Ezekiel 19 - BAIBLO ALOO NGMAMI KLƆUKLƆU Ɔ

Kɔmɔ yemi la

¹ Jehanɛ Yawɛ de mi ke ma la kɔmɔ yemi la ko ha Israel ma ganɔ ɔmɛ.

² La a deɔ ke, Mɛnɔ ji o nyɛ? O nyɛ ngɛ kaa jata yo ko nɛ buɔ si ngɛ jata kuhi a kpɛti! Lohwe katsɛmɛ nɛ ɔmɛ a kpɛti nɛ e lɛɔ e bimɛ ngɛ.

³ E tsɔse e bimɛ ɔmɛ a kpɛti nɔ kake kɛ ya su be nɛ e ba wa. E tsɔɔ lɛ de, nɛ nimlihi tete po e nuɔ nɛ e yeɔ.

⁴ Je ma amɛ ba nu jata bi ɔ he. A tsua muɔ kɛ tsɔ lɛ klama; e nɔ mi, nɛ e du. A ngɔ gbowehi kɛ gbla lɛ kɛ ho Egipt zugba a nɔ ya.

⁵ Jata nyɛ ɔ mlɛ e bi nɛ ɔ hluu kɛ ya su be nɛ hɛ kɛ nɔ fɔmi tsuo ta. Kɛkɛ nɛ e kpale hla e bimɛ ɔmɛ a kpɛti nɔ kake; e tsɔse lɛ kɛ ya su be nɛ e ba wa.

⁶ Benɛ e ba wa a, e kɛ jata kpa amɛ nyɛɛɔ kɛ yaa kɛ baa. Lɛ hu e ba kase de, nɛ nimlihi tete po e nuɔ nɛ e yeɔ.

⁷ E ku a mɔ ɔmɛ, nɛ e kpata a ma amɛ a hɛ mi. Ke e wo gbi kikɛ nɛ ɔ, sawale nuɔ nɔ tsuaa nɔ ngɛ zugba a nɔ.

⁸ Lɔ ɔ he ɔ, je ma amɛ tsuo tsɔ lɛ klamahi kɛ bɔle lɛ kɛ kpe. A bli a ya a mi ngɔ pue e nɔ. A tsua muɔ kɛ tsɔ lɛ klama; e nɔ mi, nɛ e du.

⁹ A ngɔ gbowehi kɛ gbla lɛ kɛ wo daka ko mi, nɛ a kɛ lɛ ya ha Babilonia matsɛ ɔ. A wo lɛ tsu ngɛ mɔ ɔ mi, konɛ a ko nu e gbi ngɛ Israel yo ɔmɛ a nɔ hu.

¹⁰ O nyɛ ngɛ kaa wai tso ko nɛ a hia ya ma ngɛ pa tue. E ná nyu saminya, lɔ ɔ he ɔ, e gba kɔnihi, nɛ e wo yiblii kplanyaa.

¹¹ E kɔni kake nɛ he wa pe kulaa a ba pee tso nɛ a kɛ peeɔ matsɛ tso; e ka pe tso kɔni kusukusuu ɔmɛ tsuo. Nɔ tsuaa nɔ na kaa tso nɛ ɔ ka saminya, nɛ e pee kusuu kɛ e kɔnihi babauu.

¹² Se a kɛ abofu hia wai tso nɛ ɔ, nɛ a sake lɛ ngɔ fɔ si. Ahlabata kɔɔhiɔ fia, nɛ e ha nɛ tso ɔ gbli, nɛ e yiblii tsuo kplɔ pue si; tso agbo ɔ nitsɛ hu gbli, nɛ a kɛ la sã.

¹³ Jehanɛ lɛɛ, a hia tso ɔ, nɛ a ya ma lɛ ngɛ nga nɔ; a ma lɛ ngɛ zugba gbigbli nɔ he nɛ nyu ko nyu ko be.

¹⁴ La ba sɛ tso kɔni ɔmɛ a mi; e sã kɔni ɔmɛ, kɛ e yiblii ɔmɛ tsuo. La a sã tso nɛ he wa a hulɔ. Tso kpakpa nɛ maa si kaa tso nɛ a kɛ peeɔ matsɛ tso ɔ be hu. Kɔmɔ yemi la nɛ a pɔɔ lami ji nɛ ɔ nɛ.