɛ ngɛ yo ɔmɛ a nɔ, pa amɛ a he, kɛ he tsuaa he nɛ nga mumu ngɛ ngɛ Israel.

¹⁴ Ma ha nɛ a maa ye ní ngɛ tue mi jɔmi mi ngɛ yo ɔmɛ a nɔ, kɔ̃ ɔmɛ a mi, kɛ hehi tsuo nɛ nga mumu ngɛ ngɛ Israel zugba a nɔ.

¹⁵ Imi nitsɛ ma lɛ ye to ɔmɛ; nɛ ma ha mɛ he ko nɛ a maa jɔɔ a he ngɛ. Imi, Nyɔmtsɛ Yawɛ lɛ i de.

¹⁶ “Tohi nɛ laa a, ma ya hla mɛ; ní nɛmɛ nɛ tla blɔ ɔ, ma ya tsɔ́ mɛ kɛ ba; ní nɛmɛ nɛ plaa a, ma fi a pa amɛ a nɔ ha mɛ; hiɔtsɛmɛ ɔmɛ hu ma tsa mɛ. Se ní nɛmɛ nɛ wo zɔ, kɛ ní nɛmɛ nɛ ngɛ he wami saminya a, ma kpata a hɛ mi; ejakaa i yeɔ dami sane.

¹⁷ “Jehanɛ, nyɛ ye to kuu, bɔ nɛ imi Nyɔmtsɛ Yawɛ, i ngɛ nyɛ dee ji nɛ ɔ nɛ: Ma kojo jijɔ kake kɛ jijɔ kake a kpɛti; ma kojo akpakpo ɔmɛ kɛ agbosu ɔmɛ a kpɛti.

¹⁸ Nyɛ naa niye ní kpakpa nyɛ yeɔ. Anɛ lɔ ɔ pi ha nyɛ lo? Lɛɛ mɛni he je niye ní nɛ piɛ ngɛ nyɛ ní yemi he ɔ, nyɛ kpale ya naa nɔ nyamanyama a? Jehanɛ hu, nyɛ naa nyu nɛ mi tsɔ nɛ nyɛ nuɔ. Anɛ lɔ ɔ nɛ pi ha nyɛ he je nɛ nyɛ ngɔɔ nyɛ nane kɛ gbidiɔ nyu nɛ piɛ ɔ?

¹⁹ Anɛ e sa kaa ye to ɔmɛ nɛ a ye nɔ́ nɛ nyɛ naa nɔ ɔ, nɛ a nu nyu nɛ nyɛ gbidi ɔ lo?

²⁰ “Lɔ ɔ he ɔ, jehanɛ lɛɛ tohi nɛ wo zɔ, kɛ tohi nɛ tã he lo ɔ, imi Nyɔmtsɛ Yawɛ nitsɛ ma kojo a kpɛti.

²¹ Nyɛɛ lɛɛ nyɛ tsitsɛɛɔ to hiɔtsɛmɛ ɔmɛ, nɛ nyɛ hɛɛ mɛ koli kɛ jee to kuu ɔ he kɛ yaa se.

²² Se imi lɛɛ ma he ye to ɔmɛ a yi wami, nɛ i be blɔ ngmɛe nɛ nɔ ko nɛ wa mɛ yi mi hu. Ma kojo jijɔ kɛ jijɔ a kpɛti.

²³ Ma ngɔ to hyɛlɔ kake kɛ to a nya nɛ e hyɛ a nɔ. Lɛ ji ye tsɔlɔ David. E maa hyɛ a nɔ saminya.

²⁴ Imi Yawɛ, ma pee a Mawu, nɛ ye tsɔlɔ David maa ye ganɔ ha mɛ. Imi Yawɛ lɛ i de.

²⁵ I kɛ mɛ maa so tue mi jɔmi somi. Ma fie lohwe awi yeli tsuo kɛ je zugba a nɔ, konɛ a hi si ngɛ nga a nɔ ngɛ tue mi jɔmi mi, nɛ a hwɔ mahe fuaa.

²⁶ “Ma gbaa mɛ; nɛ ma ha a maa hi ye yo klɔuklɔu ɔ he tsuo kɛ kpe. Ma ha hiɔmi maa nɛ bɔ nɛ sa ngɛ e be mi ha mɛ. Ma gbaa mɛ kɛ hiɔmi babauu.

²⁷ Nga nɔ tso ɔmɛ maa wo yiblii, nɛ zugba a maa ba ní saminya; kɛkɛ ɔ, tue mi jɔmi maa ba zugba a nɔ. Ma kplɔ kɔsɔkɔsɔ ɔmɛ kɛ je a kuɛ mi, nɛ a ye a he kɛ je nyɔguɛ si himi mi. A ma ba hi mɛ nitsɛmɛ a zugba nɔ. Kɛkɛ ɔ, a maa le kaa imi ji Yawɛ.

²⁸ Je ma amɛ ba be mɛ haoe nɛ a ha a ní hu. Lohwe awi yeli ba be mɛ nue nɛ a ye hu. A maa hi si ngɛ tue mi jɔmi mi, nɛ nɔ ko nɔ ko be a he gbeye woe.

²⁹ Ma ngɔ zugba nɛ baa ní saminya kɛ ha mɛ; nɛ ma ha hwɔ se maa po kulaa ngɛ zugba a nɔ; kɛkɛ ɔ, je ma amɛ be a he guɛ gbee ngɛ je ɔ mi hu.

³⁰ A maa le kaa imi Yawɛ, a Mawu ɔ, i kɛ mɛ ngɛ. Nɛ mɛ Israel bi ɔ, ye ma ji mɛ. Nyɔmtsɛ Yawɛ lɛ de.

³¹ “Nyɛ ye ma, nyɛ ji ye tohi nɛ i ngɛ lɛe, nɛ imi ji nyɛ Mawu.” Nyɔmtsɛ Yawɛ lɛ de.