Fiɛlɔ 9 - BAIBLO ALOO NGMAMI KLƆUKLƆU Ɔ

¹ I ba susu ní nɛ ɔmɛ tsuo a he saminya, nɛ i na kaa níhi nɛ dali, kɛ ní leli peeɔ ɔ, Mawu le he nɔ́ ko; suɔmi kɛ nyɛmi po, nɔmlɔ adesa be a nɔ he wami. Nɔ ko nɔ ko li nɔ́ nɛ ngɛ e hɛ mi kɛ ma.

² Sane nɛ maa ba nɔ kake nɔ ɔ, lɔ ɔ kɛ̃ lɛ maa ba nɔ kpa hu nɔ; dalɔ jio, yayami peelɔ jio; nɔmlɔ kpakpa jio, nɔmlɔ yayami jio; nɔ nɛ he tsɔ jio, nɔ nɛ he tsɔ we jio; nɔ nɛ sãã bɔ jio, nɔ nɛ sɛ̃ bɔ jio; nɔ́ nɛ maa ba nɔ kake nɔ ɔ, lɔ ɔ kɛ̃ lɛ maa ba nɔ kpa hu nɔ. Nɔmlɔ kpakpa kɛ yayami peelɔ ɔ, slɔɔto be a kpɛti; kita kalɔ kɛ nɔ nɛ sume kaa e ma ka kita hu, jã nɔuu.

³ Níhi nɛ dɛ ngɛ je nɛ ɔ mi ɔ, a kpɛti kake ji kaa haomi baa nihi tsuo a nɔ fiee nɛ slɔɔto be mi; dali jio, yayami peeli jio. Daa nɛ ɔ, yayami kɛ godo hyi nimli adesahi a tsui mi ngɛ je ɔ mi. Kɛkɛ a gbo tlukaa.

⁴ Se nɔ nɛ piɛɔ hɛ kali a he ngɛ je ɔ mi ɔ, hɛ nɔ kami ngɛ ha lɛ. Ejakaa gbe hɛ ngmengmle hi pe jata gbogboe.

⁵ Niinɛ, nihi nɛ a hɛ ngɛ ɔ le kaa a ma ba gbo; ni gbogboe ɔmɛ lɛɛ a li nɔ́ ko nɔ́ ko. Hiɔwo kpa ko hu a be; ejakaa nihi a hɛ je a nɔ pɛsɛpɛsɛ.

⁶ A gbo kɛ a suɔmi, ninyɛ, kɛ hɛkɔ ɔ tsuo. Níhi nɛ yaa nɔ ngɛ je nɛ ɔ mi ɔ, mɛɛ lɛɛ a pa be mi nɛ a peeɔ hu.

⁷ Yaa nɛ o ya ye ní, nɛ o na bua jɔmi. Yaa nu wai, nɛ o tsui nɛ nɔ o mi; o ní tsumi ɔ sa Mawu hɛ mi momo.

⁸ Wo tade hiɔ be tsuaa be, nɛ o ko ha nɛ nu nɛ ta o yi mi.

⁹ Be bɔɔ nɛ Mawu ha mo ngɛ zugba nɛ ɔ nɔ ɔ, o kɛ o yo nɛ o suɔ lɛ saminya a, nyɛɛ ye e mi ngɔɔmi. Daa ligbi nɛ nɔ́ ko be mi ɔ, nyɛɛ ye mle. Ejakaa dengme tsuo nɛ o ngɛ gboe ɔ, nɔ́ nɛ o ma na kɛ je mi ji lɔ ɔ nɛ.

¹⁰ Nɔ́ tsuaa nɔ́ nɛ o ngɛ tsue ɔ, tsu kɛ o he wami tsuo. Ejakaa gbeje, he nɛ o maa ya hwɔɔ se ɔ, ní tsumi, loo yi mi susumi, loo nile, loo ga be lejɛ ɔ.

¹¹ Nɔ́ kake hu nɛ i na ngɛ je nɛ ɔ mi ji: tsa pi nihi nɛ le fo tumi wawɛɛ ji nihi nɛ yeɔ kekleekle blɔ he be tsuaa be; pi katsɛmɛ ji ni nɛmɛ nɛ yeɔ kunimi ngɛ ta mi daa. Pi ní leli tsuo a dɛ nɛ niye ní ngɛ; pi juɛmitsɛmɛ tsuo ji matsɛmɛ, nɛ gali hu, pi mɛ tsuo nɛ a hɛ mi baa nyami. Haomi baa mɛ tsuo a nɔ fiee.

¹² Nɔmlɔ adesa li e be. Be yayami ba naa nɔ tlukaa kaa bɔ nɛ lo duɔ ya, aloo kaa bɔ nɛ lohwe pɛlitsɛ duɔ klama a.

Nile kɛ kuasia jemi

¹³ Nɔ́ ko hu nɛ i na ngɛ je nɛ ɔ mi, nɛ tsɔɔ bɔ nɛ a buu nile ha ji nɛ ɔ nɛ.

¹⁴ Ma wayoo ko hi si kɛ e mi nimli bɔɔ pɛ. Be ko ɔ, matsɛ nguaa ko ba tua ma a. E sa ma a yi, nɛ e fia kpoku kɛ bɔle ma a.

¹⁵ Nyumu ko ngɛ ma a mi. Nɔ́ ko be e dɛ lɛɛ, se e le ní bɔ nɛ e kɛ e nile ɔ he ma a yi wami. Se nɔ ko nɔ ko susuu we e he.

¹⁶ I deɔ daa ke nile hi pe he wami. Se nɔ ko bui ohiatsɛ ní lelɔ; e nya mi munyu po a bui tue.

¹⁷ Ní lelɔ munyu blɛuu ngɔɔ ngɛ tue mi pe ngmlaa nɛ nɔ yelɔ ko kpaa ngɛ kuasiahi a kpɛti.

¹⁸ Nile hi pe ta hwumi níhi. Se yayami peelɔ kake kpataa ní kpakpahi babauu a hɛ mi.