Ester 1 - BAIBLO ALOO NGMAMI KLƆUKLƆU Ɔ

Manyɛ Vashti wo e he ha Matsɛ Ahasuerus

^1-2 Be ko ɔ, Persia matsɛ ko nɛ a tsɛɛ lɛ Ahasuerus ɔ ba ye tsɛ. E matsɛ ma biɛ ji Susa. Matsɛ nɛ ɔ ye ma 127 sɔuu a nɔ kɛ je India kɛ ya su Sudan tɔɔ.

³ Benɛ e ngɛ tsɛ yee ɔ, jeha etɛne ɔ, e tsɛ e ganɔ ɔmɛ, kɛ e tsɔli ɔmɛ tsuo ní yemi. E kpee Persia kɛ Media tabo ɔmɛ, amlaalo ɔmɛ, kɛ odehe ɔmɛ tsuo kɛ ba.

⁴ E jé e matsɛ we ɔ mi afɛu níhi, kɛ hɛ mi nyami, kɛ agboje babauu kpo kɛ tsɔɔ ni ɔmɛ nyɔhiɔ ekpa sɔuu.

⁵ Pee se ɔ, matsɛ ɔ tsɛ Susa ma a mi bi ɔmɛ tsuo ní yemi, niatsɛmɛ kɛ ohiatsɛmɛ tsuo. A ye ní nɛ a nu ní ngɛ abɔɔ ɔ mi ngɛ matsɛ we ɔ mi otsi.

⁶ Bɔ nɛ a dla lejɛ ɔ ha ji nɛ ɔ nɛ: a kɛ bo bluu, kɛ bo futaa kpla lejɛ ɔ, nɛ a kɛ kpa hiɔ nɛ ngɛ fɛu, kɛ kpa nɛ hɛɛ kɔbɛi su fi sika hiɔ gahi ngɔ wo titimahi nɛ a kɛ tɛ hiɔ pee ɔ a he. Sɛhi nɛ ngɛ lejɛ ɔ hu sika tsu, kɛ sika hiɔ a kɛ pee mɛ. Zugba a nɛ sɛ ɔmɛ maa si ngɛ nɔ ɔ hu, a kɛ tɛ kpakpa nɛ ɔmɛ ka: tɛ hiɔ, tɛ tsu, tɛ nɛ he jua wa nɛ ngɛ kpɛe, kɛ tɛ bluu.

⁷ A wo dã ha ni ɔmɛ ngɛ sika tsu kplu slɔɔtoslɔɔtohi a mi; nɛ matsɛ ɔ dã a hiɛ bɔ nɛ sa.

⁸ Dã nɛ a nu ɔ hiɛ babauu nitsɛ; ejakaa matsɛ ɔ wo e tsɔli ɔmɛ mlaa ke a ha nɔ tsuaa nɔ nɛ nu dã a bɔ nɛ e suɔ.

⁹ Jamɛ a be ɔ mi nɔuu ɔ, Manyɛ Vashti hu tsɛ yi ɔmɛ ní yemi ngɛ matsɛ we ɔ mi.

¹⁰ Ligbi nɛ ji kpaago ɔ, benɛ matsɛ ɔ nu dã nɛ e bua jɔ saminya a, e tsɛ e he buli kpaago ɔmɛ nɛ a puɛ mɛ ɔ. Mɛ ji Mehunan, Bizta, Habona, Bigta, Abagta, Zeta, kɛ Kakas.

¹¹ E fa mɛ ke a ya ngɔ Manyɛ Vashti kɛ ba kɛ e yi jlasi ɔ. Manyɛ Vashti he ngɛ fɛu saminya; nɛ matsɛ ɔ ngɛ hlae nɛ ganɔ ɔmɛ, kɛ ni ɔmɛ nɛ e kpee kɛ ba a tsuo nɛ a na bɔ nɛ manyɛ ɔ he ngɛ fɛu ha.

¹² Se benɛ tsɔli ɔmɛ ya de Manyɛ Vashti ke matsɛ ɔ ke a ba ngɔ lɛ kɛ ba a, e kua bami. Nɔ́ nɛ ɔ ha matsɛ ɔ mi mi fu wawɛɛ nitsɛ.

