Ezekiel 20 - BAIBLO ALOO NGMAMI KLƆUKLƆU Ɔ

Mawu suɔmi nya ní, kɛ nɔmlɔ adesa we atuã tsɔmi

¹ Benɛ a nuu wɔ kɛ ho ma se ya a jeha kpaagone ɔ we nyɔhiɔ enuɔ ɔ we ligbi nyɔngma a, Israel ma nimeli ɔmɛ a kpɛti ni komɛ ba ye ngɔ. A ba konɛ a ba bi Yawɛ gbi. I ha mɛ sɛ, nɛ a hi si.

² Kɛkɛ nɛ Yawɛ de mi ke,

³ “Nɔmlɔ adesa, tu munyu kɛ tsɔɔ Israel ma nimeli ɔmɛ, nɛ o de mɛ ke Nyɔmtsɛ Yawɛ ke, nɔ́ nɛ i suɔ kaa a pee ɔ, lɔ ɔ nyɛ ba nɛ nyɛ ba bi nɛ ɔ lo? I ngɛ ye he kita kae ke i be kplɛɛe nɛ nyɛ bi mi ní. Imi, Nyɔmtsɛ Yawɛ lɛ i de.

⁴ “Nɔmlɔ adesa, o maa kojo mɛ lo? Ke jã a, lɛɛ ha nɛ a le ní hiemi níhi nɛ a tsɛmɛ ɔmɛ tsu.

⁵ De mɛ nɔ́ nɛ i ngɛ dee ɔ. Benɛ i hla Israel ma a, i wo mɛ si ko. I je ye he kpo kɛ tsɔɔ mɛ ngɛ Egipt, nɛ i de mɛ ke, imi ji Yawɛ, nyɛ Mawu ɔ nɛ.

⁶ Jamɛ a ligbi ɔ, i ka mɛ kita ke ma je mɛ kɛ je Egipt zugba a nɔ, nɛ ma kpaka mɛ kɛ ya zugba ko nɛ i hla ha mɛ, zugba kpakpa nɛ baa ní saminya, nɛ e ngɛ fɛu pe kulaa nɔ.

⁷ I de mɛ ke yakayaka mawuhi nɛ a suɔ nɛ ɔ, a sake mɛ ngɔ pue he, se a ko ngɔ Egipt amagahi kɛ ble a he; ejakaa imi ji Yawɛ, a Mawu ɔ nɛ.

⁸ Se a tsɔ ye hɛ mi atuã; a kplɛɛ we nɛ a bu mi tue; nɔ ko nɔ ko sakee we yakayaka ní ɔmɛ ngɔ pue he; a hɛɛ Egipt amaga amɛ a mi wawɛɛ. Kɛkɛ nɛ i to ye yi mi kaa ma ha nɛ a nu ye we abofu gbeyegbeye ɔ he ngɛ Egipt.

⁹ Se i ha we nɛ e ba mi ja; ejakaa lɔ ɔ ko gbe ye biɛ he guɛ ngɛ je ma amɛ a hɛ mi. Ye ma a ngɛ je ma amɛ a kpɛti, nɛ mɛ tsuo a hɛ mi nɛ i de ngɛ ke ma je Israel bi ɔmɛ kɛ je Egipt zugba a nɔ ɔ nɛ.

¹⁰ “Lɔ ɔ he ɔ, i kpaka mɛ kɛ je Egipt zugba a nɔ kɛ ba nga a nɔ.

¹¹ I wo mɛ mlaahi, nɛ i tsɔɔ mɛ blɔ nya tomihi nɛ ke a ye nɔ ɔ, a yi ma na wami.

¹² Lɔ ɔ se hu, i ngɔ ye Hejɔɔmi ligbi ɔmɛ ngɔ ha mɛ nɛ a ye mɛ klɔuklɔu, konɛ e pee somi nɛ ngɛ i kɛ mɛ wa kpɛti ɔ he okadi; nɛ a le kaa imi ji Yawɛ nɛ peeɔ mɛ klɔuklɔu ɔ nɛ.

¹³ Se Israel ma a tsɔ ye hɛ mi atuã ngɛ nga a nɔ. A yi ye mlaa amɛ, kɛ blɔ nya tomi ɔmɛ a nɔ; a bui mɛ kaa níhi nɛ ke nɔmlɔ ye a nɔ ɔ, e yi ma na wami. A ble ye Hejɔɔmi ligbi ɔmɛ hu kpɔtɔɔ. Kɛkɛ nɛ i to ye yi mi kaa ma ha nɛ a nu ye we abofu gbeyegbeye ɔ he ngɛ nga a nɔ, nɛ ma kpata a hɛ mi pɛsɛpɛsɛ.

