Ezekiel 3 - BAIBLO ALOO NGMAMI KLƆUKLƆU Ɔ

¹ Mawu de mi ke, “Nɔmlɔ adesa, nɔ́ nɛ a kɛ ha mo ɔ, yé! Yé womi kpo nɛ ɔ, konɛ o kɛ Israel bi ɔmɛ nɛ ya tu munyu.”

² Kɛkɛ nɛ i pã ye nya mi, konɛ ma ye womi kpo ɔ nɛ e ngɔ kɛ ngɛ mi hae ɔ.

³ E de mi ke, “Nɔmlɔ adesa, yé womi kpo nɛ i ngɔ ha mo nɛ ɔ, nɛ o mi mi nɛ hyi tɔ.” I ye, nɛ e ngɔ ngɛ ye nya mi kaa hwo.

⁴ Jehanɛ Mawu de mi ke, “Nɔmlɔ adesa, yaa Israel bi ɔmɛ a ngɔ, nɛ nɔ́ tsuaa nɔ́ nɛ ma de mo ɔ, de mɛ.

⁵ Tsa pi nihi nɛ tuɔ gbi kpa nɛ sisi numi wa a ngɔ nɛ i ngɛ mo tsɔe, se mohu Israel ma a a ngɔ.

⁶ Ke ma nguahi nɛ tuɔ gbi kpahi nɛ wa, nɛ o nui a gbi ɔmɛ a ngɔ nɛ i ngɛ mo tsɔe ɔ, jinɛ mɛɛ lɛɛ a maa bu mo tue.

⁷ Se Israel ma a be suɔe kaa a maa bu mo tue, ejakaa imi tete po, a sume kaa a maa bu mi tue. Ma a tsuo pɛpɛɛpɛ a tue wa, nɛ a tsɔɔ atuã.

⁸ Lɔ ɔ he ɔ, ma ha o maa wa tue, nɛ o maa kplii o tsui kɛ wo mɛ ja nɔuu.

⁹ Ma ha nɛ o hɛ mi maa wa kaa tɛ nɛ he wa pe tslɛbo po. Koo ye mɛ gbeye, nɛ o tsui ko po ngɛ a hɛ mi; ejakaa mɛɛ lɛɛ atuã pɛ a tsɔɔ.”

¹⁰ Mawu de hu ke, “Nɔmlɔ adesa, ta tue saminya, konɛ o kai nɔ́ tsuaa nɔ́ nɛ ma de mo ɔ.

¹¹ Lɔ ɔ se ɔ, o ma mi bi ɔmɛ nɛ a nuu kɛ ho ma se ya a, yaa a ngɔ nɛ o ya tu munyu kɛ tsɔɔ mɛ. De mɛ ke nɔ́ nɛ imi Nyɔmtsɛ Yawɛ, i ngɛ mɛ dee ji nɛ ɔ nɛ, a bu tue jio, a bui tue jio.”

¹² Kɛkɛ nɛ Mawu mumi ɔ wo ye nɔ, nɛ i nu gbi nguaa ko nɛ ngɛ pɛe ngɛ ye se je ke, “Á je Yawɛ yi, nɛ a wo e hɛ mi nyami ngɛ hiɔwe lokoo.”

¹³ Hɛ kali ɔmɛ a pɛli ɔmɛ ngɛ a sibi a he sae, nɛ tlɔɔke nane ɔmɛ nɛ ngɛ a kasa nya a ngɛ a ní tsue. Enɛ ɔmɛ tsuo ngɛ pɛe hoo kaa nɔ́ nɛ zugba lɛ ngɛ mimiɛe.

¹⁴ Yawɛ he wami ba ye nɔ wawɛɛ nitsɛ; nɛ benɛ mumi ɔ wo mi kɛ yaa a, e dɔ mi, nɛ ye bua jɔɛ kulaa.

