Ester 9 - BAIBLO ALOO NGMAMI KLƆUKLƆU Ɔ

Yuda bi ɔmɛ kpata a he nyɛli ɔmɛ a hɛ mi

¹ Nyɔhiɔ nɛ a tsɛɛ Adar a we ligbi nyɔngma kɛ etɛne ɔ ba su. Kikɛmɛ a ligbi nɛ ɔ ji be nɛ a to nɛ a kɛ mlaa nɛ matsɛ ɔ wo nɛ a fiɛ ha ma a ma bɔni ní tsumi. Ligbi nɛ ɔ kɛ̃ ji ligbi nɛ Yuda bi ɔmɛ a he nyɛli ɔmɛ to kaa a ma kpata Yuda bi ɔmɛ a hɛ mi ɔ nɛ. Se nɔ́ nɛ ba mohu ji kaa Yuda bi ɔmɛ ye a he nyɛli ɔmɛ a nɔ kunimi.

² Yuda bi ɔmɛ bua a he nya ngɛ ma amɛ a mi ngɛ nɔ yemi he ɔ he tsuaa he nɛ a ngɛ ɔ, nɛ a dla a he, konɛ a kɛ nɔ tsuaa nɔ nɛ maa ka kaa e maa ta a he, aloo e maa pee mɛ yayami ko ɔ nɛ to ní. Se nɔ ko nɔ ko nyɛ we nɛ e te si kɛ wo mɛ, ejakaa a he sawale nu ma amɛ tsuo.

³ Anɔkuale mi ɔ, nɔ yemi he ɔmɛ a ganɔ ɔmɛ tsuo, amlaalo ɔmɛ, ma nɔ hyɛli ɔmɛ, kɛ tsɔli nɛ ngɛ nɔ yemi he ɔmɛ piɛ Yuda bi ɔmɛ a he; ejakaa Mordekai he sawale nu mɛ tsuo.

⁴ Mordekai ba pee nɔmlɔ ngua ngɛ matsɛ we ɔ, nɛ e biɛ pɛ ngɛ nɔ yemi he ɔmɛ tsuo; ejakaa blɔ nya nɛ e hɛɛ ɔ ngɛ nɔ kuɔe, nɛ e nɔ gbɔ we gblee.

⁵ Lɔ ɔ he ɔ, Yuda bi ɔmɛ pee a he nyɛli ɔmɛ bɔ nɛ a suɔ. A ya tua mɛ, nɛ a kɛ klaate kpata a hɛ mi.

⁶ Ngɛ matsɛ ma nɛ a tsɛɛ ke Susa a kɛkɛ mi ɔ, Yuda bi ɔmɛ gbe nihi lafa enuɔ.

^7-10 Yuda bi ɔmɛ a he nyɛlɔ nɛ ji Hamedata bi Haman ɔ, bimɛ nyɔngma amɛ piɛ nihi nɛ a gbe ɔ a he. A biɛhi ji nɛ ɔmɛ nɛ: Parshandata, Dalfon, Aspata, Porata, Adalia, Aridata, Parmashta, Arisai, Aridai, kɛ Vaizata. A kpata ni ɔmɛ a hɛ mi mohu, se a hɛ ní.

¹¹ Jamɛ a ligbi ɔ, benɛ matsɛ ɔ na le nihi abɔ nɛ a gbe ngɛ matsɛ ma nɛ a tsɛɛ Susa a mi ɔ,

¹² e de Manyɛ Ester ke, “Yuda bi ɔmɛ gbe nihi lafa enuɔ ngɛ Susa nɛ ji ma ngua a kɛkɛ mi; a gbe Haman binyumu nyɔngma amɛ hulɔ. Ke a nyɛ tsu kikɛmɛ a ní nɛ ɔ ngɛ Susa ma nɛ ɔ pɛ mi ɔ, lɛɛ ye nɔ yemi he kpa amɛ lɛɛ kɛ níhi maa hi kɛɛ?” Matsɛ Ahasuerus ya nɔ nɛ e bi manyɛ ɔ ke, “Mɛni o ngɛ hlae ekohu? Nɔ́ tsuaa nɔ́ nɛ o ngɛ hlae ngɛ enɛ ɔ se ɔ, de mi, nɛ ma ha mo.”

