Ester 3 - BAIBLO ALOO NGMAMI KLƆUKLƆU Ɔ

Haman to ga nɛ a kpata Yuda bi ɔmɛ a hɛ mi

¹ Enɛ ɔmɛ a se ɔ, Matsɛ Ahasuerus wó nyumu ko nɛ a tsɛɛ lɛ Haman nɔ, nɛ e pee lɛ e ganɔ ɔmɛ a nɔkɔtɔma. Hamedata bi Haman ɔ, Agag nina ji lɛ.

² Matsɛ ɔ fa e tsɔli ɔmɛ tsuo nɛ ngɛ e sisi ɔ ke a bu Haman, nɛ a kpla si kɛ ha lɛ. Ni ɔmɛ tsuo peeɔ ja, se Mordekai kpla we si ha lɛ fɛɛ!

³ Tsɔli kpa amɛ nɛ a ngɛ matsɛ ɔ ní tsumi ɔ mi ɔ bi Mordekai nɔ́ he je nɛ e pee we nɔ́ nɛ matsɛ ɔ fa ke a pee ɔ.

⁴ Daa nɛ ɔ, a nyɛɛ e nɔ ke e ye mlaa nɛ matsɛ ɔ wo ɔ nɔ kɛkɛ, se nɔ́ nɛ e deɔ ji, “Yuda no ji mi, lɔ ɔ he ɔ, i be nyɛe ma kpla si ha Haman.” A ya sɛɛ nɔ́ nɛ Mordekai de ɔ ha Haman, nɛ a ngɛ hyɛe nɔ́ nɛ e maa pee Mordekai.

⁵ Benɛ Haman kpá si kaa Mordekai bui lɛ, nɛ e kpla we si ha we lɛ ɔ, e hɛ dɔ;

⁶ nɛ benɛ e na le kaa Yuda no ji Mordekai ɔ, e to ga kaa e be Mordekai nɔ kake pɛ e tue gblae, se mohu e ma kpata Yuda bi tsuo pɛpɛɛpɛ a hɛ mi ngɛ Ahasuerus nɔ yemi he ɔmɛ tsuo.

⁷ Matsɛ Ahasuerus tsɛ yemi be ɔ mi jeha nyɔngma kɛ enyɔne ɔ we kekleekle nyɔhiɔ nɛ a tsɛɛ Nisan ɔ, Haman fa ke a fɔ sɔ, konɛ a kɛ na ligbi nɔ, kɛ nyɔhiɔ mi nɛ sa kaa a tsu nɔ́ nɛ e to ga kaa a pee ɔ. Sɔ ɔ tsɔɔ kaa nyɔhiɔ nyɔngma kɛ enyɔne ɔ nɛ a tsɛɛ Adar a we ligbi nyɔngma kɛ etɛ ɔ ji be nɛ sa; lɔ ɔ he ɔ, a ngɔ jamɛ a ligbi ɔ. (A tsɛɛ sɔ fɔmi ngɛ Hebri gbi mi ke “Purim”.)

⁸ Lɔ ɔ se ɔ, Haman ya de Matsɛ Ahasuerus ke, “Nɛnɛ, ma ko ngɛ nɛ e mi bi gbɛ fĩa ma amɛ tsuo a mi ngɛ o nɔ yemi he ɔmɛ tsuo. Mɛɛ lɛɛ e slo a kusumihi ngɛ je ma kpa amɛ tsuo a ní ɔmɛ a he. Jehanɛ hu, nɛnɛ, a yi o mlaa amɛ a nɔ, lɔ ɔ he ɔ, e he be se nami ko ha mo kaa o maa pee kɔ maa hi mɛ hyɛe kikɛ nɛ ɔ.

⁹ Nɛnɛ, ke e sa o hɛ mi ɔ, lɛɛ fa nɛ a ngma, nɛ a fiɛ ke a kpata a hɛ mi. Ke o pee ja a, i ngɛ si woe ke ma ha sika hiɔ nɛ jiimi pe kilo 340,000, nɛ a kɛ to matsɛ sika tomi he ɔ, konɛ a kɛ tsu ma ní.”

¹⁰ Kɛkɛ nɛ matsɛ ɔ je e nine nguɛ ga, nɛ e kɛ ha Agag nina, Hamedata bi Haman, Yuda bi ɔmɛ a he nyɛlɔ ɔ. Ga nɛ ɔ a kɛ sɔuɔ matsɛ ɔ mlaahi nɛ a wo ɔ a nya kɛ tsɔɔ kaa matsɛ ɔ kplɛɛ níhi nɛ a ngma a nɔ.

¹¹ Matsɛ ɔ de Haman ke, “O sika a nɛ hi si. Jamɛ a ma a kɛ e mi bi ɔmɛ ngɛ o dɛ mi; pee mɛ bɔ nɛ sa o hɛ mi.”

¹² Lɔ ɔ he ɔ, kekleekle nyɔhiɔ ɔ ligbi nyɔngma kɛ etɛne ɔ nɔ ɔ, Haman tsɛ matsɛ womi ngmali ɔmɛ nɛ e tsɔɔ mɛ nɔ́ nɛ a ngma. A ngma ngɛ zugba tsuaa zugba e ningma, kɛ e gbi mi; nɛ a kɛ mane nɔ yeli ɔmɛ, amlaalo ɔmɛ, kɛ ganɔ ɔmɛ tsuo. A ngma ngɛ Matsɛ Ahasuerus biɛ mi, nɛ a kɛ matsɛ ɔ nguɛ ga a sɔu nya.

¹³ Tsɔli nɛ a he sɔɔ saminya ngɔ womi nɛ ɔmɛ kɛ ya he tsuaa he ngɛ e nɔ yemi he ɔ. Bɔ nɛ a ngma ngɛ womi ɔmɛ a mi ji nɛ ɔ nɛ: nyɔhiɔ nɛ a tsɛɛ ke Adar a we ligbi nyɔngma kɛ etɛne ɔ, jamɛ a ligbi ɔ nɔ tutuutu ɔ, á kpata Yuda bi tsuo pɛpɛɛpɛ a hɛ mi; jokuɛwi, nikɔtɔmahi, nyumuhi, kɛ yihi. Á kɛ yi mi wami nɛ kpata mɛ tsuo a hɛ mi, nɛ́ a ha a níhi.

¹⁴ Á fiɛ womi nɛ ɔ mi munyu ɔmɛ ngɛ zugba a tsuo nɔ. Ke a nu mlaa nɛ ɔ, ma amɛ tsuo nɛ a dla a he kɛ to jamɛ a ligbi ɔ.

¹⁵ Matsɛ ɔ ha nɛ a fiɛ mlaa nɛ ɔ ngɛ matsɛ ma Susa a mi. Kɛkɛ nɛ a ha tsɔli nɛ a he sɔɔ saminya pue nɔ oya kɛ mlaa nɛ ɔ kɛ ho e nɔ yemi he ɔmɛ ya. Jamɛ a be ɔ, matsɛ ɔ, kɛ Haman hii si nɛ a ngɛ dã nue, se Susa ma a mi lɛɛ e pee basabasa.