Ezekiel 28 - BAIBLO ALOO NGMAMI KLƆUKLƆU Ɔ

A ma kpata Tiro hɛ mi

¹ Yawɛ kɛ mi tu munyu ekohu. E de mi ke,

² “Nɔmlɔ adesa, de Tiro ganɔ ɔ ke, bɔ nɛ imi Nyɔmtsɛ Yawɛ, i ngɛ lɛ dee ji nɛ ɔ nɛ: O wo o he nɔ gojoo ke mawu ji mo. O hii si ngɛ matsɛ sɛ nɔ; nɛ wo bɔle mo. Mo nɔmlɔ adesa a, o pee o he kaa mawu ko ji mo.

³ O susu kaa o le ní pe Daniel, nɛ laami sane ko kulaa be nɛ a kɛ laa mo.

⁴ O nile, kɛ o nɔ́ sisi numi ha nɛ o ná ní kpɔtɔɔ: o bua sika tsu, kɛ sika hiɔ babauu nya kɛ to.

⁵ O ngɛ jua yemi he juɛmi saminya, nɛ o ná ní babauu. Lɔ ɔ he ɔ, o wo o he nɔ gojoo ke niatsɛ ji mo!

⁶ “Bu tue, bɔ nɛ imi Nyɔmtsɛ Yawɛ, i ngɛ dee ji, akɛnɛ o wo o he nɔ gojoo, nɛ o susu kaa o le ní kaa Mawu he je ɔ,

⁷ ma ha nibwɔhi yiwutsotsɛmɛ kpanakuhi maa je je ma amɛ a mi ma ba tua mo. Afɛu ní babauu nɛ o gu o nile, kɛ o ga a nɔ kɛ ná a tsuo hɛ mi ma kpata.

⁸ A maa gbe mo, nɛ a ma sake mo ngɔ fɔ gbeje ngɛ wo ɔ sisi tɔɔ.

⁹ Ke e ba mi ja a, anɛ o ma nyɛ ma de ngɛ ni nɛmɛ nɛ ngɛ mo gbee ɔ a hɛ mi ke mawu ji mo lo? O maa le kaa nɔmlɔ adesa kɛkɛ ji mo.

¹⁰ Nibwɔhi nɛ li imi Mawu ɔ ma kpata o hɛ mi; a maa gbe mo kaa a gbeɔ gbe. Imi, Nyɔmtsɛ Yawɛ lɛ i de.”

Tiro matsɛ ɔ hɛ mi kpata

¹¹ Yawɛ kɛ mi tu munyu ekohu, nɛ e de mi ke,

¹² “Nɔmlɔ adesa, la hɛdo la ko kɛ nyɛ ya ha Tiro matsɛ ɔ ngɛ nɔ́ nɛ maa ba e nɔ ɔ he. De lɛ nɔ́ nɛ imi Nyɔmtsɛ Yawɛ, i ngɛ dee ɔ: Be ko nɛ be ɔ, ke a ke nɔ ko hi kɛ pi si ɔ, lɛɛ mo ji nɔ hyɛmi nɔ́; o nile mi kuɔ, nɛ o he ngɛ fɛu saminya!

¹³ Eden, Mawu ngmɔ ɔ nitsɛ mi nɛ o hi. Tɛ kpakpa nɛ ɔmɛ tsuo o kɛ dla o he: rubi, daimond, topaz, beril, kanelian, yaspi, safiro, emerald, kɛ garnet. O ngɛ sika tsu he dlami níhi, kɛ heha ní babauu. Ligbi ɔ nɛ a bɔ mo ɔ, jamɛ a ligbi ɔ nɔuu lɛ a dla mo saminyayoo jã.

¹⁴ I ngɔ Mawu bɔfo ko nɛ he ngɛ gbeye kɛ to lejɛ ɔ, konɛ e bu o he. O hi ye yo klɔuklɔu ɔ nɔ; o slaa si ngɛ tɛhi nɛ ngɛ kpɛe nylamnylam ɔ a kpɛti.

