Fiɛlɔ 1 - BAIBLO ALOO NGMAMI KLƆUKLƆU Ɔ

Wami he be se nami

¹ David bi, fiɛlɔ nguaa a nɛ ye matsɛ ngɛ Yerusalem munyuhi ji nɛ ɔmɛ nɛ.

² Ye juɛmi deɔ mi ke, wami nɛ ɔ, se nami ko be he; wami he be se nami. Lɛ tsuo peeɔ yaka!

³ Dengme tsuo nɛ nɔmlɔ adesa gboɔ ngɛ je nɛ ɔ mi ɔ, mɛni se e naa?

⁴ Yi nɔhi baa, nɛ a beɔ kɛ yaa. Se je ɔ lɛɛ, bɔ nɛ e ngɛ ɔ, jã kɛ̃ e ngɛ; jã kɛ̃ lɛ e maa hi kɛ maa ya neneene.

⁵ Pu teɔ si nɛ e nɔɔ si, nɛ e he sɔɔ kɛ yaa he nɛ e te si kɛ je ɔ ekohu.

⁶ Kɔɔhiɔ fiaa kɛ yaa leneyi je, nɛ e lɔgɔɔ si kɛ yaa omleyi je. Kikɛ nɛ ɔ kɔɔhiɔ hii si bɔlee hluu kɛ ya suu be nɛ e kpaleɔ kɛ baa he nɛ e fia kɛ je ɔ ekohu.

⁷ Pahi tsuo bee kɛ ya sɛɛ wo mi, se wo hyi we gblegbleegble. Pa amɛ kpaleɔ a se kɛ yaa he nɛ a je ɔ, nɛ a bee kɛ yaa wo ɔ mi ekohu.

⁸ Nɔ́ tsuaa nɔ́ ngɛ je nɛ ɔ mi ɔ peeɔ pɔtɔ kɛ yaka nɛ hi kalemi; nɔ́ hyɛmi kɛ munyu tumi gbi nɔ nya.

⁹ Nɔ́ he ko be je ɔ mi. Nɔ́ nɛ ba hyɛ ɔ, lɔ ɔ kɛ̃ maa ba ekohu. Nɔ́ nɛ a pee hyɛ ɔ, lɔ ɔ nɔuu a maa pee ekohu.

¹⁰ Anɛ nɔ́ ko ngɛ nɛ a ma tsɛ lɛ nɔ́ he lo? Dɛbi! Jamɛ a nɔ́ ɔ ngɛ kɛ je blema, loko a fɔ wɔ tete po.

¹¹ Níhi nɛ be ɔ, nɔ ko nɔ ko kaii we hu. Jã kɛ̃, níhi nɛ maa ba kɛ je be nɛ ɔ mi kɛ yaa a, yi nɔhi nɛ maa ba ngɛ se ɔ, mɛ hu a be kaie.

Fiɛlɔ nguaa a kpa je mi níhi si

¹² Imi fiɛlɔ ɔ, i hi Yerusalem kɛ ye matsɛ ngɛ Israel ma a nɔ.

¹³ I bɔ mɔde kaa níhi tsuo nɛ a peeɔ ngɛ je nɛ ɔ mi ɔ, ma ngɔ ye nile ɔ kɛ hla mi fitsofitso. Ní tsumi nɛ Mawu ngɔ ha nɔmlɔ adesa ke e tsu ngɛ je nɛ ɔ mi ɔ, haomi sɔuu; pi ní tsumi nɛ ngɔɔ.

¹⁴ Níhi tsuo nɛ a peeɔ ngɛ je nɛ ɔ mi ɔ, i na; nɛ i ngɛ dee ke lɛ tsuo yaka. E ngɛ kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ.

¹⁵ Nɔ́ nɛ kpɛ̃ ɔ, e hí dami; nɔ́ nɛ bé ɔ, e hí kanemi.

¹⁶ I de ngɛ ye yi mi ke, “I pee nɔmlɔ nguaa. Nihi tsuo nɛ ye Yerusalem ma a nɔ kɛ sɛ ye hlami ɔ, i le ní kulaa pe mɛ. Ee, nile ɔ, i kpa lɛ si saminya.”

¹⁷ I bɔ mɔde kaa ma hla slɔɔto nɛ ngɛ nile kɛ godo, aloo nile kɛ kuasia jemi a kpɛti. Se i na kaa nɔ́ nɛ ɔ hu ngɛ kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ.

¹⁸ Ní lemi fuu ɔ, haomi sɔuu lɛ ngɛ mi. Ke nɔ ko le ní babauu ɔ, jã kɛ̃ lɛ e haomi hu hiɛ babauu.