Daniel 3 - BAIBLO ALOO NGMAMI KLƆUKLƆU Ɔ

Nebukadnezar fa ke nɔ tsuaa nɔ nɛ ja sika tsu amaga ko

¹ Be ko ɔ, Matsɛ Nebukadnezar ha nɛ a pee sika tsu amaga ko; amaga a hiɔwe yami ji gugue nyɔngma kɛ enuɔ, nɛ e blimi ji gugue kake kɛ fa. Nebukadnezar ha nɛ a kɛ amaga a ya ma Dura nga kplanaa a nɔ, ngɛ Babilon kpokpa a nɔ.

² Matsɛ Nebukadnezar tsɔ nɛ a ya kpee ma ní tsuli ɔmɛ tsuo kɛ ba. Mɛ ji nɛ ɔmɛ nɛ: amlaalohi kɛ ganɔhi, wɛtsoyihi kɛ ga woli; sika toli, kojoli, mlaa tsɔɔli, kɛ kpokpa amɛ a nɔ nikɔtɔmahi. A kpee mɛ kɛ ba, konɛ a ba nya amaga a nɛ Matsɛ Nebukadnezar puɛ ngɔ ma si ɔ he.

³ Benɛ ma ní tsuli nɛ ɔmɛ tsuo ba bua a he nya ngɛ amaga a hɛ mi, konɛ a nya amaga a he ɔ,

⁴ ma fiɛlɔ ko de kɛ ngmlaa ke, “Nyɛ, je ma slɔɔtoslɔɔtohi, kɛ nyɛ nihi nɛ nyɛ tuɔ gbi slɔɔtoslɔɔtohi! Mlaa nɛ matsɛ ɔ wo ji nɛ ɔ nɛ.

⁵ Be tsuaa be nɛ nyɛ maa nu nɛ titimatihi, bɛhi, saku slɔɔtoslɔɔtohi, kɛ miɛ slɔɔtoslɔɔtohi ngɛ pɛe ɔ, nyɛ kpla si nɛ nyɛ ja sika tsu amaga a nɛ Matsɛ Nebukadnezar puɛ ngɔ ma si ɔ.

⁶ Nɔ nɛ be si kplae nɛ e ja amaga nɛ ɔ, a sake lɛ ngɔ fɔ flɔɔnɔɔ kɛ e mi la nɛ ngɛ tsoe gegeege mi.”

⁷ Lɔ ɔ he ɔ, benɛ titimati ɔmɛ, bɛ ɔmɛ, kɛ saku slɔɔtoslɔɔto ɔmɛ bɔni pɛmi, nɛ a pue miɛ slɔɔtoslɔɔto ɔmɛ a nya pɛ je ma amɛ kɛ nihi nɛ tuɔ gbi slɔɔtoslɔɔto ɔmɛ tsuo ya kpla si nɛ a ja sika tsu amaga a nɛ Matsɛ Nebukadnezar puɛ ngɔ ma si ɔ.

A ya po Daniel huɛmɛ etɛ ɔmɛ a nya

⁸ Amlɔ ɔ, Babilonia bi komɛ ba matsɛ ɔ ngɔ nɛ a ba po Yuda bi ɔmɛ a nya.

⁹ A de Matsɛ Nebukadnezar ke, “Nɛnɛ, o yi nɛ na wa kɛ ya neneene!

¹⁰ Nɛnɛ, mo lɛ o wo mlaa ke nɔ tsuaa nɔ nɛ maa nu nɛ titimatihi, bɛhi, saku slɔɔtoslɔɔtohi kɛ miɛ slɔɔtoslɔɔtohi ngɛ pɛe ɔ, e kpla si nɛ e ja sika tsu amaga a.

¹¹ O de hu ke nɔ nɛ be si kplae nɛ e ja amaga nɛ ɔ, a sake lɛ ngɔ fɔ flɔɔnɔɔ kɛ e mi la nɛ ngɛ tsoe gegeege mi.

¹² O ngɔ Yuda bi komɛ ngɔ to ma ní tsumihi a nya ngɛ Babilon kpokpa a nɔ. Mɛ ji Shadrak, Meshak, kɛ Abednego. Nɛnɛ, mlaa a nɛ o wo ɔ, nimli nɛ ɔmɛ yi nɔ; a ja we o mawu ɔmɛ, nɛ sika tsu amaga a nɛ o puɛ ma si ɔ hu, a kpla we si ha lɛ.”

¹³ Matsɛ Nebukadnezar mi mi fu wawɛɛ nitsɛ, nɛ e fa ke a ya ngɔ Shadrak, Meshak, kɛ Abednego kɛ ba. Benɛ a ya ngɔ mɛ kɛ ba a,

¹⁴ Nebukadnezar bi mɛ ke, “Shadrak, Meshak, kɛ Abednego, anɛ e ngɛ mi niinɛ kaa nyɛ kua ye mawu ɔmɛ jami lo? Anɛ e ngɛ mi niinɛ kaa sika tsu amaga a nɛ i puɛ ngɔ ma si ɔ, nyɛ kua si kplami ha lɛ lo?

