Ester 4 - BAIBLO ALOO NGMAMI KLƆUKLƆU Ɔ

Mordekai bi Ester ke e piɛ Yuda bi ɔmɛ a he

¹ Benɛ Mordekai na le níhi tsuo nɛ a pee ɔ, e kɛ hía e tade ɔmɛ ngɛ e he. E ha kpekpe ya bo, nɛ e muɔ la zu ngɔ pue e yi mi; kɛkɛ nɛ e je kpo kɛ nyɛɛ ma a mi kɛ ya boboobo, hluu

² kɛ ya su matsɛ we ɔ agbo ɔ nya tɔɔ. E sɛ́ we ɔ mi; ejakaa nɔ ko nɔ ko be he blɔ kaa e haa kpekpe kɛ yaa lejɛ ɔ.

³ He tsuaa he nɛ a fiɛ matsɛ ɔ mlaa a kɛ ya su ɔ, Yuda bi ɔmɛ nyaa awe, nɛ a yeɔ kɔmɔ. A haa hwɔ, nɛ a woɔ yana kɛ ngmlaa. Nihi babauu nitsɛ ha kpekpe ya bo, nɛ a hwɔ la zu mi.

⁴ Benɛ Ester mawayi ɔmɛ, kɛ nihi nɛ a puɛ mɛ ɔ ba sɛɛ nɔ́ nɛ Mordekai ngɛ pee ɔ ha lɛ ɔ, Ester hao wawɛɛ. E tsɔ nɛ a ya ngɔ tadehi kɛ ba, konɛ a kɛ ya wo Mordekai, nɛ́ e je kpekpe ɔ ngɛ e he. Se Mordekai he we tade ɔmɛ.

⁵ Kɛkɛ nɛ e tsɛ Hatak. Hatak nɛ ɔ ji nihi nɛ a puɛ mɛ ɔ a ti nɔ kake nɛ a to nɛ sɔmɔɔ Ester ngɛ matsɛ we ɔ. Ester tsɔ lɛ Mordekai ngɔ, konɛ e ya bi lɛ sane nɛ ba, kɛ nɔ́ he je loko e ngɛ e ní pee kaa jã a.

⁶ Kɛkɛ nɛ Hatak ho ya na Mordekai ngɛ ma a kpe he ɔ, ngɛ matsɛ we ɔ agbo ɔ nya.

⁷ Mordekai de lɛ nɔ́ tsuaa nɔ́ nɛ ba e nɔ, kɛ sika bɔ nɛ Haman wo si ke e ma ha nɛ a kɛ ya to matsɛ sika tomi he ɔ, ke a kpata Yuda bi ɔmɛ tsuo a hɛ mi ɔ.

⁸ Jehanɛ, e ha Hatak womi ɔ nɛ a ngma mlaa a ngɔ wo mi, nɛ́ je kpo ngɛ Susa ma a mi ke a kpata Yuda bi ɔmɛ a hɛ mi ɔ eko. Mordekai de lɛ ke e ngɔ womi ɔ kɛ ya ha Ester, nɛ́ e tsɔɔ lɛ sane ɔ mi fitsofitso; nɛ e de lɛ ke e ya fa kue ha matsɛ ɔ, nɛ́ e kpa lɛ pɛɛ nɛ e na e ma mi bi ɔmɛ mɔbɔ.

⁹ Hatak ba bɔ Ester nɔ́ nɛ Mordekai de lɛ ɔ.

¹⁰ Nɛ Ester ngɔ sɛ gbi nɛ ɔ ngɔ ha lɛ ke e kɛ ya ha Mordekai ke,

¹¹ “Ke nɔ ko, nyumu jio, yo jio ba na matsɛ ɔ ngɛ kue ɔ nɛ ngɛ we ɔ kpɛti ɔ mi, nɛ pi kaa a tsɛ lɛ ke e ba a, jamɛ a nɔ ɔ, a maa gbe lɛ. Bɔ nɛ mlaa a ngɛ ji nɛ ɔ nɛ. Nɔ tsuaa nɔ, kɛ je matsɛ ɔ ga woli ɔmɛ a nɔ kɛ ya si ni ɔmɛ nɛ a ngɛ nɔ yemi he ɔmɛ tsuo le nɔ́ nɛ ɔ. Ja matsɛ ɔ wo e matsɛ tso nɛ a kɛ sika tsu pee ɔ nɔ kɛ tsɔɔ nɔ ɔ, loko nɔ ɔ yi ma na wami. Kɛ je be nɛ i ya matsɛ ɔ ngɔ ba nɛ ɔ, nyɔhiɔ kake ji nɛ ɔ, nɛ e na we nɛ e tsɛ mi lolo.”

¹² Benɛ Mordekai nine su Ester sɛ ɔ nɔ ɔ,

¹³ e tsɔ kɛ ya bɔ lɛ kɔkɔ ke, “Mo ko susu kaa nɛ o ngɛ matsɛ ɔ we mi he je ɔ, o ye o he. O ngɛ kaa Yuda bi kpa amɛ kɛ̃.

¹⁴ Ke o de we nɔ́ ko ngɛ be kaa kikɛ nɛ ɔ mi ɔ, yi wami hemi maa je he kpa ko kɛ ba ha Yuda bi ɔmɛ; se moo lɛɛ, o ma gbo, nɛ o tsɛ we ɔ biɛ maa laa pɛsɛpɛsɛ. Se mɛnɔ maa le? Eko ɔ, be nɛ ngɛ kaa kikɛ nɛ ɔ he nɛ a wo mo manyɛ ngɛ ɔ nɛ!”

¹⁵ Ester hu tsɔ kɛ ya ha Mordekai heto ke,

¹⁶ “Yaa bua Yuda bi ɔmɛ tsuo nɛ ngɛ Susa ma a mi ɔ a nya, nɛ nyɛɛ ha hwɔ ha mi. Nyɛ ko ye ní, nɛ nyɛ ko nu nyu hulɔ nyɔ kɛ pia ligbi etɛ. Imi nitsɛ, kɛ ye mawa amɛ hu wa maa pee ja. Lɔ ɔ se ɔ, ma ya matsɛ ɔ ngɔ. E ngɛ mi kaa mlaa a nya a, i be jamɛ a he blɔ ɔ lɛɛ, se ke e hia kaa ma gbo ngɛ enɛ ɔ mi ɔ, ma gbo.”

¹⁷ Kɛkɛ nɛ Mordekai ho nɛ e ya pee nɔ́ tsuaa nɔ́ nɛ Ester de lɛ ke e pee ɔ.