Ezekiel 24 - BAIBLO ALOO NGMAMI KLƆUKLƆU Ɔ

Buɛ kɛ e mi kana a

¹ Benɛ a nuu wɔ kɛ ho ma se ya a, jeha nɛɛne ɔ we nyɔhiɔ nyɔngma a we ligbi nyɔngma a, Yawɛ kɛ mi tu munyu ekohu.

² E fa mi ke, “Nɔmlɔ adesa, kadi mwɔnɛ ligbi nɛ ɔ biɛ ngɛ womi mi kɛ to! Ejakaa mwɔnɛ ligbi nɛ ɔ nɔuu Babilonia matsɛ ɔ bɔni Yerusalem he ka womi.

³ Buu abɛ nɛ ɔ kɛ tsɔɔ ma tue gboli nɛ ɔmɛ; nɛ o de mɛ ke abɛ nɛ ɔ, imi Nyɔmtsɛ Yawɛ nitsɛ lɛ i ngɛ mɛ bue. Ngɔɔ buɛ ɔ kɛ ma la a nɔ; yɛɛ nyu kɛ wo buɛ ɔ mi.

⁴ Ngɔɔ lo nɛ o saa a tsuo kɛ wo mi; lo kpakpa a tsuo, kɔni ɔ kɛ fiɔ ɔ, kɛ wu kpakpa pe kulaa a hulɔ; ngɔɔ mɛ tsuo kɛ wo buɛ ɔ mi.

⁵ Gbee to nɛ hi pe kulaa, ngɔɔ e lo ɔ tsuo kɛ wo buɛ ɔ mi; moo to lɛ́ kɛ wo sisi. Ha nɛ e fia nɛ e be saminya; wu ɔmɛ tete po, a be ngɛ buɛ ɔ mi.”

⁶ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Musu tloo ma nɛ muɔ si pɛ a pueɔ ngɛ mi ɔ! Ma a ngɛ kaa buɛ ko nɛ e mi nɔ kana, nɛ́ kana a ma ngɛ mi. A tá e mi lo ɔmɛ kakaaka ta; ekoeko piɛ ngɛ mi!

⁷ A pue muɔ si ngɛ ma a mi. Pi zugba nɛ muɔ ɔ pue nɛ a maa ngɔ tabo zu kɛ tsi nɔ, se tɛ sa kpataa nɔ.

⁸ Ee, i si muɔ ɔ ngɛ tɛ sa kpataa a nɔ ngɛ lejɛ ɔ, bɔ nɛ pee nɛ a na paa, konɛ a kɛ abofu nɛ nya wa nɛ ye lue.”

⁹ Lɔ ɔ he ɔ, bɔ nɛ Nyɔmtsɛ Yawɛ ngɛ dee ji nɛ ɔ nɛ: “Musu tloo ma nɛ muɔ si pɛ a pueɔ ngɛ mi ɔ! Imi hu ma bua lɛ́ nya glegle kɛ wo e sisi!

¹⁰ Ma ngɔ lɛ́ babauu kɛ ba! Ma ha la a maa tso wawɛɛ, nɛ lo ɔ maa be saminya! Hwonyu ɔ maa si, nɛ wu ɔmɛ tete ma ngla!

¹¹ Jehanɛ, ma ha buɛ ɔ mi gu maa ma la hleii ɔ nɔ, konɛ e dɔ la kɛ yaa si akɔblee ɔ maa tsu paa; kɛkɛ ɔ, e mi mu ɔ tsuo maa sile, nɛ e mi kana a tsuo maa ta pɛsɛpɛsɛ!

¹² Hyɛ kaa i gbo dengme yaka! Bɔ nɛ a peeɔ pɛ i pee nɛ ɔ nɛ; se kana babauu pa ngɛ buɛ ɔ mi kɛ sa; la a po nyɛ we kana a nɛ e je.

¹³ Yerusalem, o yahomi basaa nɛ puɛ mo ɔ ji kana a nɛ. I gbo dengme kɛ bɔ o he mɔde, konɛ o he nɛ tsɔ; se mu ɔ ngɛ o he kpamisa. Lɔ ɔ he ɔ, o he be tsɔe kɛ je o mu ní peemi ní ɔmɛ a mi hu kɛ yaa si be nɛ ma ngɔ mi mi la kɛ gbla o tue wawɛɛ.