¹³ Ester he nɔ ke, “Nɛnɛ, i kpa mo pɛɛ, nɔ́ nɛ a ha Yuda bi ɔmɛ pee mwɔnɛ ɔ, ha nɛ a pee ja ekohu hwɔɔ. Jehanɛ, fa nɛ a sɛu Haman binyumu nyɔngma amɛ ngɛ sɛumi tsohi a nɔ.”

¹⁴ Matsɛ ɔ fa ke a pee nɔ́ nɛ ɔ. Lɔ ɔ he ɔ, a wo mlaa nɛ a fiɛ ngɛ Susa ma a mi. Lɔ ɔ se ɔ, a sɛu Haman bimɛ nyɔngma amɛ ngɛ sɛumi tsohi a nɔ.

¹⁵ Nyɔhiɔ ɔ nɛ a tsɛɛ Adar a we ligbi nyɔngma kɛ eywiɛne ɔ nɔ ɔ, Yuda bi ɔmɛ nɛ ngɛ Susa a bua a he nya ekohu, nɛ a gbe ma a mi bi lafa etɛ kɛ piɛ nihi nɛ a gbe kekle ɔ a he. Se kaa bɔ nɛ a pee kekle ɔ, hɛ ní.

¹⁶ Yuda bi nɛ ngɛ nɔ yemi he ɔmɛ hu to blɔ nya kɛ plee a wami he. Bɔ nɛ pee nɛ a je a he nyɛli ɔmɛ a dɛ mi, nɛ a he nɛ jɔ mɛ ɔ, a gbe nihi nɛ sume mɛ ɔ akpe nyingmi kpaago kɛ enuɔ. Se a hɛ ní.

¹⁷ Nyɔhiɔ nɛ a tsɛɛ Adar a we ligbi nyɔngma kɛ etɛne ɔ nɔ nɛ a tsu nɔ́ nɛ ɔ nɛ. E nɔ jena nɛ ji nyɔhiɔ ɔ ligbi nyɔngma kɛ eywiɛne ɔ nɔ ɔ, a kpataa we nɔ ko hɛ mi, se mohu a tsɛ ní yemi; a ye ní nɛ a nu ní, nɛ a nya jamɛ a ligbi ɔ.

¹⁸ Yuda bi ɔmɛ nɛ ngɛ Susa a, mɛɛ lɛɛ a kɛ ligbi nyɔngma kɛ enuɔne ɔ pee a nyami ligbi, nɛ a jɔɔ a he. Ejakaa ligbi nyɔngma kɛ etɛne ɔ, kɛ nyɔngma kɛ eywiɛne ɔ, a hɛ dɔ kɛ ngɛ a he nyɛli ɔmɛ a hɛ mi kpatae.

¹⁹ Enɛ ɔ he je ɔ, Yuda bi nɛ ngɛ ma wawi a mi ɔ yeɔ nyɔhiɔ nɛ a tsɛɛ Adar a we ligbi nɛ ji nyɔngma kɛ eywiɛ ɔ kaa a nyami ligbi, nɛ a bua jɔɔ a he. A yeɔ ní nɛ a nuɔ ní, nɛ a kee a sibi niye ní.

Nyami be nɛ a tsɛɛ Purim ɔ

²⁰ Mordekai ha nɛ a ngma sane nɛ ɔ nɛ ba a ngɔ fɔ si; nɛ e ngma womi kɛ mane Yuda bi ɔmɛ tsuo ngɛ Matsɛ Ahasuerus nɔ yemi he ɔmɛ tsuo, nihi nɛ a he kɛ, kɛ ni nɛmɛ nɛ ngɛ kpo nya a tsuo.

²¹ E de mɛ ke, daa jeha a, á ye ligbi nyɔngma kɛ eywiɛne ɔ, kɛ nyɔngma kɛ enuɔne ɔ ngɛ nyɔhiɔ Adar a mi kaa he jɔɔmi ligbihi.

