Ezekiel 32 - BAIBLO ALOO NGMAMI KLƆUKLƆU Ɔ

Egipt matsɛ ɔ ngɛ kaa nyaka

¹ Benɛ a nuu wɔ kɛ ho ma se ya a, jeha nyɔngma kɛ enyɔne ɔ we nyɔhiɔ nyɔngma kɛ enyɔ ɔ we kekleekle ligbi ɔ, Yawɛ kɛ mi tu munyu.

² E de ke, “Nɔmlɔ adesa, la hɛdo la nɛ o kɛ bɔ Egipt matsɛ ɔ kɔkɔ. Ngɔɔ ye sɛ gbi nɛ ɔ kɛ ha lɛ: O peeɔ o níhi kaa nɔ́ nɛ jata ji mo ngɛ je ma amɛ a kpɛti; se o ngɛ kaa nyaka nɛ ngɛ pa gudue mohu. O tuɔ kɛ sɛɛ o pa amɛ a mi tsulaoo; o kɛ o nane gbidii nyu ɔ kɛ puɛɔ pa amɛ.

³ Ke je ma amɛ ba bua a he nya babauu ɔ, imi Nyɔmtsɛ Yawɛ nitsɛ ma fɔ ye ya a kɛ pue o nɔ; e maa du mo, nɛ je ma amɛ maa gbla mo kɛ ba kpo.

⁴ Ma sake mo ngɔ fɔ zugba; nɛ lohwe pɛlitsɛmɛ, kɛ nga mi lohwehi tsuo ma ba ye mo.

⁵ Ma sake o gbogboe ɔmɛ kɛ pue yo ɔmɛ a nɔ, kɛ kɔ̃ ɔmɛ a mi.

⁶ O muɔ ma pue si ngɛ zugba kɛ maa su benɛ yo ɔmɛ a nɔ tsuo ma pee kpɔtɔɔ, nɛ nyu dɔ ɔmɛ ma hyi kɛ o muɔ.

⁷ Benɛ ma kpata o hɛ mi ɔ, ma tsi hiɔwe hɛ mi; dodoe ɔmɛ maa laa. Pu maa laa e hɛ mi ngɛ bɔku ɔmɛ a se; nɛ nyɔhiɔ be kpɛe hu.

⁸ Ma ha pu, nyɔhiɔ, kɛ dodoe ɔmɛ tsuo maa laa, nɛ diblii maa wo ngɛ je ɔ mi tsuo. Imi, Nyɔmtsɛ Yawɛ lɛ i de.

⁹ “Je mahi babauu, ngɛ zugbahi a nɔ he nɛ o li tete po, ke a nu bɔ nɛ i kpata o hɛ mi ɔ, a maa ye tsui.

¹⁰ Nɔ́ nɛ ma pee mo ɔ ma ha je mahi babauu a he mi maa po, nɛ sawale maa nu a matsɛmɛ ɔmɛ wawɛɛ. Bɔ nɛ ma fɔ ye klaate ɔ yami kɛ bami ngɛ a hɛ mi ɔ, ligbi ɔ nɛ o maa nɔ si ɔ, mɛ tsuo pɛpɛɛpɛ a he maa do blibliibli, kaa kikɛ nɛ ɔ mɛ hu a hɛ mi ma kpata lo?”

¹¹ Bɔ nɛ Nyɔmtsɛ Yawɛ ngɛ Egipt matsɛ ɔ dee ji nɛ ɔ nɛ: “Ma ha Babilonia matsɛ ɔ kɛ mo maa hwu ta.

¹² Ma ha o tabo kpekpemi ɔ maa nɔ ngɛ katsɛmɛ kpanakpanaa a klaate nya. O kɛ o ma a, kɛ nɔ́ tsuaa nɔ́ nɛ o ngɔɔ o hɛ kɛ fɔɔ nɔ ɔ nyɛ hɛ mi ma kpata.

