Ezekiel 31 - BAIBLO ALOO NGMAMI KLƆUKLƆU Ɔ

Egipt ngɛ kaa seda tso

¹ Benɛ a nuu wɔ kɛ ho ma se ya a, jeha nyɔngma kɛ kakene ɔ we nyɔhiɔ etɛ ɔ we kekleekle ligbi ɔ, Yawɛ kɛ mi tu munyu.

² E de mi ke, “Nɔmlɔ adesa, de Egipt matsɛ ɔ, kɛ e ma kpekpemi ɔ tsuo ke: O he wa saminya! Mɛni he po ma ngɔ mo kɛ to?

³ O ngɛ kaa seda tso ko nɛ bɔ kusuu ngɛ Lebanon, e kɔni saminyawiiwi ɔmɛ pee hɔ; e ka gagaa kɛ su bɔku mi tɔɔ.

⁴ Nyu babaaba ngɛ lejɛ ɔ, kɛ zugba a mi tsuo; lɔ ɔ he ɔ, e na niye ní bɔ nɛ sa. Nyu ɔ ha tso kpa amɛ tsuo bɔ ngɛ lejɛ ɔ.

⁵ E na nyu babaaba, nɛ e bɔ saminya. E ka gagaa, nɛ e nɔ kuɔ gojoo pe tso kpa amɛ tsuo. E gba kɔnihi kusuu; a ti, nɛ a ka gagaaga.

⁶ Lohwe pɛlitsɛmɛ slɔɔtoslɔɔto ya pee a tsuhi ngɛ e kɔni nguangua amɛ a nɔ. Nga mi lohwehi tsuo ya fɔ a bimɛ ngɛ e kɔni wawi ɔmɛ a sisi, nɛ je ma nguanguahi tsuo ya hii si ngɛ e sisi hɔ̃ ɔ mi.

⁷ E he pee fɛu; e nɔ kuɔ gojoo, kɛ e kɔnihi gagaaga; ejakaa e sipoku na nyu babaaba kɛ je zu mi.

⁸ Mawu ngmɔ ɔ mi seda tso ɔmɛ po a he fɛu kɛ lɛ sɔɛ. Sɛsɛo ɔmɛ kɛ a kɔni nguangua amɛ hu kɛ lɛ sɔɛ. Papao ɔmɛ kɛ a kɔni wawi ɔmɛ na we lɛ kulaa. Niinɛ, e he fɛu ɔ nɔ be. Tso ko tso ko be Mawu ngmɔ ɔ mi nɛ a kɛ maa to e he.

⁹ I ha nɛ e pee fɛu saminya kɛ e kɔnihi babauu. Tsohi tsuo nɛ ngɛ Mawu ngmɔ ɔ mi ngɛ Eden ɔ, a hɛ kɔ e nɔ.

¹⁰ “Jehanɛ lɛɛ, jamɛ a tso ɔ nɛ bɔ kusuu, nɛ e nɔ kuɔ gojoo kɛ su bɔku mi tɔɔ ɔ, imi Nyɔmtsɛ Yawɛ nitsɛ ma tsɔɔ mo nɔ́ nɛ maa ba e nɔ. Akɛnɛ e nɔ kuɔ gojoo he je ɔ, e wo e he nɔ nɛ e fĩa;

¹¹ lɔ ɔ he ɔ, i kua lɛ. Ma ha nubwɔ ko nine maa su e nɔ. E kɛ lɛ maa ye sisiisi; e maa pee lɛ bɔ nɛ sa lɛ ngɛ yi wu tso níhi nɛ e pee ɔ a he.

¹² Nibwɔhi nɛ ji je ma amɛ a kpɛti yiwutsotsɛmɛ pe kulaa maa hɛ lɛ ngɔ fɔ si, nɛ a maa je e he ngɛ lejɛ ɔ. E kɔni wawi ɔmɛ ma ya pue yo ɔmɛ a nɔ, kɛ kɔ̃ ɔmɛ a mi; nɛ e kɔni agbo ɔmɛ maa ku kɛ pue nyu dɔ ɔmɛ a mi ngɛ zugba a nɔ tsuo. Je ma amɛ nɛ ngɛ e hɔ̃ ɔ mi ɔ maa je.

¹³ Lohwe pɛlitsɛmɛ ma ba ma tso nɛ a hɛ ngɔ fɔ si ɔ nɔ, nɛ pu mi lohwehi ma ba hi e kɔni ɔmɛ a nɔ.

¹⁴ Lɔ ɔ he ɔ, kɛ je mwɔnɛ ɔ kɛ yaa a, tso nɛ naa nyu saminya a ekoeko be kae kɛ ya hiɔwe ja hu, loo kaa e ma ha e yi mi ma ya su bɔku mi ploplooplo kikɛ nɛ ɔ. Mɛ tsuo a ma gbo kaa bɔ nɛ nɔmlɔ adesa gboɔ ɔ. Mɛ tsuo a ma ya piɛ nihi nɛ ho gbeje ya a a he.”

¹⁵ Bɔ nɛ Nyɔmtsɛ Yawɛ ngɛ dee ji, “Ligbi ɔ nɛ tso ɔ ma ya su gbeje ɔ, ma ha pahi nɛ ngɛ zugba a sisi ɔ maa ha e nɔ; a maa pee ja kɛ tsɔɔ kaa a ngɛ ya nyɛe ha lɛ. Ma tsi pa amɛ a nya nɛ a ko be hu, nɛ pa wawi, kɛ nyu dɔ ɔmɛ maa ta. Akɛnɛ tso ɔ gbo he je ɔ, ma ha diblii maa wo ngɛ Lebanon yo ɔmɛ a nɔ; pu mi tso ɔmɛ tsuo ma ngla.

¹⁶ Ma ha e maa nɔ si haa bum kɛ maa ya gbeje; nɛ je ma amɛ ma mimiɛ, ke a nu e si nɔmi ɔ. Eden ngmɔ ɔ mi tso ɔmɛ tsuo, kɛ Lebanon tsohi nɛ a je blɔ ha mɛ nyu saminya, nɛ mɛɛ lɛɛ a ho gbeje ya momo ɔ, a bua maa jɔ wawɛɛ kaa tso nɛ ɔ nɔ si.

¹⁷ A ma kpaka lɛ kɛ ho gbeje ya, konɛ e ya piɛ ni nɛmɛ nɛ nɔ momo ɔ a he. Nɛ mahi tsuo nɛ hi e hɔ̃ ɔ mi ɔ maa gbɛ fĩa je ɔ mi tsuo.

¹⁸ “Tso nɛ ɔ daa si ha Egipt matsɛ ɔ, kɛ e ma kpekpemi ɔ tsuo. Tsohi nɛ ngɛ Eden ngmɔ ɔ mi po ka we, nɛ a he hu pee we fɛu kaa tso nɛ ɔ. Se jehanɛ lɛɛ kaa bɔ nɛ Eden ngmɔ ɔ mi tso ɔmɛ ya su gbeje ɔ, lɛ hu e maa ya lejɛ ɔ, nɛ e ma ya piɛ nihi nɛ a pui mɛ, kɛ nihi nɛ nɔ ngɛ ta mi ɔ a he. Imi, Nyɔmtsɛ Yawɛ lɛ i de.”