Daniel 7 - BAIBLO ALOO NGMAMI KLƆUKLƆU Ɔ

DANIEL SƐƐ E NI NAMI ƆMƐ A HE NI ( 7.1—12.13 ) Pu mi lohwe eywiɛ ɔmɛ

¹ Babilon matsɛ, Belshazar yi nɔ, kekleekle jeha a mi ɔ, i nla, nɛ i na nina ko nyɔ mi. I ngma nlami ɔ ngɔ wo womi mi. Nina nɛ i na jamɛ a nyɔ ɔ mi ɔ ji nɛ ɔ nɛ.

² I na nɛ wo nɔ kɔɔhiɔ nɛ nya wa te ngɛ wo ɔ nɔ, nɛ kɔɔhiɔ ngɛ fiae kɛ je he tsuaa he.

³ Tlukaa a, lohwe nguangua munomuno eywiɛ je wo ɔ mi kɛ ba.

⁴ Kekleekle lohwe ɔ ngɛ kaa jata, se e pɛlihi lɛɛ a ngɛ kaa kɔle pɛlihi. Benɛ i ngɛ lɛ hyɛe kɛ mwɔɔ ɔ, a ba kplɔ e pɛli ɔmɛ ngɛ e he. Jehanɛ, a wo lohwe ɔ nɔ ngɛ zugba; a kɛ lɛ da si ngɛ e nanehi a nɔ kaa nɔmlɔ, nɛ a ha lɛ nɔmlɔ juɛmi.

⁵ Lohwe enyɔne ɔ ngɛ kaa osisiblisi nɛ daa si ngɛ e se nane enyɔ ɔmɛ a nɔ. Kasa wu etɛ ngɛ e lungu kpɛ ngɛ e nya mi. Kɛkɛ nɛ gbi ko de lɛ ke, “Tee si, nɛ o ye lo bɔ nɛ o ma nyɛ!”

⁶ Benɛ i ngɛ nɔ́ nɛ ɔ hyɛe ɔ, lohwe kpa ko hu ba hia si. Lohwe nɛ ɔ lɛɛ e ngɛ kaa ngatsɛ, se pɛli eywiɛ ngɛ e se mi kaa lohwe pɛlitsɛ. E ngɛ yi eywiɛ, nɛ ke o hyɛ lɛ ɔ, e ngɛ kaa nɔ ko nɛ hɛɛ blɔ nya nguaa ko.

⁷ Benɛ i ngɛ lɛ hyɛe ɔ, lohwe eywiɛne ba hia si. Lohwe nɛ ɔ he ngɛ gbeye kɛ nyakpɛ, nɛ e ngɛ he wami saminya. E kɛ e dade lungu vamvam ɔmɛ tsɔtslɔɔ lohwehi a mi kpɔ nya kpɔ nya nɛ e yeɔ. Ní nɛmɛ nɛ piɛ ɔ lɛɛ e naa a nɔ. Slo lɛ ngɛ lohwe ɔmɛ nɛ nyɛɛ e hɛ mi ɔ a he; lohwe nɛ ɔ lɛɛ e ngɛ koli nyɔngma.

⁸ Benɛ i ngɛ koli ɔmɛ hyɛe kɛ mwɔɔ ɔ, tlukaa a, koli wayo ko ba hia kpo ngɛ koli ɔmɛ a kpɛti. Koli wayo nɛ ɔ hia kolihi nɛ ngɛ lejɛ ɔ momo ɔ etɛ kɛ pue si. Nɔmlɔ adesa hɛngmɛhi ngɛ koli wayo nɛ ɔ he, kɛ nya hu nɛ ngɛ munyu tue putɛputɛɛ.

Nɔ nɛ ngɛ daa a

⁹ Benɛ i ngɛ nɔ́ nɛ ɔ hyɛe kɛ mwɔɔ ɔ, a kɛ matsɛ sɛhi ba ma si, nɛ nɔ nɛ ngɛ daa a ba hi si ngɛ kake nɔ. E tade hiɛ futaa kaa snoo, nɛ e yi bwɔmi ngɛ kaa to he bwɔmi ngmingmiingmi. E matsɛ sɛ ɔ, kɛ tlɔɔke nane ɔ nɛ sɛ ɔ maa si ngɛ nɔ ɔ tsuo ngɛ tsoe gegeege.

¹⁰ La ngɛ tsoe gegeege ngɛ e hɛ mi kaa pa nɛ hia kɛ bee. Nihi akpeakpehi ngɛ lejɛ ɔ ngɛ lɛ sɔmɔe, nɛ akpe nyɔngma totoe akpe nyɔngma daa si ngɛ e hɛ mi. Kojoli ɔmɛ ba hi si, nɛ a bli womi ɔmɛ a nya.

¹¹ Benɛ i ngɛ nɔ́ nɛ ɔ hyɛe ɔ, i nu nɛ koli nyafii ɔ ngɛ munyu tue putɛputɛɛ kɛ mwɔɔ. Tlukaa a, a gbe lohwe eywiɛne ɔ; a tsɔtslɔɔ e mi, nɛ a sake lɛ ngɔ fɔ la a mi.

¹² Lohwe ɔmɛ nɛ piɛ ɔ, a kpɔ a he wami ɔ ngɛ a dɛ, se a ngmɛ mɛ blɔ nɛ a hi je mi kɛ ya si be ko.

