Ester 5 - BAIBLO ALOO NGMAMI KLƆUKLƆU Ɔ

Ester tsɛ matsɛ ɔ kɛ Haman ní yemi

¹ Ester nitsɛ ha hwɔ. Ligbi etɛne ɔ, Ester wo e manyɛ tade ɔ, nɛ e be kɛ ho matsɛ we ɔ ya. E ya da si ngɛ kue nɛ ngɛ matsɛ we ɔ kpɛti ɔ mi. Kue nɛ ɔ ngɛ tsu nɛ matsɛ sɛ ɔ ngɛ mi ɔ hanɔ. Jamɛ a be ɔ, matsɛ ɔ hii si ngɛ e sɛ ɔ nɔ, nɛ e hɛ mi kpee sinya a nya blɔ.

² Benɛ e na Manyɛ Ester nɛ daa si ngɛ kpo ɔ nɔ ɔ, e na e he bua jɔmi, nɛ e wo e matsɛ tso nɛ a kɛ sika tsu pee ɔ nɔ kɛ tsɔɔ lɛ. Kɛkɛ nɛ manyɛ ɔ ba matsɛ ɔ ngɔ, nɛ e kɛ e nine ba ta matsɛ tso ɔ he ngɛ e yi je.

³ Matsɛ ɔ bi lɛ ke, “Manyɛ Ester, mɛni sane? Mɛni o ngɛ hlae nɛ ma pee ha mo? Ke ye nɔ yemi he ɔ mi fa po o ngɛ hlae ɔ, de mi, nɛ ma ha mo.”

⁴ Ester he nɔ ke, “I dla niye ní kɛ to nɛnɛ mwɔnɛ ɔ. I ngɛ pɛɛ kpae kaa ke e sa nɛnɛ hɛ mi ɔ, ma suɔ kaa nɛnɛ kɛ Haman nɛ ba, konɛ nyɛɛ kɛ mi ba ye ní.”

⁵ Matsɛ ɔ fa ke a tsɛ Haman kɛ ba esɔesɔ, konɛ a ya nɛ a kɛ Manyɛ Ester ya ye ní. Kɛkɛ nɛ matsɛ ɔ kɛ Haman ho nɛ á ya ye ní.

⁶ Benɛ a ngɛ dã nue ɔ, matsɛ ɔ bi manyɛ ɔ ke, “Manyɛ Ester, mɛni ji o sane ɔ? Mɛni o ngɛ hlae? Ke ye nɔ yemi he ɔ mi fa po o ngɛ hlae ɔ, de mi, nɛ ma ha mo.”

⁷ Ester he nɔ ke, “Nɔ́ nɛ i ngɛ bie ji nɛ ɔ nɛ.

⁸ Ke e sa nɛnɛ hɛ mi kaa nɛnɛ ma ha mi nɔ́ nɛ ma bi lɛ ɔ, lɛɛ nɛnɛ kɛ Haman kɛ mi nɛ ba ye ní ekohu hwɔɔ. Jamɛ a be ɔ mi ɔ, ma tsɔɔ nɛnɛ nɔ nɛ i ngɛ hlae.”

Haman to ga nɛ e kɛ maa gbe Mordekai

⁹ Benɛ Haman je ní yemi he ɔ, e bua jɔ e he saminya. Se benɛ e na Mordekai ngɛ matsɛ we ɔ agbo ɔ nya, nɛ Mordekai bui lɛ, nɛ e ti si ha lɛ ɔ, Haman mi mi fu wawɛɛ nitsɛ.

¹⁰ Se e nu e tsui, nɛ e ho e we mi ya. Kɛkɛ nɛ e ya tsɛ e huɛmɛ kɛ ba e we ɔ mi, nɛ e tsɛ e yo Zeresh kɛ piɛ a he.

¹¹ E fĩa kɛ tsɔɔ mɛ bɔ nɛ e na ní kpɔtɔɔ ha, binyumuhi abɔ nɛ e ngɛ, bɔ nɛ matsɛ ɔ wó e nɔ gojoo ngɛ nɔ yemi he ɔ, kɛ bɔ nɛ e he hia pe matsɛ ɔ ganɔ ɔmɛ, kɛ tsɔli kpa amɛ tsuo.

¹² Haman ya nɔ nɛ e de ke, “Nyɛɛ hyɛ, nɛ́ Manyɛ Ester ma tsɛ Matsɛ Ahasuerus ní yemi ɔ, e tsɛ we nɔ ko nɔ ko kɛ piɛ we e he, pe imi Haman pɛ. Hwɔɔ hu, Manyɛ Ester kpale tsɛ imi kɛ̃ kɛ matsɛ ɔ ní yemi ekohu.

¹³ Se ní nɛ ɔmɛ ekoeko ha we mi bua jɔmi, be abɔ nɛ i ngɛ jamɛ a Yuda no ɔ nɛ a tsɛɛ lɛ Mordekai ɔ hyɛe nɛ e hii si ngɛ matsɛ we ɔ agbo ɔ nya a.”

¹⁴ Kɛkɛ nɛ e yo Zeresh kɛ e huɛmɛ ɔmɛ tsuo de lɛ ke, “Ha nɛ a pee tso nɛ a maa sɛu nɔ ngɛ nɔ: e hiɔwe yami nɛ pee gugue nyɔngma kɛ enyɔ kɛ fa. Hwɔɔ mɔtu ɔ, de matsɛ ɔ nɛ e ha nɛ a sɛu Mordekai ngɛ nɔ. Lɔ ɔ se ɔ, o kɛ matsɛ ɔ nɛ ya ní yemi nɛ a tsɛ nyɛ ɔ kɛ bua jɔmi.” Ga nɛ a wo Haman ɔ sa e hɛ mi saminya; nɛ e ha a pee tso nɛ a maa sɛu nɔ ngɛ nɔ ɔ.