Fiɛlɔ 6 - BAIBLO ALOO NGMAMI KLƆUKLƆU Ɔ

¹ Nɔ́ ko nɛ i na nɛ hí, nɛ haoɔ nimli ngɛ je nɛ ɔ mi ji nɛ ɔ nɛ.

² Mawu ma ha nɔ ko sika, kɛ ní babauu, hɛ mi nyami, kɛ nɔ́ tsuaa nɔ́ nɛ nɔ ɔ tsui suɔ. Se e ha we lɛ he wami nɛ e kɛ ye ngɔɔmi ɔ, nɛ nɔ kpa mohu ma ba ye. Nɔ́ nɛ ɔ ji yaka dengme gbomi, kɛ he hiami.

³ Ke nɔ ko fɔ bimɛ lafa, nɛ e ye jeha babauu, se e yi je mi ngɔɔmi, nɛ jehanɛ se hu, benɛ e gbo ɔ, a pu we lɛ bɔ nɛ sa a, lɛɛ afani bi nɛ gbo loko a fɔ lɛ ngɛ jamɛatsɛ ɔ he.

⁴ Bimwɔyo nɛ ɔ fɔmi peeɔ yaka dengme; e laa ngɛ diblii mi, nɛ nihi a hɛ jeɔ e nɔ.

⁵ E nɛ́ pu hɛ mi, nɛ nɔ́ ko hu e li. Se e ngɛ tue mi jɔmi mi

⁶ kulaa pe nɔ nɛ ye jeha akpe enyɔ, se je mi ngɔɔmi lɛɛ e yi eko ɔ. Mɛ tsuo pi he kake ɔ ko nɛ a yaa lo?

⁷ Dengme tsuo nɛ nɔmlɔ ngɛ gboe ɔ, e nya mi ngma kɛkɛ he lɛ e ngɛ gboe ngɛ. Se kɛ̃, e tɔɛ gblegbleegble.

⁸ Mɛni ní lelɔ kɛ pe kuasia? Ohiatsɛ nɛ le e he nɔ hyɛmi ngɛ je mi ɔ, mɛni se lɛ e naa?

⁹ E hi kaa o bua nɛ jɔ nɔ́ nɛ o ngɛ ɔ he, pe kaa daa nɛ ɔ, o ko suɔ nɛ o na nɔ́ kpa mohu. Enɛ ɔ hu ji yaka nɔ́ ko. E ngɛ kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ.

¹⁰ Nɔ́ tsuaa nɔ́ nɛ ba a, a de to momo. Wɔ tsuo wa le kaa nɔmlɔ nɛ ngɛ nɛ ɔ, nɔ nɛ he wa pe lɛ ɔ, e kɛ lɛ nɔɛ kunɔ.

¹¹ Munyu fuu ɔ, se nami be he.

¹² Mɛnɔ lɛ le nɔ́ nɛ hi ha nɔmlɔ ngɛ e wami be bɔɔ nɛ ɔ mi? Nɔmlɔ wami pi nɔ́ ko kulaa; e ngɛ kaa nini nɛ bee kɛ yaa. Mɛnɔ ma nyɛ ma de nɔ ko nɔ́ nɛ maa ba ngɛ je ɔ mi ngɛ e gbenɔ se?