Fiɛlɔ 10 - BAIBLO ALOO NGMAMI KLƆUKLƆU Ɔ

¹ Anunu gbogboe haa nɛ tsopa kɛ e he via jeɔ fu. Jã kɛ̃ kuasia jemi bɔɔ gbeɔ nile kɛ hɛ mi nyami a he guɛ.

² Ní lelɔ suɔmi nya ní ji kaa e pee kpakpa daa; se kuasia lɛɛ e suɔ kaa e pee nɔ́ yayami.

³ Ke kuasia ngɛ nyɛɛe ngɛ gbɛjegbɛ nɔ ɔ, e ní peepee yeɔ e he odase kɛ tsɔɔ nɔ tsuaa nɔ kaa kuasia ji lɛ.

⁴ Ke o nɔ yelɔ mi mi fu mo ɔ, koo je o ní tsumi he ɔ; he si bami gbeɔ sanehi nɛ he wa a nya la.

⁵ Nɔ́ ko nɛ i na ngɛ je nɛ ɔ mi nɛ dɛ, nɛ matsɛmɛ kɛ nɔ yeli pɔɔ peemi ji kaa

⁶ a haa kuasiahi blɔ he nguanguahi, nɛ niatsɛmɛ mohu hii sisi je.

⁷ I naa tsɔli ngɛ okpɔngɔhi a nɔ, be mi nɛ ganɔhi mohu ngɛ zugba nyɛɛe.

⁸ Nɔ nɛ tsuaa muɔ ɔ, lɛ nɛ maa nɔ mi; nɔ nɛ gbaa piɛ ɔ, lɛ nɛ sinɔ maa kɔ.

⁹ Nɔ nɛ ywiaa tɛ ɔ, lɛ nɛ tɛ plaa; nɔ nɛ gbaa lɛ́ ɔ, lɛ nɛ lɛ́ plaa.

¹⁰ Ke o dade nya gbo, nɛ o duɔ we nya a, ja o kɛ o he wami tsu ní wawɛɛ. Se nile haa nɛ nɔ toɔ ga kpakpa.

¹¹ Ke sinɔ maa kɔ kunya yelɔ kekle loko e maa wo sinɔ ɔ hɛ mi kunya a, mɛni e ma na?

¹² Ní lelɔ nya mi munyu haa nɛ e hɛ mi baa nyami. Se kuasia kɛ e munyu kpataa lɛ nitsɛ e hɛ mi.

¹³ E jeɔ sisi kɛ kuasia munyu tumi, nɛ e gbeɔ nya kɛ godo.

¹⁴ Kuasia tuɔ munyu babauu. Nɔ ko nɔ ko li hwɔɔ se sane; nɔ́ nɛ maa ba ngɛ wa gbenɔ se ɔ, mɛnɔ ma nyɛ ma de?

¹⁵ Kuasia gboɔ yaka dengme kɛ woɔ lɛ nitsɛ e he pɔtɔ; ejakaa e li blɔ nɛ a guu nɔ kɛ yaa ma mi.

¹⁶ Ma nɛ jokuɛyo ngɛ a nɔ matsɛ yee, nɛ ganɔ ɔmɛ yeɔ ní, nɛ a nuɔ ní kpɔtɔɔ daa mɔtu ɔ, musu tloo mɛ.

¹⁷ A gbaa ma nɛ a matsɛ ɔ ngɔɔ lɛ nitsɛ e juɛmi kɛ tsuɔ ní, nɛ ganɔ ɔmɛ yeɔ ní bɔ nɛ sa ngɛ be nɔ, konɛ a nimli tso ɔmɛ nɛ a na he wami; se pi kaa a maa tɔ dã.

¹⁸ Hejɔtsɛ tsu yi mi kuɔ kɛ woɔ mi, nɛ tsu ɔ dungɔɔ.

¹⁹ A tsɛɔ ní yemi konɛ a fiɛ nɛ a muɔ; dã haa nɔ bua jɔmi, se sika lɛ peeɔ nɔ́ tsuaa nɔ́.

²⁰ Koo gbiɛ matsɛ ngɛ o yi mi po; niatsɛ hu koo gbiɛ lɛ ngɛ o se tsu mi. Lohwe pɛlitsɛ ko maa ngɔ o munyu ɔ kɛ ho nɛ e ya de.