Ester 6 - BAIBLO ALOO NGMAMI KLƆUKLƆU Ɔ

Matsɛ ɔ wo Mordekai hɛ mi nyami

¹ Jamɛ a nyɔ ɔ mi ɔ, matsɛ ɔ nyɛ we nɛ e hwɔ mahe; lɔ ɔ he ɔ, e fa ke a ya ngɔ yi nɔ sanehi womi ɔ kɛ ba, nɛ a ba kane ha lɛ.

² Nɔ́ nɛ a kane ɔ tsɔɔ bɔ nɛ be ko ɔ, Bigtana kɛ Teresh so wo matsɛ ɔ he, konɛ a gbe lɛ, kɛ bɔ nɛ Mordekai je a sisi kpo. Bigtana kɛ Teresh ji matsɛ we ɔ he buli enyɔ komɛ nɛ a puɛ mɛ.

³ Kɛkɛ nɛ Matsɛ Ahasuerus bi ke, “Nɛ́ Mordekai tsu kikɛmɛ a ní tsumi nɛ ɔ, anɛ wa wo e hɛ mi nyami, aloo wa ha lɛ blɔ nya ko lo?” E tsɔli ɔmɛ he nɔ ke, “A pee we nɔ́ ko nɔ́ ko ha we lɛ.”

⁴ Matsɛ ɔ bi si ke, “Anɛ ma ní tsuli ɔmɛ ekomɛ ngɛ matsɛ we ɔ mi lo?” Jamɛ a be ɔ, Haman ba matsɛ we ɔ agbo nya kue ɔ mi. E ba nɛ e ba de matsɛ ɔ nɛ e ha a ya sɛu Mordekai ngɛ tso nɛ lɛ, Haman ɔ pee kɛ ha Mordekai ɔ nɔ.

⁵ Kɛkɛ nɛ tsɔli ɔmɛ ba de matsɛ ɔ ke, “Haman ba hiɛ ɔ, nɛ e suɔ kaa e maa na mo.” Matsɛ ɔ de ke, “Nyɛ ha nɛ e ba.”

⁶ Benɛ Haman ba e ngɔ ɔ, matsɛ ɔ de lɛ ke, “Nyumu ko ngɛ nɛ i suɔ wawɛɛ kaa ma wo e hɛ mi nyami. Mɛni sa kaa ma pee ha lɛ?” Haman bi e he ke, “Mɛnɔ po matsɛ ɔ maa suɔ kaa e maa wo e hɛ mi nyami kikɛ nɛ ɔ? Nɔ́ jemi ko kulaa be he kaa imi ji jamɛ a nɔ ɔ nɛ.”

^7-8 Lɔ ɔ he ɔ, heto nɛ e ha matsɛ ɔ ji, “Nɛnɛ, fa nɛ a ngɔ ablade tade, tade nɛ mo nɛnɛ nitsɛ o woɔ, kɛ ba ha nyumu nɛ ɔ. Ha nɛ a ya ngɔ okpɔngɔ nɛ nɛnɛ nitsɛ hii nɔ ɔ kɛ ba, nɛ a kɛ nɛnɛ jlasi nɛ fɔ nɔ.

⁹ Jehanɛ, ha nɛ ganɔ ɔmɛ a ti nɔ kake nɛ hɛ mi ngɛ nyami babauu nɛ ngɔ ablade tade ɔ kɛ wo nyumu ɔ, nɛ a ha e hi okpɔngɔ ɔ nɔ, nɛ a kɛ lɛ nɛ po si ngɛ ma nɔ. Ganɔ ɔmɛ a ti nɔ kake nɛ hi fiɛe kɛ nyɛɛ e hɛ mi ke, ‘Bɔ nɛ matsɛ ɔ suɔ kaa e maa wo nɔ nɛ e suɔ ɔ hɛ mi nyami ji nɛ ɔ nɛ!’ ”

¹⁰ Kɛkɛ nɛ matsɛ ɔ de Haman ke, “Ngɔɔ ablade tade ɔ, kɛ okpɔngɔ ɔ esɔ, nɛ o ya pee ní nɛ ɔmɛ kɛ wo Yuda no ɔ nɛ a tsɛɛ lɛ Mordekai ɔ hɛ mi nyami. Pee kaa bɔ nɛ o de ɔ pɛpɛɛpɛ ha lɛ. O maa na lɛ nɛ hii si ngɛ matsɛ we ɔ agbo ɔ nya.”

¹¹ Haman ya ngɔ ablade tade ɔ, kɛ okpɔngɔ ɔ, nɛ e kɛ tade ɔ ya wo Mordekai. Mordekai hi okpɔngɔ ɔ nɔ, nɛ Haman nyɛɛ e hɛ mi nɛ e kɛ lɛ po si ngɛ ma nɔ. Benɛ a yaa a tsuo, Haman ngɛ fiɛe ke, “Bɔ nɛ matsɛ ɔ suɔ kaa e maa wo nɔ nɛ e suɔ ɔ hɛ mi nyami ji nɛ ɔ nɛ!”

¹² Jehanɛ, Mordekai kpale kɛ ba matsɛ we ɔ agbo ɔ nya ekohu, se Haman lɛɛ e ha e yi nɔ, nɛ e ho e we mi ya mlamlaamla kɛ zo kpɔtɔɔ.

¹³ E de e yo, Zeresh, kɛ e huɛmɛ ɔmɛ tsuo níhi nɛ ba e nɔ ɔ. Kɛkɛ nɛ e yo ɔ, kɛ e huɛmɛ ní leli ɔmɛ de Haman ke, “Mordekai bɔni o he wami kpɔmi. Yuda no ji lɛ, lɔ ɔ he ɔ, o be lɛ nyɛe. Bɔ tsuaa bɔ nɛ pee ɔ, e maa ye o nɔ.”

A gbe Haman

¹⁴ Benɛ a ngɛ munyu ɔ tue kɛ mwɔɔ ɔ, matsɛ tsɔli ɔmɛ nɛ a puɛ mɛ ɔ ba kplakplaakpla, nɛ a ba ngɔ Haman kɛ ho, konɛ e kɛ Manyɛ Ester ya ye ní.