Fiɛlɔ 7 - BAIBLO ALOO NGMAMI KLƆUKLƆU Ɔ

Susumi komɛ nɛ kɔɔ wami he

¹ Biɛ kpakpa hi pe nu je via nɛ he jua wa. Ligbi nɛ o gbo ɔ hi pe ligbi nɛ a fɔ mo.

² E hi kaa o maa ya we mi he nɛ a ngɛ kɔmɔ yee ngɛ, pe kaa o maa ya he nɛ a tsɛ ní yemi ngɛ. Ejakaa e hia kaa nihi nɛ ngɛ wami mi kɛ mwɔɔ ɔ, a kai be tsuaa be kaa gbenɔ ji wɔ tsuo wa nyagbe.

³ Kɔmɔ yemi hi pe muɔmi. Ke o hɛ mi pee mɔbɔmɔbɔ ɔ, o leɔ ní.

⁴ Daa nɛ ɔ, ní lelɔ ngɛ gbenɔ he susue, se kuasia lɛɛ e susumi pɛ ji bua jɔmi.

⁵ E hi kaa ní lelɔ ma ka o hɛ mi, pe kaa kuasia ma je o yi.

⁶ Ke kuasia ngɛ muɔe ɔ, e ngɛ kaa mio nɛ ngɛ pɛe ngɛ la mi. Enɛ ɔ hu ji yaka nɔ́ ko.

⁷ Amimi yemi haa ní lelɔ peeɔ kuasia, nɛ nyɔ mi ní hemi puɛɔ nɔ je mi bami.

⁸ Nyagbe hi pe sisije. Tsui si tomi hi pe he nɔ womi.

⁹ Hyɛ nɛ o mi mi ko fu mlamlaamla, ejakaa kuasia lɛ ngɔɔ nɔ́ kɛ toɔ e tsui mi.

¹⁰ Ko bi ke, “Mɛni he je blema ngɔɔ pe mwɔnɛmwɔnɛ ɔ?” Tsa pi nile gbi ji lɔ ɔ.

¹¹ Nɔ tsuaa nɔ nɛ ngɛ je nɛ ɔ mi ɔ, e sa kaa e le ní. Ejakaa nile ngɛ kaa weto ní; e he ngɛ se nami

¹² kaa bɔ nɛ sika ngɛ ɔ pɛpɛɛpɛ. Nile faa nɔ he kaa bɔ nɛ sika faa nɔ he ɔ. Nile haa nɛ nɔ yeɔ e he.

¹³ Hyɛ Mawu nine nya ní tsumi! Nɔ́ nɛ Mawu ha nɛ e kpɛ̃ ɔ, mɛnɔ ma nyɛ maa pee lɛ nɛ e da?

¹⁴ Ke níhi a mi hi ha mo ɔ, nya. Ke haomi ba hu, kai kaa Mawu lɛ pee bua jɔmi ɔ kɛ haomi ɔ tsuo, bɔ nɛ pee nɛ nɔmlɔ adesa nɛ ko le nɔ́ nɛ maa ba hwɔɔ se.

¹⁵ Ye wami be ɔ he be se nami ko lɛɛ, se níhi tsuo nɛ ngɛ mi ɔ, i le. E pɔɔ mi bami kaa dalɔ hɛ mi kpataa, be mi nɛ yayami peelɔ mohu wami se kɛɔ.

¹⁶ Lɔ ɔ he ɔ, koo pee o he dalɔ, aloo ní lelɔ tsɔ. Mɛni he je lɛ o ma kpata mo nitsɛ o hɛ mi?

¹⁷ Se kɛ̃ ɔ, o yi mi ko wa tsɔ, nɛ o ko je kuasia hulɔ. Mɛni he je o ma gbo nɛ́ o be sui lolo ɔ?

¹⁸ E hi kaa o maa pɛtɛ ga womi nɛ ɔ he nɛ o be he ngmɛɛe. Nɔ nɛ yee Mawu gbeye ɔ, e maa ye manye kɛ̃.

¹⁹ Nile woɔ ní lelɔ he wami kulaa pe ma nɔ yeli nyɔngma nɛ ngɛ ma ko mi.

²⁰ Niinɛ, dalɔ ko dalɔ ko be zugba nɛ ɔ nɔ. Nɔ ko nɔ ko be nɛ peeɔ kpakpa daa nɛ ɔ, nɛ lɛɛ e pee we yayami gblegbleegble.

²¹ Koo bu nɔ́ tsuaa nɔ́ nɛ nihi ngɛ dee ɔ tue, nɛ́ o ko ba nu kaa o tsɔlɔ ngɛ mo gbiɛe.

²² Mo nitsɛ o le ngɛ o tsui mi kaa behi fuu ɔ, mo hu o gbiɛɛ ni komɛ.

²³ Nile lɛ i kɛ kpa ní nɛ ɔmɛ tsuo si. I to ye yi mi kaa ma kase ní, nɛ ma le ní. Se e ya yɛ nya.

²⁴ Kɛ nɔ ko maa pee kɛ le bɔ nɛ wami ngɛ ha kɛɛ? Mɛnɔ ma nyɛ? Wa juɛmi sui he.

²⁵ Jehanɛ, i ba bɔni ní kasemi, kɛ níhi a si kpami. I pee ye yi mi kaa ma na nile, nɛ ma na ye ní bimi ɔmɛ a heto. Nɔ́ nɛ i na ji kaa yi mi wami ɔ, e ji kuasia jemi, nɛ biɛmi hu godo.

²⁶ Nɔ́ ko hu nɛ i na nɛ dooɔ pe gbenɔ ji yo nɛ e tsui mi ngɛ kaa klama nɛ a tsɔ, aloo ya nɛ a wo nɛ a kɛ maa du nɔ. E nine ngɛ kaa kɔsɔkɔsɔ nɛ a kɛ maa wo nɔ. Nyumu nɛ peeɔ Mawu suɔmi nya ní ɔ maa je e dɛ mi. Se yayami peelɔ lɛɛ yo ɔ nine maa su e nɔ.

^27-28 Fiɛlɔ ɔ ke, benɛ i kpa níhi a si hluu nɛ e yɛ nya a, i ba bɔni níhi a he susumi kakaaka; nɛ nɔ́ nɛ i na ji nɛ ɔ nɛ. Ngɛ nyumuhi akpe a kpɛti ɔ, i na nɔ kake nɛ bu ngɛ e he, se yihi akpe a kpɛti lɛɛ i nɛ nɔ ko kaa jã.

²⁹ Nɔ́ nɛ i na kɛkɛ ji kaa Mawu bɔ nɔmlɔ adesa nɛ e hi si saminya, se nɔmlɔ ba kase gɔdɔgɔdɔ si himi.