Ezekiel 1 - BAIBLO ALOO NGMAMI KLƆUKLƆU Ɔ

KEKLEEKLE NINA NƐ EZEKIEL NA NGƐ MAWU HE ( 1.1—7.27 ) Mawu matsɛ sɛ

¹ Jeha nyingmi etɛne ɔ we nyɔhiɔ eywiɛne ɔ we ligbi enuɔne ɔ, imi osɔfo Ezekiel, Buzi bi ɔ, i kɛ Yuda bi ɔmɛ nɛ a nuu kɛ ho ma se ya a, wa ngɛ Kebar pa a nya ngɛ Babilonia. Hiɔwe nya bli, nɛ i na Mawu he ninahi.

² Benɛ a nu Matsɛ Yehoyakin kɛ ho ma se ya a se jeha enuɔne ɔ we ligbi enuɔne ɔ,

³ Yawɛ tu munyu, nɛ i nu. Yawɛ he wami ba ye nɔ ngɛ Kebar pa a nya ngɛ Babilonia.

⁴ Ma wo ye yi nɔ ɔ, o nɛ ahumi nguaa ko nɛ hia kɛ je omleyi je kɛ ma. Oslabai ngɛ gbae nɔtonɔto kɛ ngɛ bɔku agbo ko mi jee. Hiɔwe ɔ nɛ bɔle bɔku ɔ tsuo ngɛ la pãe nylamnylam; nɔ́ ko ngɛ kpɛe kaa akɔblee ngɛ la a mi.

⁵ I na nɔ́ ko kaa hɛ kali eywiɛ ngɛ ahumi ɔ kpɛti; a ngɛ kaa nimli adesahi;

⁶ se a ti nɔ tsuaa nɔ ngɛ hɛ mi eywiɛ kɛ pɛli eywiɛ.

⁷ A nanehi ngɛ tlɔmɔtlɔmɔ, nɛ a nane si ngɛ kaa na nane si; nɛ a he ngɛ kpɛe hleii kaa akɔblee nɛ́ a sa he.

⁸ Nɔmlɔ ninehi ngɛ a pɛli ɔmɛ a sisi kakaaka.

⁹ A pɛli ɔmɛ tsa a sibi a nya, nɛ ke a ngɛ nyɛɛe ɔ, a plɛ we a he: a ti nɔ tsuaa nɔ yaa e hɛ mi tɛɛ.

¹⁰ Hɛ kali eywiɛ ɔmɛ ngɛ hɛ mi slɔɔtoslɔɔto eywiɛɛywiɛ. Bɔ nɛ a hɛ mi ɔmɛ ngɛ ji nɛ ɔ nɛ: nɔmlɔ hɛ mi ngɛ hɛ mi, jata hɛ mi ngɛ hiɔ nɔ, na hɛ mi ngɛ muɔ nɔ, nɛ kɔle hɛ mi ngɛ se je.

¹¹ A gbɛ a pɛli ɔmɛ a mi; a wo enyɔɔnyɔ nɔ ya bua nya ngɛ hiɔwe, nɛ nɔ tsuaa nɔ nɔ́ kɛ nɔ nɛ ngɛ e kasa nya a nɔ́ tsa; nɛ enyɔ ɔmɛ nɛ piɛ ɔ, a kɛ ha a nɔmlɔ tso ɔmɛ a he.

¹² Nɔ tsuaa nɔ nyɛɛɔ kɛ yaa e hɛ kpɛ tɛɛ; he tsuaa he nɛ mumi ɔ suɔ kaa a ya a, mɛ tsuo a yaa kutuu nɛ́ a plɛ we a he.

¹³ Nɔ́ ko ngɛ hɛ kali ɔmɛ a kpɛti jee kaa la ngu nɛ ngɛ tsoe. E ngɛ pãe kaa jatɛ kɛ nyɛɛ hɛ kali ɔmɛ a kpɛti kɛ ngɛ yae kɛ ngɛ bae. La a ngɛ kpɛe, nɛ oslabai ngɛ gbae kɛ ngɛ mi jee.

¹⁴ Hɛ kali ɔmɛ saa fo kɛ yaa kɛ baa kaa oslabai nɛ ngɛ gbae.

¹⁵ Benɛ i ngɛ hɛ kali ɔmɛ hyɛe ɔ, tlɔɔke nane eywiɛ ba ma si ngɛ a kasa nya kakaaka.

