Ezekiel 17 - BAIBLO ALOO NGMAMI KLƆUKLƆU Ɔ

Kɔle ɔmɛ kɛ wai tso ɔ he abɛ ɔ

¹ Yawɛ de mi ke,

² “Nɔmlɔ adesa, buu abɛ kɛ tsɔɔ Israel ma a,

³ nɛ o de mɛ ke bɔ nɛ imi Nyɔmtsɛ Yawɛ i ngɛ dee ji nɛ ɔ nɛ: Kɔle agbo ko hi si. E ngɛ pɛli agbohi, kɛ tsɛli pinopino nɛ hɛɛ asasa su. Ligbi ko ɔ, kɔle ɔ te kɛ ba Lebanon yo ɔmɛ a nɔ, nɛ e ba ma seda tso ko yi mi. E kplɔ tso ɔ he kɔnihi nɛ e je ɔ yi mi mlɔmlɔɔmlɔ ɔ.

⁴ E ngɔ kɔni mumu nɛ e ku ɔ kɛ ho ma ko nɛ a yeɔ jua ngɛ mi mi ya, nɛ e ya ma tso ɔ ngɛ lejɛ ɔ.

⁵ Jehanɛ, e ngɔ Israel zugba a nɔ wu nɛ a duɔ ɔ eko, nɛ e ya du ngɛ zugba kpakpa ko mi he nɛ nyu ngɛ saminya, konɛ e bɔ.

⁶ Niinɛ, tso nɛ ɔ le, nɛ e ba pee wai tso nɛ bɔ kusuu kɛ ha si. E kɔni ɔmɛ ka gagaaga, nɛ a mi dɔ kɛ ba kɔle ɔ ngɔ; nɛ e sipoku ɔmɛ sɛ zu mi saminya. Lɔ ɔ he ɔ, e pee wai tso nɛ gba kɔnihi kɛ a nɔ ba kusuu.

⁷ “Kɔle agbo kpa ko hu ngɛ kɛ e pɛli nguanguahi, kɛ e tsɛli fuu. Kikɛmɛ a wai tso nɛ ɔ dɔ e sipoku ɔmɛ, kɛ e kɔni ɔmɛ kɛ ba e ngɔ, bɔ nɛ pee nɛ e na nyu saminya.

⁸ Zugba kpakpa nɛ nyu ngɛ mi bɔ nɛ sa nɔ nɛ a ma tso nɛ ɔ ngɛ, konɛ e wo yiblii, nɛ e pee wai tso kɛ e he fɛu.

⁹ “Lɔ ɔ he ɔ, imi Nyɔmtsɛ Yawɛ i ngɛ bie ke tso nɛ ɔ yi ma na wami lo? Anɛ kekle kɔle ɔ be tso ɔ gblae nɛ e hia e sipoku tsuo kɛ fɔ he, nɛ e ku e kɔni ɔmɛ, konɛ a gbli lo? E yi mi ba amɛ tsuo ma gbli. Pi he wami tsɔ ko, loo nihi babauu nɛ a ma na loko a maa hia tso nɛ ɔ.

¹⁰ A ma tso ɔ lɛɛ, se e yi ma na wami lo? Anɛ ke ahlabata kɔɔhiɔ fia a, tso ɔ be gblie ngɛ he nɛ a ma lɛ ngɛ ɔ lo?”

A tsɔɔ abɛ ɔ sisi

¹¹ Yawɛ de mi ke,

¹² “Bi ma atuã tsɔli nɛ ɔmɛ ke a nu abɛ ɔ sisi lo. De mɛ ke Babilonia matsɛ ɔ ba Yerusalem, nɛ e ba nuu ma a mi matsɛ ɔ, kɛ ganɔ ɔmɛ tsuo kɛ ho Babilonia ya.

