Ezekiel 21 - BAIBLO ALOO NGMAMI KLƆUKLƆU Ɔ

Yawɛ klaate ɔ

¹ Yawɛ kɛ mi tu munyu ekohu, nɛ e de mi ke,

² “Nɔmlɔ adesa, plɛ o hɛ mi kɛ kpee Yerusalem. Fiɛ tsɔɔ he klɔuklɔu ɔ, nɛ o gba kɛ si Israel zugba a ke,

³ imi Yawɛ, nɔ́ nɛ i ngɛ dee ji i kɛ mo ná. Ma hia ye klaate kɛ je e kpo ɔ mi, nɛ ma kpata nɔ tsuaa nɔ hɛ mi, dalɔ jio, yayami peelɔ jio.

⁴ Ma ngɔ ye klaate ɔ kɛ gbe ni ɔmɛ tsuo ngɛ zugba a nɔ, kɛ je leneyi je kɛ ya si omleyi je tɔɔ.

⁵ Nɔ tsuaa nɔ maa le kaa imi Yawɛ nitsɛ lɛ i hia klaate kɛ je e kpo ɔ mi, nɛ i be lɛ se kpalee kɛ wo e kpo ɔ mi hu.

⁶ “Lɔ ɔ he ɔ, nɔmlɔ adesa, mo nya awe, nɛ o ye kɔmɔ wawɛɛ kaa nɔ́ nɛ o tsui kpa miɔ nɛ e tsɔ ngɛ ma a hɛ mi.

⁷ Ke a bi mo nɔ́ nɛ ngɛ mo pee loko o ngɛ kɛmɛe kɛ aywilɛho wawɛɛ kikɛ nɛ ɔ, de mɛ ke sane nɛ ma a nya wa tsɔ. Nɔ tsuaa nɔ tsui maa po; nɔ tsuaa nɔ nine mi maa je wu; nɔ tsuaa nɔ maa pee vii ngɛ e mi; nɛ nakutso tsuaa nakutso mi maa jɔ kaa nyu. Be ɔ ma, e su ta, nɛ e maa ba mi amlɔ nɔuu.” Nyɔmtsɛ Yawɛ lɛ de.

⁸ Yawɛ kɛ mi tu munyu ekohu, nɛ e de mi ke,

⁹ “Nɔmlɔ adesa, gbaa nɛ o de ma a ke, bɔ nɛ imi Nyɔmtsɛ ɔ, i ngɛ dee ji nɛ ɔ nɛ: Klaate oo klaate! A duɔ klaate ko nya; a sa he, nɛ e ngɛ kpɛe nylamnylam.

¹⁰ A duɔ klaate ɔ nya, konɛ a kɛ kpata nihi a hɛ mi; a sa he, konɛ e kpɛ nylamnylam kaa oslabai. Ye ma a be nyɛe ma nyá, ejakaa a bui ye munyu ɔmɛ; a tue nɛ i gbla wawɛɛ ɔ tsuo pee yaka.

¹¹ Lɔ ɔ he ɔ, a sa klaate ɔ he saminya, konɛ a kɛ tsu ní. A duɔ klaate ɔ nya, nɛ a sa he hulɔ, konɛ a kɛ wo awi yelɔ ko dɛ mi.

¹² Nɔmlɔ adesa, moo wo ya, nɛ o ye kɔmɔ, ejakaa a ma kpata ye ma a hɛ mi; a ma kpata Israel ganɔ ɔmɛ tsuo a hɛ mi! A kɛ klaate maa gbe mɛ, kɛ ma a mi bi ɔmɛ tsuo; lɔ ɔ he ɔ, ngɔɔ o nine kɛ kpla o yi, nɛ o ye kɔmɔ!

¹³ I ngɛ ye ma a kae ma hyɛ; ke a kplɛɛ we kaa a tsake ɔ, lɛɛ ní nɛ ɔmɛ tsuo maa ba a nɔ.

¹⁴ “Lɔ ɔ he ɔ, nɔmlɔ adesa, gbaa nɛ o fia o dɛ mi. Fɔ̃ klaate ɔ si etɛ. Klaate nɛ gbeɔ nɔ ji nɛ ɔ nɛ. Klaate nɛ kpataa nɔ hɛ mi lɛ ngɛ e he poe kɛ ngɛ ma a bɔlee ɔ nɛ.

¹⁵ Bɔ nɛ pee nɛ sawale nɛ nu ye ma a, nɛ nihi fuu a hɛ mi nɛ kpata a, i ngɔ klaate nɛ he ngɛ kpɛe nylamnylam kaa oslabai nɛ gbee nɔ hulɔ kɛ tsɔɔ ma a.

¹⁶ Klaate nɛ nya ba, poo ní kɛ ya hiɔ nɔ; jehanɛ, poo ní kɛ ya muɔ nɔ! Poo ní kɛ ya he tsuaa he nɛ o hɛ mi tsɔɔ.

¹⁷ Imi hu ma fia ye dɛ, nɛ ye we abofu ɔ se maa po. Imi, Yawɛ lɛ i de.”

Babilonia matsɛ ɔ klaate ɔ

¹⁸ Yawɛ kɛ mi tu munyu ekohu.

¹⁹ E de ke, “Nɔmlɔ adesa, tɛni gbɛjegbɛ enyɔ nɛ Babilonia matsɛ ɔ kɛ e dɛ mi klaate ɔ maa nyɛɛ nɔ kɛ ba. Ha nɛ blɔ enyɔ ɔmɛ tsuo nɛ a je zugba kake nɔ kɛ ba. Ngɔɔ okadi kɛ to blɔ enyɔ ɔmɛ a he so ngɛ ma a nya he nɛ blɔ ɔmɛ gba ngɛ ɔ.

