Ezekiel 2 - BAIBLO ALOO NGMAMI KLƆUKLƆU Ɔ

¹ “Nɔmlɔ adesa, tee si nɛ o da si nɛ ma de mo nɔ́ ko.”

² Benɛ e kɛ mi tu munyu ɔ kɛkɛ nɛ Mawu mumi ba sɛ ye mi, nɛ e wo ye nɔ kɛ da si. Kɛkɛ nɛ i bu nɔ́ nɛ a ngɛ mi dee ɔ tue.

³ E de mi ke, “Nɔmlɔ adesa, ma tsɔ mo kɛ ya Israel bi ɔmɛ a ngɔ. A nɛmɛ ɔmɛ tsɔ atuã, nɛ a kua mi; nɛ mɛ hu a pee a he atuã tsɔli, nɛ a ngɛ ye nɔ tɔe kɛ mwɔɔ.

⁴ Ma nɛ e mi bi a tue wa, nɛ a bui mi a ngɔ i ngɛ mo tsɔe ɔ nɛ. Yaa de mɛ nɔ́ nɛ imi Nyɔmtsɛ Yawɛ i ngɛ mɛ dee ɔ.

⁵ Ke atuã tsɔli nɛ ɔmɛ bu mo tue jio, a bui mo tue jio, a ma na maa le kɛ̃ kaa gbalɔ ko ngɛ a kpɛti.

⁶ “Se mo nɔmlɔ adesa, jamɛ a atuã tsɔli ɔmɛ lɛɛ koo ye mɛ gbeye; a munyu ɔmɛ hu koo bu. Ke a te si kɛ wo mo, nɛ a bui mo tue ɔ, e maa pee kaa miohi a mi o ngɛ, nɛ nyingmogblakotohi a nɔ o hii si ngɛ, se jamɛ a atuã tsɔli ɔmɛ lɛɛ koo ye mɛ gbeye; a munyu ɔmɛ hu koo bu.

⁷ A bu mo tue jio, a bui mo tue jio, moo lɛɛ de mɛ nɔ́ tsuaa nɔ́ nɛ ma de mo ke o de mɛ ɔ. Ejakaa tue gboli ji mɛ.

⁸ “Se mo nɔmlɔ adesa, bu nɔ́ nɛ ma de mo ɔ tue; koo pee o he tue gbolɔ kaa mɛ. Pãã o nya mi, nɛ o ye nɔ́ nɛ ma ha mo nɛ ɔ.”

⁹ I na nine ko nɛ a juale ha mi; e hɛɛ womi kpo ko.

¹⁰ E bli womi ɔ mi kɛ fɔ si. A ngma ní ngɛ womi ɔ hɛ mi, kɛ e se tsuo. Kɔmɔ yemi, huu fami, kɛ awe nyami munyuhi lɛ ngɛ mi.