Fiɛlɔ 8 - BAIBLO ALOO NGMAMI KLƆUKLƆU Ɔ

¹ Mɛnɔ kɛ ní lelɔ sɔ? Mɛnɔ lɛ le níhi a sisi tsɔɔmi kɛ lɛ sɔ? Nile haa nɛ nɔ muɔɔ, nɛ e tsɔɔ e hɛ mi kɛ haa nɔ.

Bu matsɛ tue

² Ye matsɛ mlaa a nɔ kaa bɔ nɛ o ka Mawu kita ke o maa pee ɔ.

³ Matsɛ ma nyɛ maa pee nɔ́ tsuaa nɔ́ nɛ e suɔ. Lɔ ɔ he ɔ, ke e mi mi fu ɔ, jee e hɛ mi esɔ!

⁴ Ke matsɛ tu munyu ɔ, he wami ngɛ se. Mɛnɔ ma nyɛ ma de matsɛ ke, “Mɛni lɛ o pee nɛ ɔ?”

⁵ Nɔ nɛ yeɔ mlaa nɔ ɔ, haomi bɛ e nɔ. Nɔ nɛ le ní ɔ, e le be nɛ sa, kɛ blɔ nɔ nɛ e maa gu kɛ bu tue.

⁶ Ejakaa be nɛ sa, kɛ blɔ nɔ nɛ a kɛ peeɔ nɔ́ ngɛ. Se akɛnɛ nɔmlɔ adesa li he je ɔ, e ba peeɔ haomi ha lɛ.

⁷ Wa ti nɔ ko nɔ ko li nɔ́ nɛ maa ba hwɔɔ se. Mɛnɔ lɛ ma nyɛ maa tsɔɔ be mi nɛ nɔ́ ko maa ba?

⁸ Nɔmlɔ adesa be he wami ngɛ e mumi nɔ; nɛ e be he wami ngɛ e gbenɔ be nɔ. Gbenɔ ngɛ kaa ta; nɔ ko be nyɛe maa tu nya fo. Yi wu tso ní peemi be nyɛe ma he nɔ ko yi wami.

Yayami peeli kɛ dali

⁹ I na ní nɛ ɔmɛ tsuo, be mi nɛ i ngɛ níhi nɛ nimli adesahi peeɔ ngɛ je nɛ ɔ mi ɔ a he susue. Ni komɛ ngɔɔ blɔ nya nɛ a na a kɛ yeɔ a nyɛmimɛ awi.

¹⁰ Jehanɛ, i na yayami peeli komɛ nɛ ke pee ɔ, a baa he klɔuklɔu ɔ. Benɛ a gbo nɛ a ya pu mɛ ɔ, a huɛmɛ ɔmɛ a hɛ je a yayami ɔmɛ a nɔ, nɛ a bɔni a yi jemi mohu ngɛ ma mi he nɛ a pee yayami ɔmɛ ngɛ ɔ. Nɔ́ nɛ ɔ hu dɛ.

¹¹ Mɛni he je lɛ nihi a he sɔɔ kɛ peeɔ yayami ɔ? Ejakaa a gbla we a tue ngɛ be nɛ sa mi.

¹² Yayami peelɔ peeɔ yayami si lafa, nɛ e gbo we. Se kɛ̃ ɔ, i le kaa nihi nɛ yeɔ Mawu gbeye anɔkuale mi ɔ, e hii ha mɛ.

¹³ Yayami peeli lɛɛ e be hie ha mɛ gblegbleegble. Mɛɛ lɛɛ a wami ngɛ kaa nini. A se kɛ we ngɛ je mi, ejakaa a yi Mawu gbeye.

¹⁴ Nɔ́ yayami ko nɛ yaa nɔ ngɛ je ɔ mi ji nɛ ɔ nɛ. Be komɛ ɔ, a ngɔɔ yayami peeli a tue gblami kɛ haa dali, nɛ a kɛ dali a ní kpakpahi a he hiɔwo mohu haa yayami peeli. I ngɛ dee ke nɔ́ nɛ ɔ hu dɛ blɔ.

¹⁵ Lɔ ɔ he ɔ, i na kaa e sa kaa nɔmlɔ adesa nɛ na bua jɔmi; ejakaa nɔ́ ko pa be je nɛ ɔ mi ha lɛ, pe kaa e ye ní, nɛ e nu ní, nɛ e na bua jɔmi. Ke nɔmlɔ ngɛ dengme gboe ngɛ je nɛ ɔ mi, ngɛ wami bɔɔ nɛ Mawu ha lɛ ɔ mi ɔ, nɔ́ nɛ e ma nyɛ maa pee ji nɛ ɔ nɛ.

¹⁶ Be tsuaa be nɛ i hla kaa ma le ní, nɛ ma na níhi nɛ yaa nɔ ngɛ je nɛ ɔ mi ɔ, i naa kaa o ma nyɛ maa hi si nyɔ kɛ pia nɛ mahe hwɔmi be mi.

¹⁷ Se ní tsumi nɛ Mawu ngɛ tsue ngɛ je nɛ ɔ mi ɔ lɛɛ nɔmlɔ be nya nae gblegbleegble. Ke o gbo dengme hluu po, o be nya nae. Ní leli nɛ e peeɔ mɛ kaa mɛɛ a le ɔ, mɛ po a nɛ nya.