²⁰ Okadi kake maa tsɔɔ matsɛ ɔ blɔ nɛ yaa Amon bi ɔmɛ a ma nɛ a tsɛɛ Raba a, nɛ kake hu maa tsɔɔ blɔ nɛ yaa Yerusalem, Yuda ma nɛ a fia gbogbo ngɔ wo he ɔ.

²¹ Babilonia matsɛ ɔ ma ba da si ngɛ blɔ gbla a nya, konɛ e kla kɛ hla blɔ nɛ e maa gu. E ma huanya e kɛ̃ɛ̃ mi bi ɔmɛ; e ma bi ní ngɛ amaga amɛ a ngɔ, nɛ e maa hyɛ lohwe nɛ a gbe ɔ fafali mi.

²² Kɛ̃ɛ̃ nɛ e hɛɛ ngɛ e hiɔ nine mi ɔ maa tsɔɔ Yerusalem. E maa tsɔɔ lɛ kaa e ya fia gbogbo kumi kpoku kɛ wo ma a he; e kpa ngmlaa nɛ e he ose wawɛɛ; e ngɔ gbogbo kumi níhi kɛ to agbo ɔmɛ a nya; e fia kpokuhi, nɛ e ma mɔhi.

²³ Se enɛ ɔ maa pee kaa yaka gbami ngɛ Yerusalem bi ɔmɛ a hɛ mi; ejakaa a so nɛ a ka kita ngɔ fɔ nɔ momo kaa huɛmɛ ji mɛ. Se kɛ̃ ɔ, gbami ɔ maa bɔ mɛ kɔkɔ ngɛ a yayami ɔmɛ a he, nɛ a maa le kaa a ma ba nuu mɛ.

²⁴ Lɔ ɔ he ɔ, bɔ nɛ imi Nyɔmtsɛ Yawɛ, i ngɛ dee ji nyɛ ha a kai nyɛ tɔmi ɔmɛ; a je kpo paa ngɛ nihi tsuo a hɛ mi; mɛ tsuo a na kaa nyɛ yeɔ fɔ; nɔ́ tsuaa nɔ́ nɛ nyɛ ngɛ pee ɔ, yayami sɔuu. Lɔ ɔ he ɔ, ma ha nyɛ he nyɛli maa nuu nyɛ nine nya.

²⁵ “Nɛ mo, Israel ganɔ, nɔmlɔ yayami, kɛ yiwutsotsɛ, o nyagbe ji nɛ ɔ nɛ; be nɛ a maa gbla o tue wawɛɛ ɔ su jehanɛ.

²⁶ Bɔ nɛ imi Nyɔmtsɛ Yawɛ, i ngɛ dee ji nɛ ɔ nɛ. Pɛne o yi fimi nɔ́ ɔ, je matsɛ pɛɛ ɔ ngɛ o yi! Níhi ma tsake; bɔ nɛ a ngɛ ɔ, a be ja hie hu; nɔ́ nɛ ba si ɔ a ma wo nɔ; nɔ́ nɛ a wo nɔ ɔ, a maa ba lɛ si! Wó ni guhi nɔ yeli. Ha nɛ nɔ yeli nɛ ba pee ni guhi!

²⁷ Ma doku, ma doku oo, ma doku! Ma pee ma a ma doku! Se nɔ́ nɛ ɔ be mi bae kɛ yaa si nɔ nɛ e sa kaa e tsuɔ nɔ́ nɛ ɔ maa ba; nɛ ma ngɔ ma a kɛ wo e dɛ mi.

Klaate ko kɛ Amon bi ɔmɛ

²⁸ “Nɔmlɔ adesa, gbaa, nɛ o fiɛ ke Amon bi ɔmɛ nɛ ngɛ Israel hɛ mi si puee ɔ, imi Nyɔmtsɛ Yawɛ, i ngɛ mɛ dee ke, ‘A hia klaate ko nɛ a kɛ ma kpata nihi a hɛ mi. A sa klaate ɔ he, nɛ e ngɛ kpɛe nylamnylam kaa oslabai, konɛ a kɛ gbe nihi.

²⁹ Ninahi nɛ nyɛ na a tsuo, lakpa sɔuu; gbamihi nɛ nyɛ ngɛ gbae ɔ hu jã kɛ̃. Nyɛ yiwutsotsɛmɛ nɛ yayami pɛ nyɛ peeɔ, nyɛ be ɔ su ta; be nɛ a maa gbla nyɛ tue ɔ ma oo! A kɛ klaate ma kpata nyɛ hɛ mi pɛsɛpɛsɛ.’

³⁰ “Nyɛ ke, ‘Kpale klaate ɔ se kɛ wo e kpo ɔ mi! Dɛbi! He nɛ a bɔ nyɛ ade ngɛ, zugba nɔ he nɛ a fɔ nyɛ ngɛ ɔ, lejɛ ɔ ma gbla nyɛ tue ngɛ.

³¹ Nyɛ maa nu ye abofu nɛ nya wa a he, be mi nɛ ma gli kɛ wo nyɛ kaa la nɛ ngɛ tsoe plamplam. Ma ngɔ nyɛ kɛ wo dikali nɛ le ga nɛ a kɛ kpataa nɔ hɛ mi a dɛ mi.

³² A kɛ la maa sã nyɛ. A ma pue nyɛ muɔ si ngɛ nyɛ nitsɛmɛ nyɛ zugba nɔ, nɛ nɔ ko nɔ ko be nyɛ kaie gblegbleegble.’ ” Yawɛ lɛ de.