¹⁴ Se i ha we nɛ e ba mi ja, ejakaa je ma amɛ nɛ na bɔ nɛ i kpaka ye ma a kɛ je Egipt ɔ, ye biɛ he guɛ ma gbo ngɛ a hɛ mi.

¹⁵ Jehanɛ hu, i ka mɛ kita ngɛ nga a nɔ ke zugba kpakpa nɛ baa ní saminya, nɛ e ngɛ fɛu pe kulaa nɛ i ngɔ ha mɛ ɔ, i kɛ mɛ be lejɛ ɔ yae hu,

¹⁶ ejakaa a kua ye blɔ nya tomi ɔmɛ, nɛ a yi ye mlaa amɛ a nɔ. A ble ye Hejɔɔmi ligbi ɔmɛ hu kpɔtɔɔ. Ejakaa a suɔ wawɛɛ kaa a ma ja amaga amɛ mohu.

¹⁷ “Se kɛ̃ ɔ, i na mɛ mɔbɔ; i kpataa we a hɛ mi pɛsɛpɛsɛ ngɛ nga a nɔ.

¹⁸ Se i bɔ a bimɛ ɔmɛ kɔkɔ mohu ke, mlaahi nɛ nyɛ nɛmɛ ɔmɛ wo ɔ, nyɛ ko ye a nɔ, nɛ nyɛ ko ngɔ a we amaga amɛ kɛ ble nyɛ he.

¹⁹ Imi ji Yawɛ, nyɛ Mawu ɔ nɛ. Nyɛɛ ye ye mlaa amɛ, kɛ blɔ nya tomi ɔmɛ a nɔ.

²⁰ Nyɛɛ pee ye Hejɔɔmi ligbi ɔmɛ klɔuklɔu, nɛ a ba pee okadi nɛ ngɛ i kɛ nyɛ wa kpɛti, konɛ nyɛɛ le kaa imi ji nyɛ Mawu ɔ nɛ.

²¹ “Se jamɛ a yi nɔ bi ɔmɛ hu tsɔ ye hɛ mi atuã; a nyɛɛ we ye blɔ nya tomi ɔmɛ a nɔ, nɛ a yi ye mlaa amɛ a nɔ. A ble ye Hejɔɔmi ligbi ɔmɛ hulɔ. Níhi nɛ ke nɔmlɔ pee nɛ e yi ma na wami ɔ, a pee we. Lɔ ɔ he ɔ, i to ye yi mi kaa ma ha nɛ a nu ye we abofu gbeyegbeye ɔ he ngɛ nga a nɔ.

²² Se i ha we nɛ e ba mi ja; ejakaa je ma amɛ nɛ na bɔ nɛ i kpaka ye ma a kɛ je Egipt ɔ, ye biɛ he guɛ ma gbo ngɛ a hɛ mi.

²³ Lɔ ɔ he ɔ, i kpale wo si ekohu ngɛ nga a nɔ. I ka kita ke ma gbɛ ye ma a ngɔ fĩa je ma amɛ a kpɛti ngɛ je ɔ mi tsuo.

²⁴ I pee nɔ́ nɛ ɔ, ejakaa a bui ye blɔ nya tomi ɔmɛ, nɛ ye mlaa amɛ hu, a yi nɔ; jehanɛ hu, a ble ye Hejɔɔmi ligbi ɔmɛ, nɛ a nɛmɛ ɔmɛ a we amaga amɛ mohu a suɔ wawɛɛ.

²⁵ “Lɔ ɔ he ɔ, imi hu i ha mɛ blɔ nya tomi yayahi, kɛ mlaahi nɛ ke nɔmlɔ ye nɔ ɔ, e yi be wami nae.

²⁶ I ha nɛ a ngɔ mɛ nitsɛmɛ a bɔhi kɛ ble a he, nɛ a ngɔ mɛ nitsɛmɛ a bitɛtehi hu kɛ sã bɔ. I ngɔ enɛ ɔ kɛ gbla a tue, konɛ a le kaa imi ji Yawɛ.

