Efesobi 1 - BAIBLO ALOO NGMAMI KLƆUKLƆU Ɔ

¹ Imi Paulo, nɛ Mawu suɔmi nya nɛ i ba pee Kristo Yesu bɔfo ɔ, imi lɛ i ngma womi nɛ ɔ ya ha ni klɔuklɔu ɔmɛ nɛ ngɛ Efeso, nihi nɛ kɛ je be nɛ a ba le Kristo Yesu ɔ, a ngmɛɛ we a hemi kɛ yemi ɔ he kulaa a.

² Dloomi kɛ he jɔmi nɛ je wa Tsɛ Mawu ɔ, kɛ Nyɔmtsɛ Yesu Kristo dɛ mi ɔ ha nyɛ!

Kristo haa wɔ mumi mi ní kpakpahi

³ Sina ha Mawu, wa Nyɔmtsɛ Yesu Kristo Mawu ɔ, kɛ e Tsɛ ɔ! Ejakaa nɛ wa ngɛ Kristo mi ɔ, Mawu dloo wɔ mumi mi ní kpakpahi tsuo nɛ ngɛ hiɔwe ɔ.

⁴ Benɛ a na we nɛ a bɔ je ɔ tete po ɔ, Mawu hla wɔ ngɔ pee lɛ nitsɛ e nihi momo ngɛ Kristo mi. E pee enɛ ɔ, konɛ wa he nɛ tsɔ, nɛ piami ko kó hi wa he ngɛ e hɛ mi. Mawu suɔ wɔ saminya, enɛ ɔ he ɔ,

⁵ e pee e yi mi momo kaa kɛ gu Yesu Kristo nɔ ɔ, e maa ngɔ wɔ kɛ pee e bimɛ. Nɔ́ nɛ e suɔ, nɛ e to nɛ e maa pee ji nɛ ɔ nɛ.

⁶ E sa kaa wa je Mawu yi kaa e gu e dloomi nɛ hɛ mi ngɛ nyami ɔ nɔ ngɔ e bi nɛ e suɔ ɔ ngɔ ke wɔ yaka gu!

⁷ Ejakaa Kristo ngɔ e he ngɔ sã bɔ, nɛ e kɛ e muɔ kpɔ wɔ, nɛ e dloomi babauu ɔ nya a, a e ngɔ wa he yayami ɔmɛ ngɔ pa wɔ.

⁸ Niinɛ, e ha wɔ kɛ be nɔ po! Mawu ngɔ e nile, kɛ e juɛmi

⁹ kɛ pee níhi tsuo nɛ e to kaa e maa pee ɔ. Laami nɔ́ ko nɛ e to e yi mi momo ke e maa pee kɛ gu Kristo nɔ ɔ, e je tsɔɔ wɔ.

¹⁰ Nɔ́ nɛ Mawu to nɛ e maa pee ke be ɔ su ɔ ji kaa e ma ha nɛ bɔ níhi tsuo maa pee kake, níhi nɛ ngɛ hiɔwe, kɛ ní nɛmɛ nɛ ngɛ zugba a nɔ. Nɛ Kristo maa ye matsɛ ngɛ mɛ tsuo a nɔ.

¹¹ Nɔ́ nɛ Mawu suɔ kaa e maa pee, kɛ nɔ́ nɛ e to kaa e ba mi ɔ, lɔ ɔ e peeɔ. Mawu hla wɔ, konɛ wa ba pee lɛ nitsɛ e nihi, nɛ́ waa kɛ Kristo nɛ pee kake. Mawu suɔmi nya ní, kɛ yi mi nɛ e to kɛ je sisije tɔɔ ji nɛ ɔ nɛ.

¹² Lɔ ɔ he ɔ, wɔ nɛ wa ji kekleekle nihi nɛ wa ngɔ wa hɛ ngɔ fɔ Kristo nɔ ɔ, nyɛ ha wa je Mawu yi kaa e hɛ mi ngɛ nyami.

