Fiɛlɔ 3 - BAIBLO ALOO NGMAMI KLƆUKLƆU Ɔ

Nɔ́ tsuaa nɔ́ kɛ e be

¹ Nɔ́ tsuaa nɔ́ nɛ ngɛ je nɛ ɔ mi ɔ ngɛ e be.

² Fɔmi be ngɛ, nɛ gbenɔ be ngɛ; ní dumi be ngɛ, nɛ ní kpami be ngɛ.

³ Be ngɛ nɛ a gbee; nɛ be ngɛ nɛ a tsaa. Be ngɛ nɛ a kuɔ nɔ́ pueɔ si, nɛ be ngɛ nɛ a maa.

⁴ Ya fomi be ngɛ, nɛ muɔmi be ngɛ. Kɔmɔ yemi be ngɛ, nɛ domi be ngɛ.

⁵ Be ngɛ nɛ a sakee tɛhi ngɔ pueɔ he, nɛ be ngɛ nɛ a buaa tɛhi a nya. Be ngɛ nɛ a fuaa nɔ atuu, nɛ be ngɛ nɛ a fua we nɔ atuu.

⁶ Be ngɛ nɛ a hlaa nɔ́, nɛ be ngɛ nɛ nɔ́ laa. Be ngɛ nɛ a baa nɔ́ yi, nɛ be ngɛ nɛ a sakee nɔ́ kɛ fɔɔ he.

⁷ Be ngɛ nɛ a híaa nɔ́, nɛ be ngɛ nɛ a kpɛɔ nɔ́. Dii peemi be ngɛ, nɛ munyu tumi be ngɛ.

⁸ Suɔmi be ngɛ, nɛ nɔ nyɛmi be ngɛ. Ta be ngɛ, nɛ tue mi jɔmi be ngɛ.

⁹ Ní tsulɔ ɔ, mɛni se e naa kɛ jee e dengme gbomi ɔ mi?

¹⁰ Ní tsumi kpakpataa nɛ Mawu ha nɔmlɔ ke e tsu ɔ, i na.

¹¹ E peeɔ nɔ́ tsuaa nɔ́ saminyayoo ngɛ e be mi. E ha nɔmlɔ juɛmi nɛ e kɛ leɔ níhi nɛ be momo, kɛ níhi nɛ maa ba hwɔɔ se. Se kɛ̃ ɔ, lɛ Mawu ɔ ní tsumi kɛ je sisije kɛ ya si nyagbe ɔ, lɔ ɔ lɛɛ nɔmlɔ juɛmi sui he.

¹² Lɔ ɔ he ɔ, i na kaa be abɔ nɛ nɔmlɔ ngɛ je nɛ ɔ mi ɔ, nɔ́ nɛ sa lɛ peemi pɛ ji kaa e nya, nɛ e na bua jɔmi.

¹³ E sa kaa nɔ tsuaa nɔ nɛ ye ní, nɛ e nu ní; nɛ e na bua jɔmi kɛ je níhi nɛ e gbo a he dengme ɔ mi. Mawu nike ní ji lɔ ɔ nɛ.

¹⁴ I le kaa nɔ́ tsuaa nɔ́ nɛ Mawu pee ɔ maa hi si kɛ ya neneene; a be nyɛe nɛ a ngɔ nɔ́ ko kɛ piɛ he, loo a je nɔ́ ko ngɛ mi. Mawu lɛ pee jã, konɛ a ye lɛ gbeye.

¹⁵ Nɔ́ nɛ ngɛ amlɔ nɛ ɔ, e ba hyɛ; nɔ́ nɛ maa ba hwɔɔ se ɔ, e ba hyɛ. Nɔ́ nɛ be momo ɔ, lɔ ɔ nɔuu Mawu ngɔɔ kɛ baa ekohu.

Amimi yemi ngɛ je mi

¹⁶ Jehanɛ hu, i kpa si kaa ngɛ je nɛ ɔ mi ɔ, he nɛ sa kaa a ye dami sane, nɛ a pee nɔ́ nɛ da ngɛ ɔ, yi wu tso níhi mohu lɛ a peeɔ ngɛ lejɛ ɔ.

¹⁷ I de ngɛ ye yi mi ke, “Mawu maa kojo dalɔ kɛ yayami peelɔ tsuo, ejakaa a to be kɛ ha nɔ́ tsuaa nɔ́ peemi.”

¹⁸ Nɔ́ nɛ i de ngɛ ye yi mi ngɛ ní nɛ ɔmɛ tsuo a he ji kaa Mawu ngɛ nimli adesahi kae nɛ e kɛ tsɔɔ mɛ kaa slɔɔto be a kɛ lohwehi a kpɛti.

¹⁹ Nɔ́ nɛ peeɔ nɔmlɔ adesa a, lɔ ɔ kɛ̃ lɛ peeɔ lohwe; nɔmlɔ gboɔ, nɛ lohwe hu gboɔ. Mumi kake ɔ nɔuu lɛ mɛ tsuo a muɔ. Nɔmlɔ pi lohwe ngɛ blɔ ko blɔ ko nɔ; ejakaa nɔmlɔ wami jio, lohwe wami jio, lɛ tsuo peeɔ yaka.

²⁰ Mɛ tsuo he kake ɔ lɛ a yaa; mɛ tsuo zu mi lɛ a je, nɛ zu mi lɛ mɛ tsuo a maa kpale kɛ ya.

²¹ Mɛnɔ lɛ le kaa nɔmlɔ adesa mumi ɔ yaa hiɔwe, se lohwe lɛɛ e mumi ɔ, zu mi lɛ e yaa?

²² Lɔ ɔ he ɔ, i na kaa nɔ́ pɛ nɛ sa nɔmlɔ peemi ji kaa níhi nɛ e gbo a he dengme ɔ, e na a he bua jɔmi; e blɔ fa mi níhi ji lɔ ɔmɛ. Nɔ́ nɛ maa ba ngɛ nɔ ko gbenɔ se ɔ, blɔ ko be nɛ e kɛ maa le.