²⁷ “Lɔ ɔ he ɔ, nɔmlɔ adesa, de Israel bi ɔmɛ ke bɔ nɛ imi Nyɔmtsɛ Yawɛ, i ngɛ mɛ dee ji nɛ ɔ nɛ. Enɛ ɔ mi hu nyɛ nɛmɛ ɔmɛ bɔ musu kɛ si mi; a yi mi anɔkuale.

²⁸ I ngɔ mɛ kɛ ba zugba nɛ i wo si kaa ma ha mɛ ɔ nɔ. Se he tsuaa he nɛ a na yoku gojoo, aloo tso nɛ bɔ kusuu ngɛ ɔ, kɛkɛ a ya sã bɔ ngɛ lejɛ ɔ. A sã bɔhi nɛ jee via, kɛ wai bɔ hulɔ; a pee ní nɛ ɔmɛ kɛ wo ye mi mi la.

²⁹ I bi mɛ ke, he gojoohi nɛ nyɛ yaa a, kɛ ji e sisi kɛɛ? ‘He gojoohi’ nɛ ɔ ba pee biɛ nɛ a kɛ tsɛɔ lejɛ ɔmɛ kɛ ba su mwɔnɛ ɔ.

³⁰ Lɔ ɔ he ɔ, de Israel bi ɔmɛ ke bɔ nɛ imi Nyɔmtsɛ Yawɛ, i ngɛ mɛ dee ji, mɛni he je nyɛ ngɛ nyɛ he blee kaa bɔ nɛ nyɛ nɛmɛ ɔmɛ pee ɔ, nɛ nyɛ ngɛ ajuama bɔe kɛ ngɛ a ní hiemi níhi a se nyɛɛe ɔ?

³¹ Amlɔ nɛ ɔ po, nyɛ ngɔɔ nike níhi kɛ ya haa amagahi, nɛ nyɛ ngɔɔ nyɛ bimɛ ngɔ haa nɛ a sã mɛ ngɛ la mi; nyɛ jaa amagahi babauu kɛ bleɔ nyɛ he. Israel bi, enɛ ɔmɛ tsuo a se ɔ, nyɛ kpale baa ke a bi mi ní ha nyɛ. I be kplɛɛe nɛ nɔ ko ba bi mi ní ha nyɛ. Imi, Nyɔmtsɛ Yawɛ lɛ i de.

³² Nyɛ pee nyɛ yi mi momo ke nyɛ suɔ kaa nyɛ maa pee nyɛ he kaa je ma kpa amɛ. Nyɛ maa pee kaa nihi nɛ ngɛ zugba kpahi a nɔ nɛ a jaa tso kɛ tɛ ɔ. Dɛbi, dɛbi! E be mi bae ja kɔkɔɔkɔ.

Mawu gblaa nɔ tue, nɛ Mawu ngɔɔ yayami nɛ nɔ pee kɛ paa

³³ “Imi Nyɔmtsɛ Yawɛ, i ngɛ ye he kita kae ke i ngɛ nyɛ si woe kaa ma ngɔ abofu, kɛ nine si wami tsuo kɛ ye nyɛ nɔ.

³⁴ Ma je nyɛ kɛ je je ma amɛ a kpɛti. Ma bua nyɛ nya kɛ je hehi tsuo nɛ a gbɛ nyɛ ngɔ fĩa a. Ye he wami kpetekpleenyɛ ɔ, kɛ abofu nguaa ma ngɔ kɛ tsu nɔ́ nɛ ɔ.

³⁵ Ma ngɔ nyɛ kɛ ya ‘Je ma amɛ a nga a nɔ.’ Ma kojo nyɛ, nɛ ma bu nyɛ fɔ ngɛ lejɛ ɔ nɔuu.

³⁶ Ma kojo nyɛ nɛ ma bu nyɛ fɔ kaa bɔ nɛ i pee nyɛ nɛmɛ ɔmɛ ngɛ Sinai nga a nɔ ɔ.” Nyɔmtsɛ Yawɛ lɛ de.

³⁷ “Ye nine si maa wa ngɛ nyɛ nɔ, nɛ ma ha nyɛ maa ye ye somi ɔ nɔ.

³⁸ Ma je atuã tsɔli ɔmɛ, kɛ ni nɛmɛ nɛ tɔ̃ ye nɔ ɔ kɛ je nyɛ kpɛti. A maa je zugba nɔ he nɛ a ya to nibwɔ ngɛ ɔ mohu, se a be Israel zugba a nɔ bae, konɛ nyɛɛ le kaa imi ji Yawɛ.”

