Ester 7 - BAIBLO ALOO NGMAMI KLƆUKLƆU Ɔ

¹ Kɛkɛ nɛ matsɛ ɔ, kɛ Haman ho konɛ a kɛ Manyɛ Ester ya ye ní

² si enyɔne. Benɛ a ngɛ dã nue ɔ, matsɛ ɔ bi Ester ekohu ke, “Manyɛ Ester, jehanɛ, mo de mi koo. Mɛni o ngɛ hlae? Ke ye nɔ yemi ɔ mi fa po o ngɛ hlae ɔ, ma ha mo.”

³ Manyɛ Ester he nɔ ke, “I kpa nɛnɛ pɛɛ, ke e sa nɛnɛ hɛ mi kaa e ma ha mi nɔ́ nɛ i kɛ he si bami ngɛ lɛ bie ɔ, lɛɛ nɛnɛ, nɔ́ nɛ i suɔ ji kaa ye yi nɛ na wami, nɛ ye ma mi bi ɔmɛ hu a yi nɛ na wami.

⁴ A jua i kɛ ye ma mi bi ɔmɛ ngɔ ha, konɛ a kpata wa hɛ mi. Kaa nyɔguɛ yemi mi kɛkɛ nɛ a jua wɔ kɛ ho ɔ, i ko de we nɔ́ ko, nɛ i ko gba we nɛnɛ nya; se a miɔ nɛ a ma kpata wa hɛ mi pɛsɛpɛsɛ!”

⁵ Kɛkɛ nɛ Matsɛ Ahasuerus bi Manyɛ Ester ke, “Mɛnɔ po nɛ e to e yi mi kaa e maa pee nɔ́ ko kaa kikɛ nɛ ɔ? Jije jamɛatsɛ ɔ ngɛ?”

⁶ Manyɛ Ester he nɔ ke, “Wa he nyɛlɔ, kɛ nɔ nɛ ngɛ wɔ yi mi wae ɔ ji yiwutsotsɛ nɛ ɔ nɛ a tsɛɛ lɛ Haman ɔ!” Haman kɛ sawale hyɛ matsɛ ɔ, kɛ manyɛ ɔ a hɛ mi gaa.

⁷ Matsɛ ɔ hɛ dɔ, nɛ e je kpo kɛ ho abɔɔ ɔ nɛ ngɛ matsɛ we ɔ mi ya. Haman na kaa matsɛ ɔ to e yi mi kaa e ma kpata e hɛ mi ngɛ nɔ́ nɛ ɔ he; lɔ ɔ he ɔ, lɛ Haman ɔ lɛɛ e mlɛ ngɛ se, konɛ e kpa Manyɛ Ester pɛɛ nɛ a ngɔ e wami kɛ ke lɛ.

⁸ Benɛ e ya bu si ngɛ Manyɛ Ester sɛ ɔ nɔ ɔ, matsɛ ɔ kpale e se kɛ je abɔɔ ɔ mi kɛ ba tsu ɔ mi. Benɛ matsɛ ɔ na nɔ́ nɛ ɔ, e kpa ngmlaa ke, “Anɛ nyumu nɛ ɔ ngɛ hlae nɛ e tua manyɛ ɔ ngɛ hiɛ ɔ, ngɛ ye hɛ mi, ngɛ imi nitsɛ ye we mi lo?” Matsɛ ɔ nya nɔɛ si tete nɛ nihi nɛ a puɛ mɛ ɔ kɛ nɔ́ ko ba ha Haman hɛ mi.

⁹ A kpɛti nɔ kake nɛ a tsɛɔ lɛ Habona a de ke, “Nɛnɛ, Haman pee sɛumi tso gagaaga ko po ngɛ e we ɔ mi, konɛ e sɛu Mordekai, nɔ nɛ he o yi wami ɔ ngɛ nɔ. Sɛumi tso ɔ hiɔwe yami ji gugue nyɔngma kɛ enyɔ kɛ fa!” Matsɛ ɔ fa ke, “Nyɛ ya sɛu Haman ngɛ nɔ!”

¹⁰ Nɛ a ya sɛu Haman ngɛ tso nɛ e pee kɛ ha Mordekai ɔ nɔ. Kɛkɛ nɛ Matsɛ ɔ mi mi fumi ɔ se po.