Ezekiel 22 - BAIBLO ALOO NGMAMI KLƆUKLƆU ƆYayamihi nɛ Yerusalem pee 1 Yawɛ kɛ mi tu munyu ekohu, 2 nɛ e de mi ke, “Nɔmlɔ adesa, anɛ o pee klaalo nɛ o maa kojo ma nɛ muɔ si pɛ a pueɔ ngɛ mi ɔ lo? Ke jã a, lɛɛ ha nɛ e le ní hiemi níhi nɛ e pee ɔ tsuo. 3 De lɛ ke bɔ nɛ imi, Nyɔmtsɛ Yawɛ i ngɛ dee ji, mo ma nɛ o pue muɔ si babauu, nɛ o puɛ amagahi nɛ o ja mɛ kɛ ble o he, o be ɔ su ta. 4 O yeɔ fɔ kaa o pue muɔ si, nɛ o puɛ amagahi, nɛ o ja mɛ kɛ ble o he. Hyɛ, o ha nɛ o nyagbe ɔ na mo haa! O be ɔ su. Lɔ ɔ he nɛ i ha je ma amɛ ngɛ mo ahlua bɔe, nɛ zugba amɛ tsuo ngɛ o he fɛu yee ɔ nɛ. 5 Nihi nɛ ngɛ ma se tsitsaa, kɛ ni nɛmɛ nɛ ngɛ kpo nya tsuo maa ye o he fɛu; ejakaa o he guɛ gbo, nɛ basabasa sɔuu a peeɔ ngɛ o mi. 6 Israel ganɔ ɔmɛ a ti nɔ tsuaa nɔ ngɔ e hɛ ngɔ fɔ lɛ nitsɛ e he wami nɔ; a pueɔ muɔ si bɔ nɛ a suɔ. 7 Nɔ ko nɔ ko be ma a mi nɛ buɔ e fɔli. O yeɔ nibwɔhi amimi, nɛ o waa awusahi, kɛ yalɔyihi hu yi mi. 8 O gbeɔ ye ní klɔuklɔu ɔmɛ a he guɛ, nɛ o bleɔ ye Hejɔɔmi ligbi ɔmɛ. 9 Ni komɛ yeɔ lakpa ngɛ ma a mi, bɔ nɛ pee nɛ a kpata a nyɛmimɛ a hɛ mi. Ni komɛ ya yeɔ niye ní bɔhi nɛ a sã ngɛ jami hehi; nɛ ni komɛ hu dii he lo akɔnɔ se wawɛɛ. 10 Nyumu ɔmɛ ekomɛ kɛ a tsɛmɛ a yihi po hwɔɔ si; nɛ yihi nɛ ku nine po, nyumu komɛ kɛ mɛ hwɔɔ si pani nya. 11 Ni komɛ kɛ mɛ nitsɛmɛ a nyɛmimɛ a yihi hwɔɔ si; ni komɛ kɛ a nganyɛmɛ, nɛ ni komɛ hu kɛ a tsɛmɛ a biyihi hwɔɔ nɛ́ zo pee we mɛ. 12 Nyɛ ti ni komɛ heɔ nyɔ mi ní nɛ a kɛ pueɔ muɔ si. Ni komɛ paa sika kɛ haa a nyɛmimɛ Israel fɔfɔɛhi, nɛ a heɔ hekpa fuu ngɛ a dɛ kɛ naa a he kpɔtɔɔ. Nɛ a hɛ je ye nɔ.” Nyɔmtsɛ Yawɛ lɛ de. 13 “Lɔ ɔ he ɔ, ma tsɛ̃ ye nguɛ nya ngɛ ojo nɛ a ngɛ yee, kɛ muɔ si nɛ a ngɛ puee ɔ he. 14 Ke i kɛ mo ná a, anɛ o ma nyɛ maa to tsui si, nɛ o maa pee kã kɛ ya si nyagbe lo? Imi, Yawɛ lɛ i de, nɛ ma pee hulɔ. 15 Ma tsɛ̃ o yi se kɛ ya je ma amɛ a mi, nɛ ma gbɛ mo ngɔ fĩa zugba a nɔ tsuo. Kɛkɛ ɔ, ní yayamihi nɛ o peeɔ kɛ woɔ o he mu ɔ, ma ha o ma kpa peemi. 16 O hɛ mi ma pue si ngɛ je ma amɛ a hɛ mi; se moo lɛɛ, o ma na maa le kaa imi ji Yawɛ.” Mawu maa tsu Israel he ngɛ flɔɔnɔɔ mi 17 Kɛkɛ nɛ Yawɛ kɛ mi tu munyu. 