³⁹ Nyɔmtsɛ Yawɛ ke, “Amlɔ nɛ ɔ lɛɛ, nyɛ Israel bi, nyɛɛ pee nɔ́ nɛ nyɛ suɔ; nɔ tsuaa nɔ nɛ ya sɔmɔ e we amagahi. Se pee se ɔ, nyɛ maa bu mi tue kɛ̃; nyɛ be nyɛ we amaga amɛ ngɔe kɛ ble ye biɛ klɔuklɔu ɔ hu.

⁴⁰ Ye yo klɔuklɔu nɛ ji Israel yo gagaa a nɔ nyɛ Israel bi tsuo pɛpɛɛpɛ nɛ ngɛ zugba a nɔ ma ba ja mi ngɛ. Lejɛ ɔ nɛ ma ná nyɛ he tsui ngɛ, nɛ lejɛ ɔ nyɛ maa ngɔ nike ní slɔɔtoslɔɔto ɔmɛ tsuo kɛ ba, sami bɔ ɔmɛ, nike ní kpakpa pe kulaa amɛ, kɛ bɔ klɔuklɔu ɔmɛ.

⁴¹ Ke i je nyɛ kɛ je je mahi a nɔ hehi nɛ a gbɛ nyɛ ngɔ fĩa a, nɛ i ba bua nyɛ nya a, ma ná nyɛ he tsui kaa bɔ nɛ he via, nɛ je ma amɛ maa na kaa nɔ klɔuklɔu ji mi ngɛ nyɛ kpɛti.

⁴² Zugba a nɛ i ka nyɛ nɛmɛ ɔmɛ kita ke ma ngɔ kɛ ha mɛ ɔ, ke i ngɔ nyɛ kɛ ba nɔ ɔ, kɛkɛ nyɛ ma na maa le kaa niinɛ, imi ji Yawɛ.

⁴³ Kɛkɛ ɔ, ngɛ lejɛ ɔ, nyɛ ma kai nyɛ blɔ yaya amɛ, kɛ nyɛ ní peemi ní ɔmɛ tsuo nɛ nyɛ kɛ ble nyɛ he ɔ. Nyɛ nitsɛmɛ nyɛ he maa nyɛɛ nyɛ ngɛ nyɛ ní hiemi ní ɔmɛ tsuo nɛ nyɛ pee ɔ a he.

⁴⁴ Nyɛ Israel bi, nyɛ maa na hu kaa ye biɛ Yawɛ ɔ, i sume kaa e puɛ. Lɔ ɔ he nɛ i kɛ nyɛ to we ní ngɛ nyɛ yayami ɔmɛ a he ɔ nɛ.” Nyɔmtsɛ Yawɛ lɛ de.

La ngɛ tsoe ngɛ leneyi je

⁴⁵ Yawɛ kɛ mi tu munyu ekohu, nɛ e de mi ke,

⁴⁶ “Nɔmlɔ adesa, plɛ o hɛ mi kɛ kpee leneyi je, nɛ o fiɛ kɛ si lejɛ ɔ. Gbaa kɛ si hue nɛ ngɛ leneyi je zugba a nɔ ɔ.

⁴⁷ De leneyi je hue ɔ ke nɔ́ nɛ Yawɛ ngɛ dee ɔ, e bu tue saminya. Hyɛ, ma slɛ la ngɛ o mi, nɛ e maa sã o tso mumu, kɛ tso gbigbli ɔmɛ tsuo. Nɔ́ ko nɔ́ ko be nyɛe maa gbe la nɛ ngɛ tsoe plamplam nɛ ɔ. E maa sã nɔ́ tsuaa nɔ́ ngɛ e blɔ ɔ mi kɛ maa je leneyi je kɛ yaa su omleyi je tɔɔ.

⁴⁸ Nimli adesahi tsuo maa na kaa imi Yawɛ lɛ i mɛ hue ɔ he la a nɛ, nɛ a be nyɛe maa gbe.”

⁴⁹ Kɛkɛ nɛ i kpa pɛɛ ke, “Nyɔmtsɛ Yawɛ, ko ha nɛ ma tsu nɔ́ nɛ ɔ. Nɔ tsuaa nɔ ngɛ dee ngɛ ye he momo ke, nɔ nɛ ɔ lɛɛ pi abɛ kɛkɛ nɛ e buɔ.”