¹⁵ Kɛkɛ nɛ i ba su Tel Abib ngɛ Kebar pa a nya. Nihi nɛ a nuu kɛ ho ma se ya a, lejɛ ɔ ji he nɛ a ngɛ. I hi lejɛ ɔ ligbi kpaago sɔuu; nɛ nɔ́ nɛ i na, kɛ nɔ́ nɛ i nu ɔ wo ye he gbeye, nɛ ye he mi po.

Yawɛ pee Ezekiel bulɔ

¹⁶ Ligbi kpaago ɔ se ɔ, Yawɛ kɛ mi tu munyu, nɛ e de mi ke,

¹⁷ “Nɔmlɔ adesa, i pee mo bulɔ kɛ ha Israel ma a; lɔ ɔ he ɔ, bu ye nya mi munyu ɔmɛ tue saminya, konɛ o kɛ bɔ mɛ kɔkɔ ha mi.

¹⁸ Ke i de ke yayami peelɔ ko ma gbo, nɛ o bɔɛ lɛ kɔkɔ, nɛ o tui munyu kɛ tsɔɔ we lɛ, konɛ e tsake nɛ e he e yi wami ɔ, jamɛ a yayami peelɔ ma gbo ngɛ e yayami ɔmɛ a he lɛɛ, se ma bi e muɔ si ngɛ o dɛ.

¹⁹ Se ke o bɔ yayami peelɔ ɔ kɔkɔ, nɛ e kpa we yayami peemi ɔ, e ma gbo ngɛ e yayami ɔmɛ a he, se moo lɛɛ o ma he o yi wami.

²⁰ “Jehanɛ, ke nɔmlɔ kpakpa kpa níhi nɛ da peemi, nɛ e ba bɔni yayami peemi, nɛ i fɔ̃ e blɔ mi tso ɔ, e ma gbo. Akɛnɛ o bɔɛ lɛ kɔkɔ ɔ, e ma gbo ngɛ e yayami ɔ he. Ma bi e muɔ si ngɛ o dɛ; kpakpa nɛ e pee ɔ tsuo, i be kaie.

²¹ Se ke o bɔ dalɔ ɔ kɔkɔ ke e ko pee yayami, nɛ e bu mo tue, nɛ e pee we nɔ́ nɛ dɛ ɔ, e yi ma na wami, nɛ mo nitsɛ hu a ma he o yi wami.”

Ezekiel maa pee mumui

²² I nu Yawɛ he wawɛɛ ngɛ lejɛ ɔ, nɛ e de mi ke, “Tee si nɛ o ya kɔ̃ ɔ mi; i kɛ mo maa tu munyu ngɛ lejɛ ɔ.”

²³ Kɛkɛ nɛ i pue nɔ kɛ ho kɔ̃ ɔ mi ya. Lejɛ ɔ lɛ i na Yawɛ hɛ mi nyami ɔ kaa bɔ nɛ i na lɛ ngɛ Kebar pa a nya a. I ngɔ ye hɛ mi ngɔ bu zugba.

²⁴ Se Mawu mumi ɔ ba sɛ ye mi, nɛ e wo ye nɔ kɛ da si. E kɛ mi tu munyu, nɛ e de mi ke, “Yaa o we ɔ mi, nɛ o nga sinya kɛ wo o yi.

²⁵ Nɔmlɔ adesa, a kɛ kpa maa fi mo, nɛ o be kpo nyɛe maa je kɛ ya nihi a kpɛti.

²⁶ Ma ha nɛ o lilɛ maa mɛtɛ o nya mi; o ma pee mumui, nɛ o be nyɛe maa tu munyu kɛ ka atuã tsɔli nɛ ɔmɛ a hɛ mi.

²⁷ Lɔ ɔ se ɔ, i kɛ mo maa tu munyu ekohu, nɛ ke i bli o nya a, o ma de mɛ nɔ́ nɛ imi Nyɔmtsɛ Yawɛ i de mo ɔ. A ti ni komɛ maa bu mo tue, nɛ ni komɛ hu be mo tue bue; ejakaa ma atuã tsɔli ji mɛ.”