18 E ke, “Nɔmlɔ adesa, de Israel bi ɔmɛ ke, Israel ma a he be se nami ha mi! A ngɛ kaa sika fĩ nɛ jeɔ akɔblee, sika hiɔ, dade, loo sumui mi, ke a tsu he se ɔ. 19 Lɔ ɔ he ɔ, imi Nyɔmtsɛ Yawɛ, i ngɛ mɛ dee ke mɛ tsuo kulaa se nami ko kulaa be a he. Ma bua a nya kɛ ba Yerusalem ma a mi. 20 Kaa bɔ nɛ a buaa sika hiɔ, akɔblee, dade, kɛ sumui nya ngɔ woɔ flɔɔnɔɔ mi, nɛ a huu la kɛ woɔ he, nɛ a sileɔ ɔ, ja pɛpɛɛpɛ ma bua a nya kɛ ba ma a mi. Ma ngɔ abofu kɛ hɛdɔ kɛ sile mɛ kaa bɔ nɛ la sileɔ dade ɔ. 21 Ee, ma bua a nya kɛ ba Yerusalem ma a mi; ma slɛ la kɛ wo a sisi. Ye mi mi la a ma mle mɛ, nɛ a maa sile. 22 Ee, a maa sile mɛ ngɛ Yerusalem kaa a sileɔ sika hiɔ ngɛ flɔɔnɔɔ mi! Lɔ ɔ loko a maa le kaa imi Yawɛ lɛ i ngɛ a tue gblae ɔ nɛ.” Yayamihi nɛ Israel ganɔ ɔmɛ pee 23 Yawɛ kɛ mi tu munyu ekohu. 24 E ke, “Nɔmlɔ adesa, de Israel bi ɔmɛ ke, ligbi ɔ nɛ ye mi mi ma fu ɔ, nyɛ maa pee kaa zugba nɛ a hu we, nɛ́ hiɔmi hu nɛ́ ngɛ nɔ. 25 Nyɛ ganɔ ɔmɛ ya so, nɛ a pee a he kaa jata nɛ ngɛ huãe nɛ ngɛ lohwe nɛ e gbe mi tsɔtslɔɔe. A gbee nihi, nɛ a ngɔɔ a sika, kɛ a weto ní tsuo ngɛ a dɛ. Nyumuhi babauu nɛ a gbe ɔ ha yalɔyihi hu a he ba hiɛ ngɛ ma a mi. 26 Osɔfo ɔmɛ plɛɔ ye mlaa a hɛ mi buɔ si, nɛ a bleɔ ye ní klɔuklɔu ɔmɛ. A li slɔɔto nɛ ngɛ nɔ́ klɔuklɔu, kɛ nɔ́ gu a kpɛti. A tsɔɔ we ni ɔmɛ slɔɔto nɛ ngɛ nɔ́ nɛ he tsɔ, kɛ nɔ́ nɛ he tsɔ we a kpɛti. A kuɔ a hɛ ngɔ fɔɔ Hejɔɔmi ligbi ɔ nɔ. Lɔ ɔ he ɔ, Israel bi ɔmɛ bui mi fɛɛ. 27 Ganɔ ɔmɛ ngɛ kaa ogbeteehi nɛ ngɛ a de lo mi tsɔtslɔɔe. A gbeɔ nɔ, bɔ nɛ pee nɛ a na ní yaka. 28 Gbali ɔmɛ laa yayamihi a nɔ kaa bɔ nɛ a kɛ kalo saa gbogbo he. Lakpa ninahi a naa, nɛ a gbami ɔmɛ hu lakpa sɔuu. A deɔ ke Nyɔmtsɛ Yawɛ lɛ tsɔ mɛ, be mi nɛ imi Yawɛ, i de we mɛ nɔ́ ko kulaa. 29 Zugba a nɔ bi ɔmɛ tsuo yeɔ amimi, nɛ a haa níhi; a waa dɛgutsɛ, kɛ ohiatsɛmɛ yi mi. A yeɔ nubwɔ amimi wawɛɛ nitsɛ nɛ a yɛ se. 30 I hla nɔ ko nɛ maa po piɛ kɛ wo a he, loo nɛ e maa tsi puɔ ɔ nɛ ngɛ gbogbo ɔ mi ɔ ha ma a, konɛ ma ko puɛ zugba a, se i nɛ nɔ ko nɔ ko. 31 Lɔ ɔ he ɔ, i ngɔ abofu nɛ nya wa kɛ gbla a tue. Ye mi mi la a kpata a hɛ mi pɛsɛpɛsɛ ngɛ a ní yayamihi nɛ a pee ɔ a he!” Nyɔmtsɛ Yawɛ lɛ de. |
Bible in Dangme © Bible Society of Ghana, 2018.
Bible Society of Ghana