¹³ Ma gbe o lohwe ɔmɛ tsuo ngɛ pa amɛ a tue, nɛ nane ko nane ko be pa a gbidie hu; nɔmlɔ jio, lohwe jio.

¹⁴ Jamɛ a be ɔ, ma ha o nyu ɔ hɛ mi ma tsɔ, nɛ pa amɛ maa be kaa nu. Imi Yawɛ lɛ i de.

¹⁵ Ke i kpata Egipt ma a, kɛ e mi níhi, kɛ nimli tsuo nɛ ngɛ lejɛ ɔ a hɛ mi kikɛ ɔ, kɛkɛ a maa le kaa imi ji Yawɛ.

¹⁶ Kɔkɔ nɛ a ngɛ mo bɔe nɛ ɔ ma ba pee kɔmɔ yemi la nɛ a ma la. Yihi nɛ ngɛ je ma amɛ a mi ma la la nɛ ɔ kɛ nyɛ ya ha Egipt kɛ Egipt bi tsuo. Imi, Nyɔmtsɛ Yawɛ lɛ i de.”

Gbeje

¹⁷ Benɛ a nuu wɔ kɛ ho ma se ya a, jeha nyɔngma kɛ enyɔne ɔ we kekleekle nyɔhiɔ ɔ we ligbi nyɔngma kɛ enuɔne ɔ, Yawɛ kɛ mi tu munyu.

¹⁸ E ke, “Nɔmlɔ adesa, ye kɔmɔ ha Egipt ma kpekpemi ɔ tsuo. Ngɔɔ a kɛ je ma amɛ nɛ a hɛ mi ngɛ nyami ɔ kɛ ya zugba a sisi tɔɔ kɛ ya piɛ nihi nɛ ngɛ gbeje ɔ a he.

¹⁹ De mɛ ke, “Pe nyɛ susuɔ kaa nyɛ he ngɛ fɛu pe nihi tsuo lo? Nyɛ ma ba be kɛ ho gbeje ya, nɛ nyɛɛ kɛ mɔmlɔtɔtsɛmɛ ma ya hi lejɛ ɔ.

²⁰ “Egipt bi ɔmɛ, kɛ nihi nɛ nɔ ngɛ ta mi ɔ a nyagbe maa ba si kake. Ta ma ba kpata mɛ tsuo a hɛ mi.

²¹ Katsɛmɛ kpanakpanaa, kɛ nihi nɛ piɛ Egipt tabo ɔ he kɛ hwu ta a ma he Egipt bi ɔmɛ atuu kɛ ngmlaa ngɛ gbeje ke, ‘Nihi nɛ li Mawu, nɛ a nɔ ngɛ ta mi ɔ ba su hiɛ ɔ. Mɛ ji nɛ ɔ nɛ!’

²² “Asiria ngɛ lejɛ ɔ, e ta buli nɛ nɔ ngɛ ta mi ɔ a gbogboe ɔmɛ hu ngɛ a yɔkɔ ɔmɛ a mi; a bɔle lɛ kɛ kpe.

²³ Yɔkɔ nɛ ɔmɛ ngɛ gbeje muɔ ɔ sisi tɔɔ. E ta buli ɔmɛ tsuo nɔ ngɛ ta mi; nɛ a yɔkɔ ɔmɛ bɔle e nɔ́ ɔ. Se be ko nɛ be ɔ, mɛ ji ni nɛmɛ nɛ wo nihi a he gbeye wawɛɛ ngɛ je ɔ mi.

²⁴ “Elam ngɛ lejɛ ɔ; e ta buli kpekpemi ɔ nɛ nɔ ngɛ ta a mi ɔ a gbogboe ɔmɛ hu ngɛ a yɔkɔ ɔmɛ a mi; a bɔle lɛ kɛ kpe. Nihi nɛ gbo ngɛ ta mi nɛ ɔ, mɛ tsuo a ho gbeje ya kɛ mɔmlɔtɔ. Benɛ a ngɛ wami mi ɔ, a wo nihi a he gbeye wawɛɛ, se jehanɛ lɛɛ a gbo kɛ fɔɔ si kɛ zo kpɔtɔɔ.