¹³ E ngɔ matsɛ ɔ bi ko, nɛ e kɛ lɛ so; e ha e ka lɛ kita ke e maa ye lɛ anɔkuale. Kɛkɛ nɛ e ngɔ zugba a nɔ nihi nɛ a buu mɛ ɔ kɛ ho,

¹⁴ konɛ matsɛ yemi nɛ ɔ nɛ ba si kulaa, nɛ e ko nyɛ nɛ e te si gblegbleegble kaa bɔ nɛ a so ɔ.

¹⁵ Se Yuda matsɛ ɔ tsɔ atuã; e tsɔ nihi kɛ ho Egipt ya, konɛ a ha lɛ okpɔngɔhi, kɛ ta buli nɛ he hiɛ. Anɛ e ma nyɛ maa ye kunimi lo? Anɛ matsɛ nɛ ɔ yi ma na wami lo? Ke e yi somi ɔ nɔ ɔ, anɛ e yi ma na wami lo?”

¹⁶ Nyɔmtsɛ Yawɛ ke, “I ngɛ ye he kita kae ke Yuda matsɛ nɛ ɔ ma gbo ngɛ Babilonia, akɛnɛ somi nɛ e kɛ Babilonia matsɛ ɔ so, kɛ si nɛ e wo lɛ ɔ, e yi nɔ ɔ. (Babilonia matsɛ ɔ lɛ wo Yuda matsɛ ɔ tsɛ).

¹⁷ Ke e ba mi kaa Babilonia bi ɔmɛ fia kpokuhi, nɛ a ma mɔhi, konɛ a kɛ kpata nihi babauu a hɛ mi tete po, Egipt matsɛ ɔ kɛ e ta babauu ɔ be he nɔ́ ko nyɛe maa pee ha lɛ.

¹⁸ Somi nɛ e kɛ Babilonia matsɛ ɔ so, kɛ si nɛ e wo lɛ ɔ, e yi nɔ. Enɛ ɔmɛ a he ɔ, e yi be wami nae kɔkɔɔkɔ.”

¹⁹ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “I ka ye he kita kaa ligbi abɔ nɛ ye hɛ ngɛ nɛ ɔ, akɛnɛ somi nɛ e so, kɛ si nɛ e wo ɔ, e yi nɔ fɛɛ he je ɔ, ma gbla e tue kokooko.

²⁰ Ma tsɔ lɛ klama nɛ ma du lɛ. Ma ngɔ lɛ kɛ ya Babilonia, nɛ ma ya gbla e tue ngɛ lejɛ ɔ, ejakaa e yi mi anɔkuale.

²¹ E tabo ɔ mi katsɛmɛ ɔmɛ tsuo maa nɔ ngɛ ta mi, nɛ nihi nɛ maa piɛ ɔ hu a maa gbɛ mɛ kɛ fĩa je ɔ mi he tsuaa he. Kɛkɛ ɔ, nyɛ maa le kaa imi, Yawɛ lɛ i de.”

Mawu wo si ke manye maa ba

²² Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Imi nitsɛ ma kplɔ seda tso gagaa a yi mi, nɛ ma ya ma ngɛ he ko. Ma ya ma tso nɛ ɔ ngɛ yo gagaa ko nɔ.

²³ Israel yo gagaa pe kulaa a nɔ ma ma ngɛ. E ma gba kɔnihi, nɛ e maa wo yiblii; e maa pee seda tso agbo kɛ e he fɛu. Lohwe pɛlitsɛmɛ slɔɔtoslɔɔto tsuo ma ba hi e hɔ̃ ɔ mi.

²⁴ Zugba a nɔ tso ɔmɛ tsuo maa le kaa imi Yawɛ lɛ i haa tso gagaa peeɔ kpiti, nɛ tso kpiti kaa gagaa. Imi lɛ i haa tso mumu gbliɔ, nɛ tso gbigbli peeɔ tso mumu ekohu. Imi, Yawɛ lɛ i de, nɛ ma pee.”