Efesobi 5 - BAIBLO ALOO NGMAMI KLƆUKLƆU Ɔ

Nyɛɛ ba nyɛ je mi kaa Yesu se nyɛɛli

¹ Akɛnɛ Mawu bimɛ nɛ e suɔ ji nyɛ he je ɔ, nyɛɛ bɔ mɔde nɛ nyɛɛ kase lɛ.

² Nyɛ je nyɛ suɔmi kpo ngɔ tsɔɔ nyɛ sibi ngɛ nyɛ ní peemi mi kaa bɔ nɛ Kristo suɔ wɔ nɛ e ba gbo ngɛ wa he ɔ. Ee, Kristo ngɔ e he ngɔ ha kaa nike ní nɛ a kɛ sã bɔ, nɛ he via, nɛ sa Mawu hɛ mi.

³ Akɛnɛ ní klɔuklɔuhi ji nyɛ he je ɔ, e sɛ kaa a woɔ yo kɛ nyumu yakayaka fiɛmi, loo mu ní tsumi, loo hɛkɔ ta tete ngɛ nyɛ kpɛti.

⁴ E sɛ kaa yakayaka munyu, loo kuasiahi a munyu, loo fɛu yemi munyu nɛ sɛ́ jeɔ nyɛ nya. Se mohu nyɛɛ na Mawu si ngɛ nɔ́ nɛ e pee ha nyɛ ɔ he.

⁵ Nyɛ na nyɛɛ le kaa nihi nɛ fiɛɔ yo kɛ nyumu yakayaka fiɛmi, loo a tsuɔ mu ní, loo a hɛ kɔ̃ɔ̃ ɔ, a be blɔ nya ngɛ he nɛ Kristo kɛ Mawu ngɛ matsɛ yee ngɛ. (Ke nɔ ko kɛ hɛkɔ ngɛ nɔ́ ko se die ɔ, e ngɛ kaa wɔ jami pɛ).

⁶ Nyɛ ko ha nɛ nɔ ko nɛ pee nyɛ kuasia; ejakaa nihi nɛ gboɔ tue, nɛ a peeɔ yayamihi kaa kikɛ nɛ ɔ, Mawu kɛ mi mi la gblaa a tue wawɛɛ.

⁷ Lɔ ɔ he ɔ, nyɛɛ kɛ mɛ ko bɔ.

⁸ Jinɛ sa a, nyɛ nitsɛmɛ nyɛ ngɛ diblii mi, se nɛ nyɛ ngɔ nyɛ he ba mɛtɛ Nyɔmtsɛ, he ɔ, nyɛ ba plɛ la. Lɔ ɔ he ɔ, nyɛɛ ba nyɛ je mi kaa nihi nɛ kɛ la ngɛ nyɛɛe.

⁹ Ejakaa la kaa kikɛ nɛ ɔ he okadihi nɛ a naa ji kpakpa peemi, dami sane yemi, kɛ anɔkuale tumi.

¹⁰ Nyɛɛ bɔ mɔde nɛ nyɛɛ kase Nyɔmtsɛ ɔ suɔmi nya ní.

¹¹ Diblii mi níhi nɛ se nami be he ɔ, nyɛ ko pee. Mohu ɔ, nyɛ je mɛ kpo nɛ nihi nɛ a na.

¹² (Níhi nɛ nihi peeɔ ngɛ laami mi ɔ ngɛ zo tsɔ kaa a maa wo ta tete).

¹³ Ke a je nɔ́ ko kpo kɛ ba la nya a, a naa lɛ paa;

¹⁴ ejakaa la lɛ haa nɛ a naa nɔ́ tsuaa nɔ́. Enɛ ɔ he je nɛ a de ke, “Mo nɔ nɛ o ngɛ mahe hwɔe, o hɛ nɛ tsɛ, nɛ o te si kɛ je gbeje. Kɛkɛ Kristo ma kpɛ ha mo ɔ nɛ.”

¹⁵ Lɔ ɔ he ɔ, nyɛɛ hyɛ nyɛ je mi bami nɛ hi! Nyɛ ko hi si kaa nihi nɛ li nɔ́ ko nɔ́ ko, se mohu kaa ní leli.

¹⁶ Nɔ́ tsuaa nɔ́ nɛ hia kaa a pee ɔ, nyɛɛ pee; ejakaa be nɛ wa ngɛ mi nɛ ɔ, adesa yi mi wa saminya.

¹⁷ Lɔ ɔ he ɔ, nyɛ ko je kuasia; se mohu nyɛɛ bɔ mɔde nɛ nyɛ yo níhi nɛ ji Nyɔmtsɛ ɔ suɔmi nya ní.