²⁵ Elam hwɔɔ si kɛ piɛ ni nɛmɛ nɛ nɔ ngɛ ta mi ɔ a he. E ta buli kpekpemi ɔ a yɔkɔ ɔmɛ bɔle lɛ kɛ kpe. Ni nɛmɛ nɛ gbo ngɛ ta mi nɛ ɔ, mɛ tsuo mɔmlɔtɔtsɛmɛ ji mɛ. Benɛ a ngɛ wami mi ɔ, a wo nihi a he gbeye wawɛɛ; se jehanɛ lɛɛ a gbo kɛ fɔɔ si kɛ zo kpɔtɔɔ.

²⁶ “Meshek kɛ Tubal tsuo ngɛ lejɛ ɔ, nɛ a ta buli ɔmɛ a yɔkɔ ɔmɛ bɔle mɛ kɛ kpe. Mɛ tsuo mɔmlɔtɔtsɛmɛ ji mɛ; a gbe mɛ ngɛ ta mi. Be ko ɔ, a wo je ɔ he gbeye wawɛɛ.

²⁷ A pu we mɛ kaa bɔ nɛ a puɔ katsɛmɛ blema a. Blema a, a puɔ katsɛ kaa nɔ ko nɛ mia e ta hwumi ní kɛ yaa gbeje: a ngɔɔ e klaate kɛ hɔɔ e yi sisi, nɛ a kɛ e tsɛ̃i haa e nɔmlɔ tso ɔ he. Katsɛmɛ nɛ a wo a hɛ mi nyami kikɛ nɛ ɔ ji nihi nɛ a he sawale nuɔ je ɔ nɛ.

²⁸ “Kikɛ nɛ ɔ pɛpɛɛpɛ a maa ku Egipt bi ɔmɛ a mi kɛ pue mɔmlɔtɔtsɛmɛ nɛ nɔ ngɛ ta mi ɔ a nɔ.

²⁹ “Edom kɛ e matsɛmɛ ɔmɛ, kɛ e ganɔ ɔmɛ tsuo ngɛ lejɛ ɔ. Be ko ɔ, ta buli katsɛmɛ ji mɛ; se jehanɛ lɛɛ a ngɛ gbeje, nɛ a kɛ mɔmlɔtɔtsɛmɛ nɛ nɔ ngɛ ta mi ɔ tsuo ngɛ he kake.

³⁰ “Omleyi je ganɔ ɔmɛ tsuo ngɛ lejɛ ɔ. Sidon bi ɔmɛ hu ngɛ lejɛ ɔ. Be ko ɔ, a he wami ɔ haa sawale nuɔ je ɔ tsuo; se jehanɛ lɛɛ a kɛ ni nɛmɛ nɛ nɔ ngɛ ta mi ɔ, zo gbe mɛ tsuo kpɔtɔɔ. Mɛ tsuo mɔmlɔtɔtsɛmɛ ji mɛ, nɛ a ya su gbeje muɔ voo ɔ sisi tɔɔ.

³¹ “Ke Egipt matsɛ ɔ kɛ e tabo ɔ na nihi babauu nɛ a gbe ngɛ ta a mi nɛ ɔ, a bua maa jɔ.” Nyɔmtsɛ Yawɛ lɛ de.

³² “Imi nitsɛ lɛ i ha Egipt matsɛ ɔ hao je ɔ nɛ; se lɛ nitsɛ kɛ e tabo ɔ tsuo a hɛ mi ma kpata, nɛ a maa pu mɛ, kɛ mɔmlɔtɔtsɛmɛ ɔmɛ nɛ a gbe ngɛ ta a mi ɔ.” Nyɔmtsɛ Yawɛ lɛ de.