¹³ Ke sane kaa kikɛ nɛ ɔ ba a, matsɛ ɔ tsɛɔ ga woli nɛ a woɔ lɛ ga. Lɔ ɔ he ɔ, e tsɛ e ga woli nɛ le a mlaa amɛ, kɛ kusumi ɔmɛ saminya a, konɛ a tsɔɔ lɛ nɔ́ nɛ sa nɛ e pee.

¹⁴ E he nihi nɛ e pɔɔ tsɛmi ji Kashena, Shetar, Admata, Tarshish, Meres, Marsena, kɛ Memukan. Nimli kpaago nɛ ɔmɛ ji Persia kɛ Media nɔ yemi ɔ mi ganɔhi nɛ hɛɛ blɔ nya nguaa pe kulaa.

¹⁵ E de mɛ ke, “Imi Matsɛ Ahasuerus, i tsɔ nihi ke a ya ngɔ Manyɛ Vashti kɛ ba a, e kua bami. Wa mlaa a nya a, kɛ wa maa pee lɛ kɛɛ?”

¹⁶ Kɛkɛ nɛ Memukan de matsɛ ɔ, kɛ ganɔ ɔmɛ nɛ pueɔ si ɔ ke, “Pi mo matsɛ ɔ kɛkɛ o nɔ nɛ Manyɛ Vashti tɔ̃, se mohu e tɔ̃ ganɔ ɔmɛ tsuo a nɔ. Anɔkuale mi ɔ, e tɔ̃ nɔ tsuaa nɔ nɔ ngɛ o nɔ yemi he ɔ!

¹⁷ Yihi tsuo nɛ ngɛ o nɔ yemi he ɔ ma ba nu nɔ́ nɛ Manyɛ Vashti pee nɛ ɔ, nɛ a be a hunomɛ bue hu. A ma de ke, ‘Matsɛ Ahasuerus nitsɛ po fa ke a ya ngɔ Manyɛ Vashti kɛ ba, nɛ e kua bami’.

¹⁸ Ke matsɛ ɔ ganɔhi nɛ ngɛ Persia kɛ Media a a yi ɔmɛ nu nɔ́ nɛ manyɛ ɔ pee nɛ ɔ, a ma ya sɛɛ ha a hunomɛ mwɔnɛ ɔ loko du ma bu. Jehanɛ, yigbayihi ngɛ he tsuaa he be a hunomɛ bue hu; nɛ nyumu ɔmɛ hu a mi mi ma fu a yi ɔmɛ wawɛɛ.

¹⁹ Lɔ ɔ he ɔ, nɛnɛ, ke e sa o hɛ mi ɔ, wo mlaa ngɛ o he wami ɔ nya ke Vashti kó ba matsɛ ɔ hɛ mi gblegbleegble hu. Fa nɛ a ngma ngɔ wo Persia kɛ Media mlaa amɛ a mi, konɛ a ko tsake mlaa nɛ ɔ kɔkɔɔkɔ. Lɔ ɔ se ɔ, ngɔɔ e blɔ nya kaa manyɛ ɔ ngɔ ha yo kpa nɛ ngɛ subai kpakpa pe lɛ.

²⁰ Ke o wo mlaa nɛ ɔ, nɛ a fiɛ kɛ kpa o nɔ yemi he nguaa nɛ ɔ tsuo ɔ, yigbayihi tsuo maa bu a hunomɛ, nimli nguahi jio, nimli wawi jio.”

²¹ Ga nɛ Memukan wo nɛ ɔ sa matsɛ ɔ, kɛ ganɔ ɔmɛ a hɛ mi, nɛ matsɛ ɔ pee ja.

²² E tsɔ nɛ a kɛ womihi ya matsɛ ɔ nɔ yemi he ɔmɛ tsuo; a ngma munyu ɔmɛ ngɛ zugba tsuaa zugba e ningma kɛ e gbi mi ke nyumu tsuaa nyumu nɛ pee wetsɛ, nɛ ke e de nɔ́ ko ɔ, nɔ ko nɔ ko kó de nɔ́ kpa ko hu.