¹⁸ Nyɛ ko de dã, ejakaa e kɛ sakasaka peemi lɛ nyɛɛɔ. Mohu ɔ, nyɛ ha nɛ mumi ɔ nɛ hyi nyɛ.

¹⁹ Nyɛɛ kɛ nyɛ sibi nɛ sɛɛ munyuhi nɛ ngɛ saku fiami, yi jemi, kɛ mumi mi la amɛ a mi ɔ a he ní. Nyɛɛ fia saku, nɛ nyɛ la kɛ je nyɛ tsui mi tɔɔ nɛ nyɛ kɛ je Nyɔmtsɛ ɔ yi.

²⁰ Be tsuaa be ɔ, nyɛɛ na Tsɛ Mawu si ngɛ nɔ́ tsuaa nɔ́ he.

Yigbayihi kɛ a hunomɛ

²¹ Nyɛɛ ba nyɛ he si ha nyɛ sibi kɛ tsɔɔ kaa nyɛ yeɔ Kristo gbeye.

²² Nyɛ yigbayi, nyɛɛ ba nyɛ he si ha nyɛ hunomɛ kaa bɔ nɛ nyɛ maa pee ha Nyɔmtsɛ ɔ.

²³ Ejakaa huno ɔ ngɛ e yo ɔ nɔ he wami kaa bɔ nɛ Kristo hu ngɛ asafo ɔ nɔ he wami ɔ. Kristo ngɔ e wami ngɔ ha, nɛ e kɛ he asafo ɔ yi wami; ee, asafo ɔ ngɛ kaa Kristo nitsɛ e nɔmlɔ tso.

²⁴ Lɔ ɔ he ɔ, e hia kaa yigbayi nɛ a ba a he si ha a hunomɛ ngɛ nɔ́ tsuaa nɔ́ mi kaa bɔ nɛ asafo ɔ hu baa e he si ha Kristo ɔ.

²⁵ Nyɛ hunomɛ, nyɛɛ suɔ nyɛ yi ɔmɛ kaa bɔ nɛ Kristo hu suɔ asafo ɔ, nɛ e ngɔ lɛ nitsɛ e wami ngɔ ha ngɛ e he ɔ.

²⁶ Kristo ngɔ sane kpakpa a, nɛ e kɛ tsu asafo ɔ he kaa bɔ nɛ a kɛ nyu fɔɔ nɔ he ha lɛ ɔ, nɛ e kɛ pee lɛ klɔuklɔu.

²⁷ E pee enɛ ɔ, konɛ e ngɔ asafo ɔ ngɔ pee lɛ nitsɛ e nɔ́. Asafo ɔ ngɛ kaa nɔ ko nɛ he ngɛ fɛu saminya; sé ko be e he ɔ, e hɛ mi kuã we, nɛ nɔ́ yaya kpa ko hu be e he. Ee, asafo ɔ maa hi klɔuklɔu nɛ piami ko piami ko be e he hie.

²⁸ Jã nɔuu kɛ̃, e sa kaa nyumu nɛ suɔ e yo kaa bɔ nɛ e suɔ lɛ nitsɛ e he. Ke nyumu ko suɔ e yo ɔ, ngɛ blɔ ko nɔ ɔ, e suɔ lɛ nitsɛ e he.

²⁹ (Nɔ ko nyɛ́ lɛ nitsɛ e he lo, se mohu e lɛɛ e nɔmlɔ tso ɔ, nɛ e baa e yi saminya kaa bɔ nɛ Kristo hu hyɛɛ asafo ɔ.

³⁰ Wa ngɛ kaa Kristo nɔmlɔ tso ɔ he níhi.)

³¹ Kaa bɔ nɛ ngmami ɔ deɔ ɔ, “Enɛ ɔ he nɛ nyumu ma si e tsɛ kɛ e nyɛ, nɛ e maa mɛtɛ e yo he, nɛ mɛ ni enyɔ ɔmɛ tsuo maa pee he lo kake.”

³² Anɔkuale laami munyu komɛ nɛ a he hia saminya jeɔ kpo ngɛ ngmami nɛ ɔ mi; nɛ imi lɛɛ i kɛ ngɛ Kristo kɛ asafo ɔ he toe.

³³ Se kɛ̃ ɔ, nɔ́ nɛ ngɛ mi ji, e sa kaa nyɛ ti nɔ tsuaa nɔ nɛ suɔ e yo kaa bɔ nɛ e suɔ lɛ nitsɛ e he, nɛ yogbayo tsuaa yogbayo nɛ bu e huno.