¹⁵ Kɛ je be nɛ a bɔ mo ɔ, o ba o je mi pɛpɛɛpɛ, nɛ a nɛ́ tɔmi ko kulaa ngɛ o he kɛ ya su be ko, kɛkɛ nɛ o bɔni yayami peemi.

¹⁶ Be nɛ jua yemi ba ngɛ nɔ yae ɔ, amimi yemi hu ba hyi o mi tɔ, nɛ o pee yayami. Lɔ ɔ he ɔ, i ha o je ye yo klɔuklɔu ɔ nɔ; nɛ Mawu bɔfo nɛ bu o he ɔ fie mo kɛ je tɛ ɔmɛ nɛ ngɛ kpɛe kɛ la nylamnylam ɔ a kpɛti.

¹⁷ O he fɛu ɔ he ɔ, o wo o he nɔ gojoo, nɛ o je kuasia. Lɔ ɔ he ɔ, i tsɛ̃ mo ngɔ fia si ngɛ zugba bum. Bɔ nɛ o nyagbe ba ha nɛ ɔ maa pee kɔkɔ bɔmi nɔ́ ha matsɛmɛ ɔmɛ tsuo.

¹⁸ O pee yayami babauu ngɛ o jua yemi ɔ mi, nɛ o kɛ nɔ́ nɛ ɔ ble hehi nɛ o ya jaa Mawu ngɛ ɔ. Enɛ ɔ he ɔ, i mɛ o he la, nɛ i sã mo pioo, nɛ o pee la zu ngɛ nihi tsuo a hɛ mi.

¹⁹ Amlɔ nɛ ɔ, o be hu; o laa gbidii. Je mahi tsuo nɛ le mo ɔ, jehanɛ lɛɛ sawale nu mɛ. A ngɛ gbeye yee kaa mɛ hu a hɛ mi ma kpata ja nɔuu.”

A ma kpata Sidon ma a hɛ mi

²⁰ Yawɛ kɛ mi tu munyu ekohu, nɛ e de ke,

²¹ “Nɔmlɔ adesa, plɛ o hɛ mi kɛ kpee Sidon ma a, nɛ o gba kɛ si mɛ.

²² De mɛ ke imi Nyɔmtsɛ Yawɛ, i ke i kɛ mɛ ná. Je ma amɛ maa wo ye hɛ mi nyami ngɛ nɔ́ nɛ ma pee Sidon ma a he. Ma gbla Sidon tue, konɛ a na bɔ nɛ i ngɛ klɔuklɔu ha. Kɛkɛ ɔ, a maa le kaa imi ji Yawɛ.

²³ Ma ha gbenɔ hiɔ ma ba sɛ ma a mi; a maa ye awi ngɛ gbɛjegbɛ ɔmɛ a nɔ. A ma ba sa ma a yi, nɛ a kɛ klaate maa gbe ma a mi bi ɔmɛ. Kɛkɛ ɔ, a maa le kaa imi ji Yawɛ.”

A maa gbaa Israel

²⁴ Yawɛ ke, “Je ma amɛ nɛ bɔle Israel kɛ kpe nɛ a pue e hɛ mi si ɔ, ekoeko be e he pee kaa mio, loo mio tso kɛ plaa Israel hu. Kɛkɛ ɔ, a maa le kaa imi ji Nyɔmtsɛ Yawɛ.”

²⁵ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Ma kpale ye ma Israel kɛ je je ma amɛ a kpɛti he nɛ i gbɛ mɛ kɛ fĩa a, nɛ je ma amɛ tsuo maa le kaa nɔ klɔuklɔu ji mi. Israel ma a ma ba hi mɛ nitsɛmɛ a zugba nɛ i ngɔ ha ye tsɔlɔ Yakob ɔ nɔ.

²⁶ A maa hi si ngɛ tue mi jɔmi, kɛ he jɔmi mi. A maa ma tsuhi, nɛ a ma hu wai ngmɔhi. Nihi tsuo nɛ pue Israel hɛ mi si ɔ, ma gbla a tue, nɛ Israel ma na he jɔmi, kɛ tue mi jɔmi kulaa. Lɔ ɔ loko a ma na maa le kaa imi ji Yawɛ, a Mawu ɔ nɛ.”