²² Ligbi nɛ ɔmɛ a nɔ nɛ Yuda bi ɔmɛ kpata a he nyɛli ɔmɛ a hɛ mi ɔ nɛ. Jinɛ nyɔhiɔ nɛ ɔ maa pee aywilɛho kɛ kɔmɔ yemi be, se e ba plɛ pee bua jɔmi kɛ nyami be mohu. Bɔ nɛ a tsɔɔ mɛ ke a ye nyami ligbi nɛ ɔmɛ ji a tsɛ nihi ní yemi, nɛ a nya; a ke a sibi, kɛ ohiatsɛmɛ niye ní, kɛ ohiatsɛmɛ hu ní kpakpahi.

²³ Yuda bi ɔmɛ pee bɔ nɛ Mordekai tsɔɔ mɛ kaa a pee ɔ, nɛ nyami be nɛ ɔ ba plɛ pee kusumi ko nɛ a peeɔ daa jeha.

²⁴ Hamedata bi Haman, Agag nina a ji Yuda bi ɔmɛ tsuo a he nyɛlɔ. E so Yuda bi ɔmɛ a yi nɔ nɛ e ma kpata mɛ tsuo a hɛ mi. E fɔ sɔ konɛ e na ligbi pɔtɛɛ nɛ a ma tsu yi wu tso ní nɛ ɔ. (A tsɛɔ sɔ fɔmi ke Purim ngɛ Hebri gbi mi.)

²⁵ Se Ester ba na matsɛ ɔ, nɛ matsɛ ɔ ngma womi kɛ tsi ga yaya nɛ Haman to kɛ ha Yuda bi ɔmɛ ɔ nya. Bɔ nɛ e ya ba ha ji kaa nɔ́ nɛ e hla kaa e maa pee Yuda bi ɔmɛ ɔ, a kɛ pee lɛ nitsɛ mohu. Lɔ ɔ ji kaa a sɛu lɛ kɛ e binyumu ɔmɛ tsuo.

²⁶ Enɛ ɔ he je nɛ a tsɛɔ nyami ligbi nɛ ɔmɛ ke Purim ɔ nɛ.

²⁷ Yuda bi ɔmɛ wo mlaa nɛ fɔɔ si daa kɛ ha mɛ nitsɛmɛ, kɛ a nina, kɛ nɔ ko nɛ ma ba pee Yuda no ɔ tsuo, kaa daa jeha, ngɛ be nɛ a to ɔ mi tutuutu ɔ, a ye ligbi enyɔ nɛ ɔmɛ kaa bɔ nɛ Mordekai ngma a pɛpɛɛpɛ.

²⁸ A fua fɔ nɔ kaa Yuda bi a weku tsuo, ngɛ yi nɔhi nɛ maa ba a a mi, ngɛ nɔ yemi he ɔmɛ tsuo, kɛ ma amɛ tsuo a mi ɔ, a kai nɛ a ye Purim ligbi nɛ ɔmɛ daa.

²⁹ Jehanɛ, Manyɛ Ester, Abihail biyo ɔ hu ngma womi, nɛ e kɛ e he wami tsuo pi nɔ́ nɛ Mordekai ngma momo nɛ kɔɔ Purim he ɔ se kpɛii.

³⁰ A ngma womi nɛ ɔ kɛ ya ha Yuda bi ɔmɛ tsuo ngɛ nɔ yemi he lafa kɛ nyingmi enyɔ kɛ kpaago nɛ ngɛ Matsɛ Ahasuerus nɔ yemi ɔ mi ɔ. Womi ɔ tsɔɔ kaa Yuda bi ɔmɛ na tue mi jɔmi, kɛ he jɔmi.

³¹ E tsɔɔ hu kaa mɛ nitsɛmɛ, kɛ a nina tsuo a ye Purim ligbi ɔmɛ ngɛ a be ɔ mi tutuutu kaa bɔ nɛ mɛ nitsɛmɛ a wo mlaahi kɛ ha hwɔ hami, nɛ a to behi nɛ a kɛ yeɔ kɔmɔ ɔ. Bɔ nɛ Mordekai kɛ Manyɛ Ester tsuo fa ke a pee ji nɛ ɔ nɛ.

³² Mlaa nɛ Manyɛ Ester wo nɛ ɔ ma Purim blɔ nya tomi ɔmɛ a nɔ mi. Nɛ a ngma kɛ wo womi mi.