¹³ Nyɛ hu, benɛ nyɛ nu anɔkuale sɛ gbi ɔ nɛ ji sane kpakpa a nɛ ma ha nɛ a he nyɛ yi wami ɔ, nyɛ he Kristo ye, nɛ Mawu ha nɛ Mumi Klɔuklɔu ɔ nɛ e wo he si ɔ ba nyɛ nɔ. Mawu pee enɛ ɔ, nɛ e kɛ kadi nyɛ kaa e nihi ji nyɛ niinɛ.

¹⁴ Si nɛ Mawu wo e ni ɔmɛ ɔ, mumi ɔ e kɛ ma nɔ mi kaa wa nine maa su nɔ. Nɛ enɛ ɔ woɔ wɔ he wami kaa Mawu ma ha e we bi maa ye a he kulaa. Nyɛ ha wa je e yi kɛ wo e hɛ mi nyami.

Paulo kpa Mawu pɛɛ

¹⁵ Enɛ ɔ he je ɔ, kɛ je benɛ i nu kaa nyɛ heɔ Nyɔmtsɛ Yesu Kristo yeɔ saminya, nɛ Mawu we bi ɔmɛ hu nyɛ suɔ mɛ ja nɔuu ɔ,

¹⁶ i kpa we Mawu si nami ha nyɛ. Ke i ngɛ sɔlee ɔ, i kaiɔ nyɛ,

¹⁷ nɛ i kpaa pɛɛ kaa wa Nyɔmtsɛ Yesu Kristo Mawu ɔ, kɛ wa Tsɛ nɛ hɛ mi ngɛ nyami ɔ nɛ ha nyɛ Mumi Klɔuklɔu ɔ. Mumi ɔ ma ha nɛ nyɛ maa le bɔ nɛ Mawu ngɛ anɔkuale mi, nɛ e ma je Mawu kpo kɛ tsɔɔ nyɛ, nɛ nyɛ maa le lɛ saminya.

¹⁸ I kpaa Mawu pɛɛ nɛ e bli nyɛ mumi mi hɛngmɛ. Kɛkɛ ɔ, níhi nɛ Mawu wo si kaa e ma ha nyɛ benɛ e tsɛ nyɛ, nɛ nyɛ ngɔ nyɛ hɛ ngɔ fɔ nɔ ɔ, nyɛ maa na. Nyɛ maa le hu kaa níhi nɛ Mawu wo si kaa e ma ha e ni klɔuklɔu ɔmɛ ɔ, a hɛ mi ngɛ nyami babauu.

¹⁹ Jehanɛ ɔ hu nyɛ ma yɔse kaa Mawu he wami kpetekpleenyɛ nɛ ngɛ ní tsue ngɛ wɔ nihi nɛ wa heɔ yeɔ ɔ wa mi ɔ,

²⁰ jamɛ a he wami ɔ nɔuu nɛ Mawu kɛ tle Kristo si kɛ je gbeje, nɛ e ngɔ lɛ ngɔ hi e hiɔ nɔ ngɛ hiɔwe ɔ nɛ.

²¹ Lejɛ ɔ Kristo ngɛ tsɛ yee ngɛ kɛ he wami kpetekpleenyɛ nɛ pã nihi tsuo nɛ ngɛ tsɛ yee ngɛ hiɔwe a he wami. Biɛ nɛ Kristo hɛɛ ɔ hu pã biɛhi tsuo ngɛ je nɛ ɔ, kɛ je nɛ maa ba a tsuo mi.

²² Mawu ha Kristo he wami ngɛ níhi tsuo a nɔ, nɛ e ngɔ lɛ ngɔ pee tsɛ ha asafo ɔ, konɛ e ye níhi tsuo a nɔ.

²³ Asafo ɔ ji Kristo nɔmlɔ tso nɛ haa níhi tsuo a he suu. Kristo haa níhi tsuo a he suu ngɛ he tsuaa he.