Fiɛlɔ 5 - BAIBLO ALOO NGMAMI KLƆUKLƆU Ɔ

O he ko sɔ kɛ wo Mawu si

¹ Ke o yaa Mawu we ɔ, hyɛ o he nɔ saminya. E hi kaa o ma ya kase ní ngɛ lejɛ ɔ, pe nɔ́ nɛ o ma ya sã bɔ kaa bɔ nɛ kuasiahi peeɔ ɔ; ejakaa a li kaa a ngɛ yayami pee.

² Ke o maa tu munyu ko ɔ, mo susu he; o he ko sɔ kɛ wo Mawu si. Mawu ɔ, hiɔwe lɛ e ngɛ; moo lɛɛ zugba nɛ ɔ nɔ o ngɛ. Lɔ ɔ he ɔ, koo tu munyu fuu.

³ Haomi babauu kɛ dekla, aloo nlami basabasa baa; nɛ munyu fuu a kɛ yoɔ kuasia gbi.

⁴ Ke o wo Mawu si ɔ, ko ha nɛ e kɛ loko o ye nɔ; ejakaa Mawu na we kuasiahi a he bua jɔmi. Ye o siwo ɔ nɔ.

⁵ Afani nɛ o wui si kulaa, pe kaa o maa wo si, nɛ o be nɔ yee.

⁶ Ko ha nɛ mo nitsɛ o nya mi munyu nɛ bu mo fɔ, nɛ o ba ye pɔpu, nɛ o de Mawu we osɔfo ɔ ke o nɔ́ be mi. Mɛni he je lɛ o ma ha nɛ Mawu mi mi nɛ fu mo? Níhi nɛ o gbo a he dengme ɔ, mɛni he je o ma ha nɛ Mawu nɛ kpata a hɛ mi?

⁷ Nlami babauu kɛ munyu fuu ɔ, nɔ́ ko nɔ́ ko be mi; lɛ tsuo peeɔ yaka. Moo lɛɛ ye Mawu gbeye.

Wami he be se nami

⁸ Ke o na nɛ a ngɛ ohiatsɛ yi mi wae, aloo a plɛ sane hɛ mi ngɔ bu si, nɛ a kojo we ngɛ blɔ nɛ da nɔ ngɛ zugba ko nɔ ɔ, e ko pee mo nyakpɛ kulaa. Tsɔli nɛ ngɛ ma a nya, kɛ je nɔ wayoo pe kulaa nɔ kɛ ya si nɔkɔtɔma pe kulaa nɔ ɔ, mɛ tsuo a le nɔ́ nɛ ngɛ nɔ yae ɔ he nɔ́ ko.

⁹ Zugba a he se nami ɔ tsuo ba peeɔ nimli nɛ ɔmɛ a nɔ́. Jehanɛ se hu, ngmɔ ko ngmɔ ko be nɛ a tsu we tó ngɛ he.

¹⁰ Nɔ nɛ suɔ sika a, sika tɔɛ lɛ; nɔ nɛ suɔ nɛ e na ní ɔ, ní babauu gbi e nya. Enɛ ɔ hu ji yaka nɔ́ ko.

¹¹ He nɛ ní babauu ngɛ ɔ, ní yeli hu ngɛ lejɛ ɔ. Lɛɛ se nami nɛ niatsɛ ɔ naa pɛ ji kaa e le kaa nɔ́ ko ngɛ e dɛ.

¹² Apaatsɛ ɔ, e ye ní bɔɔ jio, e ye fuu jio, e hwɔɔ mahe bɔ nɛ sa. Se niatsɛ lɛɛ e ní babauu ɔ ha we nɛ e hwɔɔ mahe.

¹³ Nɔ́ yayami ko hu nɛ i na ngɛ je ɔ mi ji nɛ ɔ nɛ. Nihi buaa sika babauu nya, nɛ e ba peeɔ haomi ha mɛ.

¹⁴ Tlukaa a, matahu ba poɔ mɛ, nɛ sika a tsuo hɛ mi kpataa. Kɛkɛ ɔ, nɔ́ ko pa píɛ nɛ a ma si ha a bimɛ.

¹⁵ Bɔ nɛ nɔ ko je e nyɛ muklii mi kɛ ba dɛ gu ɔ, jã kɛ̃ lɛ e maa kpale kɛ ya. Dengme tsuo nɛ e ba gbo ɔ, e be nɔ́ ko nɔ́ ko hɛɛe ngɛ e dɛ kɛ ya.

¹⁶ Sane nɛ ɔ he wa! Bɔ nɛ nɔ ko ba a, jã e maa kpale kɛ ya. Lɛɛ mɛni se e na mɔ, kaa e ba gbo yaka dengme?

¹⁷ Nɔmlɔ wami be ɔ tsuo ngɛ kaa diblii mi nyɛɛmi; kɔmɔ yemi, mi mi fumi, nine mi wu jemi, kɛ hiɔ sɔuu.

¹⁸ Hyɛ, nɔ́ nɛ i na kaa e hi, nɛ e sa kɛkɛ ji kaa nɔmlɔ nɛ ye ní, nɛ e nu ní, nɛ e na bua jɔmi. Wami be bɔɔ nɛ Mawu ha nɔmlɔ ngɛ je nɛ ɔ mi ɔ, dengme tsuo nɛ e gbo ɔ, e ye e mi ngɔɔmi; e blɔ fa mi nɔ́ ji lɔ ɔ nɛ.

¹⁹ Nɔ tsuaa nɔ nɛ Mawu ha lɛ sika, ní babauu, he wami, kɛ bua jɔmi ɔ, e na Mawu si; e na bua jɔmi ngɛ dengme nɛ e ngɛ gboe ɔ he. Mawu nike ní ji lɔ ɔ nɛ.

²⁰ Akɛnɛ Mawu haa lɛ bua jɔmi daa he je ɔ, e pa be e he haoe kɛ kane e wami ligbi ɔmɛ hu.