¹⁶ Tlɔɔke nane eywiɛ nɛ ɔmɛ je a sibi, nɛ a ngɛ kpɛe saminya kaa tɛ nɛ he jua wa. Bɔ nɛ a pee mɛ ɔ, tlɔɔke nane kpa hɔɔ si ngɛ eko tsuaa eko mi.

¹⁷ Lɔ ɔ he ɔ, tlɔɔke nane ɔmɛ tsuo nyɛɔ yaa hɛ mi, se je, hiɔ nɔ, loo muɔ nɔ nɛ a plɛ we a he; mɛ tsuo a nyɛɛɔ fiee.

¹⁸ Gahi nɛ a ka nɛ a he ngɛ gbeye ngɛ tlɔɔke nane eywiɛ ɔmɛ tsuo a mi, nɛ hɛngmɛhi bɔle ga amɛ a he tsuo kɛ kpe.

¹⁹ Ke hɛ kali ɔmɛ ngɛ nyɛɛe ɔ, tlɔɔke nane ɔmɛ hu nyɛɛɔ a kasa nya, nɛ ke hɛ kali ɔmɛ wo a he nɔ kɛ je zugba a, kɛkɛ tlɔɔke nane ɔmɛ hu wo a he nɔ.

²⁰ He tsuaa he nɛ a suɔ ɔ, lejɛ ɔ a yaa, nɛ tlɔɔke nane ɔmɛ kɛ mɛ tsuo peeɔ nɔ́ tsuaa nɔ́ si kake too; ejakaa hɛ kali ɔmɛ a mumi lɛ hɛɛ nane ɔmɛ.

²¹ Lɔ ɔ he ɔ, be tsuaa be nɛ hɛ kali ɔmɛ ngɛ nyɛɛe ɔ, nane ɔmɛ hu ngɛ nyɛɛe; nɛ ke a da si ɔ, mɛ tsuo a da si. Ke hɛ kali ɔmɛ wó a he nɔ kɛ je zugba a, kɛkɛ nane ɔmɛ tsuo hu pee ja, ejakaa hɛ kali ɔmɛ a mumi lɛ hɛɛ nane ɔmɛ.

²² Nɔ́ ko mluguduu nɛ ngɛ kpɛe klãiklãi kaa ahuhuɛ ngɛ hiɔwe ngɛ hɛ kali ɔmɛ a yi nɔ.

²³ Hɛ kali ɔmɛ bli a pɛli ɔmɛ a mi kɛ ya a sibi a ngɔ; nɔ kɛ e sibi nɛ ngɛ e kasa nya a nɔ́ kakaaka tsa. Hɛ kali ɔmɛ a ti nɔ tsuaa nɔ ngɔ pɛli enyɔ ngɔ ha e nɔmlɔ tso ɔ he.

²⁴ Benɛ a te kɛ yaa a, i nu a pɛli ɔmɛ a he kaa wo nɛ ngɛ fiae gudaguda, loo ta buli a ngmlaa hoo, loo Mawu Ope ɔ nitsɛ e gbi. Benɛ hɛ kali ɔmɛ ya da si ɔ, a ba a pɛli ɔmɛ si,

²⁵ se gbi ko pɛ ngɛ nɔ mluguduu ɔ nɛ ngɛ a yi nɔ ɔ yi mi.

²⁶ Ke o hyɛ ɔ, nɔ́ ko kaa matsɛ sɛ nɛ hɛɛ tɛ bluu su ngɛ nɔ́ mluguduu ɔ nɔ́, nɛ nɔ́ ko nɛ ngɛ kaa nɔmlɔ hii si ngɛ matsɛ sɛ ɔ nɔ.

²⁷ Kɛ je e he ko nɛ a ma tsɛ ke e mlɛ mi kɛ kuɔ ɔ, nɔ́ nɛ i na a pee kaa ayawa ngɛ la mi. Kɛ je e mlɛ mi kɛ ya pue sisi ɔ tsuo ngɛ kpɛe kaa la nɛ ngɛ tsoe plamplam.

²⁸ Alale su slɔɔtohi nɛ je kpo ngɛ mi ɔ ngɛ fɛu kaa nɔ́ ko. Bɔ nɛ Yawɛ hɛ mi nyami ɔ kpɛmi nɛ a be nyɛe maa kale ɔ je e he kpo ji nɛ ɔ nɛ. Benɛ i na nɔ́ nɛ ɔ, i tsɔ fia si, nɛ i ngɔ ye hɛ mi ngɔ bu zugba. Kɛkɛ nɛ i nu gbi ko nɛ ngɛ mi dee ke,