¹⁴ Imi, Yawɛ nitsɛ lɛ i de. Be ɔ su jehanɛ; bɔ nɛ i de ɔ, ja ma pee. I be ye nya se kpalee; i be mɔbɔ nae, nɛ i be ye he piae hulɔ. Yayamihi nɛ o pee ɔ a he ɔ, ma gbla o tue bɔ nɛ sa mo.” Nyɔmtsɛ Yawɛ lɛ de.

Gbalɔ ɔ yo ɔ gbenɔ

¹⁵ Yawɛ kɛ mi tu munyu ekohu.

¹⁶ E ke, “Nɔmlɔ adesa, tlukaa a, ma ha gbenɔ hiɔ ma ba fia o suɔlɔ pe kulaa a, nɛ e ma gbo. Ke e ba mi ja a, koo ye kɔmɔ; ko fo ya, nɛ koo nga vo nyu hulɔ.

¹⁷ A ko nu o huu fami he; se fi o yi duku, nɛ o wo tokota. Koo ngɔ nɔ́ kɛ ha o nya nɔ, nɛ koo ye ya nɔ niye ní kɛ tsɔɔ kaa o ngɛ ya nyɛe.”

¹⁸ Mɔtu kpla a, i kɛ ma mi bi ɔmɛ tu munyu. Jamɛ a ligbi ɔ gbɔkuɛ nɔuu nɛ ye yo ɔ gbo. E nɔ jena mɔtu ɔ, i pee kaa bɔ nɛ a de mi ke ma pee ɔ.

¹⁹ Kɛkɛ nɛ ma mi bi ɔmɛ bi mi ke, “Mɛni he je o ngɛ níhi pee kaa kikɛ nɛ ɔ?”

²⁰ Kɛkɛ nɛ i de mɛ ke, “Yawɛ kɛ mi tu munyu, nɛ e de mi ke

²¹ ma ngɔ sɛ gbi nɛ ɔ kɛ ha Israel ma a, nɛ ma de mɛ ke, bɔ nɛ imi Nyɔmtsɛ Yawɛ, i de ji nɛ ɔ nɛ: Ma ble ye he klɔuklɔu ɔ, he nɛ nyɛ fĩaa ngɔ fɔɔ nɔ ke nyɛ naa he wami kɛ jeɔ ɔ. We ɔ peeɔ nyɛ fɛu saminya, nɛ nyɛ suɔ kɛ nyɛ tsui tsuo kaa nyɛ maa ya lejɛ ɔ. Ma ha nyɛ bimɛ, yi ɔmɛ kɛ nyumu ɔmɛ tsuo nɛ nyɛ si ngɛ Yerusalem ɔ maa nɔ ngɛ klaate nya.

²² Kɛkɛ ɔ, nyɛ maa pee kaa bɔ nɛ i pee nɛ ɔ: nyɛ be nɔ́ ngɔe kɛ ha nyɛ nya nɔ, nɛ nyɛ be ya nɔ ní hu yee.

²³ Nyɛ yi fimi ní ɔmɛ maa fi nyɛ yi; nyɛ tokota amɛ maa hi nyɛ nane; nyɛ be kɔmɔ yee, nɛ nyɛ be ya foe. Se yayamihi nɛ nyɛ pee ɔ ma ha nyɛ maa ta he lo, nɛ nyɛ ma kɛmɛ kɛ tsɔɔ nyɛ sibi.

²⁴ Nɛ imi Ezekiel, ma pee nɔ́ hyɛmi nɔ́ ha nyɛ; bɔ nɛ i pee ɔ, ja pɛpɛɛpɛ nyɛ maa pee. Yawɛ ke, ke nɔ́ nɛ ɔ ba mi ɔ, nyɛ maa le kaa lɛ ji Yawɛ ɔ nɛ.”

²⁵ “Nɛ mo, nɔmlɔ adesa, jamɛ a ligbi ɔ nɛ ma kpɔ a he wami ɔ ngɛ a dɛ, nɛ a bua jɔmi, a hɛ mi nyami, kɛ afɛu nɔ́, kɛ nɔ́ nɛ a suɔ kɛ a tsui tsuo ɔ maa laa mɛ ɔ, a binyumuhi, kɛ a biyihi tsuo a hɛ mi ma kpata.

²⁶ Jamɛ a ligbi ɔ, nɔ ko nɛ yi na wami kɛ je hɛ mi kpatami ɔ mi ma ba bɔ mo amaniɛ.

²⁷ Jamɛ a ligbi ɔ, o kɛ nɔ nɛ yi na wami ɔ maa sɛɛ ní. O maa tu munyu, nɛ o be mumui pee hu. O ma plɛ pee okadi ha mɛ, konɛ a le kaa imi ji Yawɛ.”