¹³ Enɛ ɔ se, nyɔ mi benɛ i ngɛ ní nɛ ɔmɛ hyɛe kɛ mwɔɔ ɔ, i na nɔ́ ko kaa nɔmlɔ adesa nɛ nyɛɛ bɔku mi kɛ ma ye ngɔ. E be kɛ ho nɔ nɛ ngɛ daa a ngɔ ya, nɛ a kɛ lɛ tsɔɔ nɔ nɛ ngɛ daa a.

¹⁴ A ngɔ he wami, hɛ mi nyami, kɛ matsɛ yemi ngɔ wo e dɛ, konɛ je ma amɛ, kɛ nihi nɛ tuɔ gbi slɔɔtoslɔɔto ɔmɛ nɛ a sɔmɔ lɛ. E he wami ɔ maa hi si kɛ maa ya neneene, nɛ e matsɛ yemi ɔ se be poe gblegbleegble.

A tsɔɔ nina amɛ a sisi

¹⁵ Nina amɛ nɛ i na a wo ye he gbeye, nɛ i hao wawɛɛ nitsɛ.

¹⁶ I ho ya na ni nɛmɛ nɛ daa si ngɛ lejɛ ɔ a ti nɔ kake, nɛ i de lɛ ke e tsɔɔ mi ní nɛ ɔmɛ tsuo a sisi. Nɛ e pee ja.

¹⁷ E de mi ke, “Lohwe agboagbo eywiɛ nɛ ɔmɛ ji matsɛmɛ eywiɛ komɛ nɛ ma ba te si ngɛ je ɔ mi.

¹⁸ Se nyagbe ɔ, Hiɔwe No ɔ we ni klɔuklɔu ɔmɛ a nine maa su matsɛ yemi ɔ nɔ, nɛ a maa ye matsɛ kɛ maa ya neneene.”

¹⁹ I bi lohwe eywiɛne ɔ he sane pɔtɛɛ. Slo lohwe nɛ ɔ ngɛ ekpa amɛ tsuo a he; lɛɛ e he ngɛ gbeye saminya. Lohwe nɛ ɔ kɛ e dade lungu ɔmɛ, kɛ akɔblee nguɛ ɔmɛ tsɔtslɔɔ lohwehi a mi kpɔ nya kpɔ nya nɛ e yeɔ, nɛ ní nɛmɛ nɛ piɛ ɔ lɛɛ e naa a nɔ.

²⁰ Jehanɛ, i bi koli nyɔngma amɛ nɛ ngɛ lohwe ɔ yi mi ɔ a he sane. Koli kaketsɛ ɔ nɛ ba pee se, nɛ ha nɛ koli etɛ ɔmɛ hia pue si ɔ, lɛ hu i bi he sane. Koli nɛ ɔ ngɛ hɛngmɛhi, kɛ nya nɛ e ngɛ munyu tue putɛputɛɛ. E he ngɛ gbeye pe koli ɔmɛ tsuo.

²¹ I na nɛ jamɛ a koli ɔ kɛ ni klɔuklɔu ɔmɛ hwu ta, nɛ e ye a nɔ kunimi.

²² Pee se ɔ, nɔ nɛ ngɛ daa a ba, nɛ e ba wo Hiɔwe No ɔ we ni klɔuklɔu ɔmɛ nguɔ. Be ba su nɛ Mawu ni klɔuklɔu ɔmɛ a nine ba su matsɛ yemi ɔ nɔ.

²³ Bɔ nɛ a tsɔɔ mi enɛ ɔ sisi ha ji nɛ ɔ nɛ: “Lohwe eywiɛne ɔ ji matsɛ yemi eywiɛne ko nɛ maa ba je ɔ mi; e maa slo lɛ ngɛ matsɛ yemi kpa amɛ a he. E ma kpata je ɔ tsuo hɛ mi, nɛ e maa naa e nɔ.

²⁴ Koli nyɔngma amɛ ji matsɛmɛ nyɔngma komɛ nɛ ma ba te si ngɛ jamɛ a matsɛ yemi ɔ mi. A se ɔ, matsɛ kpa ko maa te si; e maa slo lɛ ngɛ kekleekle ni ɔmɛ a he, nɛ e ma kpata matsɛmɛ etɛ a hɛ mi.

²⁵ E maa tu munyu ngɔ si Hiɔwe No ɔ, nɛ e maa wa ni klɔuklɔu ɔmɛ yi mi. E ma hla kaa e tsake a Mawu jami mlaa amɛ, kɛ a nyami be ɔmɛ; nɛ a maa ngɔ ni klɔuklɔu ɔmɛ kɛ wo e dɛ jeha etɛ kɛ fa.

²⁶ Pee se ɔ, kojoli ɔmɛ ma ba kojo; a maa ngɔ he wami ɔ ngɛ e dɛ, nɛ a ma kpata e hɛ mi kɛ gbe nya.

²⁷ A maa ngɔ matsɛ yemihi tsuo nɛ ngɛ je ɔ mi ɔ a he wami, kɛ agboje ngɔ ha Hiɔwe No ɔ we ni klɔuklɔu ɔmɛ a ma a. A matsɛ yemi ɔ se be poe gblegbleegble, nɛ je nɛ ɔ mi matsɛmɛ ɔmɛ tsuo ma sɔmɔ mɛ, nɛ a maa bu mɛ tue.”

²⁸ Ye sane ɔ nyagbe ji nɛ ɔ nɛ. Se imi Daniel lɛɛ ye tsui po wawɛɛ nitsɛ, nɛ i hao. I ngɔ sane nɛ ɔ kɛ to ye yi mi, nɛ i de we nɔ ko nɔ ko.