¹⁵ Yoo, nyɛ dla nyɛ he! Titimatihi, bɛhi, saku slɔɔtoslɔɔtohi, kɛ miɛ slɔɔtoslɔɔtohi maa pɛ. Ke nyɛ nu nɛ ní nɛ ɔmɛ ngɛ pɛe pɛ, nyɛ kpla si nɛ nyɛ ja amaga a nɛ i puɛ ɔ. Ke nyɛ pee ja a, e maa hi ha nyɛ. Se ke nyɛ kpla we si nɛ nyɛ ja amaga a, lɛɛ a ma sake nyɛ ngɔ fɔ flɔɔnɔɔ kɛ e mi la nɛ ngɛ tsoe gegeege mi jamɛ a ngmlɛfia a nɔuu. Anɛ nyɛ susu kaa mawu ko ngɛ nɛ ma je nyɛ kɛ je ye dɛ mi lo?”

¹⁶ Shadrak, Meshak, kɛ Abednego he nɔ nɛ a de matsɛ ɔ ke, “Nɛnɛ Nebukadnezar, e hia we kaa wa ha mo kikɛmɛ a sane nɛ o bi nɛ ɔ heto, nɛ waa ka kaa wa ma fa wa he.

¹⁷ Mawu nɛ ma nyɛ je wɔ kɛ je flɔɔnɔɔ kɛ e mi la nɛ ngɛ tsoe gegeege ɔ mi ɔ ji Mawu nɛ wa sɔmɔɔ ɔ nɛ; lɛ nɛ e ma je wɔ kɛ je o dɛ mi ɔ nɛ.

¹⁸ Se ke wa Mawu ɔ nyɛ we nɛ e he wa yi wami tete po, nɛnɛ, na nɛ o le kaa o mawu ɔmɛ lɛɛ wa be jae oo wa be jae! Sika tsu amaga a nɛ o puɛ ngɔ ma si ɔ hu, wa be si kplae ha lɛ!”

A bu Daniel huɛmɛ etɛ ɔmɛ gbenɔ fɔ

¹⁹ Jehanɛ lɛɛ Nebukadnezar mi mi fu wawɛɛ nitsɛ, nɛ e tu e hɛ mi ngɔ wo Shadrak, Meshak kɛ Abednego. E fa ke a wo flɔɔnɔɔ ɔ mi la nɛ e dɔ si kpaago pe bɔ nɛ e dɔɔ daa a.

²⁰ E fa e ta buli ɔmɛ a kpɛti oblai komɛ ke a fi Shadrak, Meshak kɛ Abednego, nɛ a sake mɛ ngɔ pue flɔɔnɔɔ kɛ e mi la nɛ ngɛ tsoe gegeege ɔ mi.

²¹ Kɛkɛ nɛ a fi mɛ kɛ a he sisi tade ɔmɛ, a hiɔwe tade ɔmɛ, a pɛɛ ɔmɛ, kɛ tade kpa amɛ tsuo, nɛ a sake mɛ ngɔ pue flɔɔnɔɔ kɛ e mi la nɛ ngɛ tsoe gegeege ɔ mi.

²² Se akɛnɛ matsɛ ɔ fa ke a wo flɔɔnɔɔ ɔ mi la nɛ e dɔ wawɛɛ he je ɔ, la lilɛ ɔmɛ sã nihi nɛ nu Shadrak, Meshak, kɛ Abednego kɛ ya wo flɔɔnɔɔ ɔ mi ɔ, nɛ a gbo.

²³ Shadrak, Meshak, kɛ Abednego, ni etɛ ɔmɛ ya nɔ flɔɔnɔɔ kɛ e mi la nɛ ngɛ tsoe gegeege ɔ mi kaa bɔ nɛ a fi mɛ ɔ.

²⁴ Nɔ́ ko pee Matsɛ Nebukadnezar nyakpɛ, nɛ e te da si amlɔ nɔuu. E bi e ga woli ɔmɛ ke, “Anɛ pi nihi etɛ nɛ wa fi, nɛ wa sake mɛ ngɔ pue la a mi lo?” A he nɔ ke, “Ee, nɛnɛ, ja wa pee ɔ nɛ.”

²⁵ Matsɛ ɔ bi ekohu ke, “Lɛɛ mɛni he je i ngɛ nihi eywiɛ hyɛe nɛ a ngɛ nyɛɛe ngɛ la a mi mɔ? Nimli nɛ i ngɛ hyɛe nɛ ɔ, a fi we mɛ, nɛ pohu la a sɛ̃ mɛ. Jehanɛ, nɔ nɛ piɛ a he nɛ a pee eywiɛ ɔ lɛɛ e ngɛ kaa mawu ko.”

A je Shadrak kɛ Meshak kɛ Abednego

²⁶ Kɛkɛ nɛ Nebukadnezar hɛ lɛ kɛ ya flɔɔnɔɔ kɛ e mi la nɛ ngɛ tsoe gegeege ɔ sinya a nya, nɛ e de ke, “Shadrak, Meshak, kɛ Abednego, Mawu nɛ ngɛ hiɔwe lokoo ɔ tsɔli! Nyɛɛ je la a mi esɔ, nɛ nyɛɛ ba hiɛ ɔ!” Kɛkɛ nɛ Shadrak, Meshak kɛ Abednego je la a mi amlɔ kɛ ba.

²⁷ Matsɛ ɔ, amlaalo ɔmɛ, ganɔ ɔmɛ, wɛtsoyi ɔmɛ, kɛ ga woli ɔmɛ tsuo ba bua a he nya, konɛ a ba hyɛ ni etɛ nɛ ɔmɛ nɛ la a pee we mɛ nɔ́ ko ɔ. A na kaa a yi bwɔmi ngla we, a tade ɔmɛ sɛ̃ ngɛ a he, nɛ la su ku po ji fu ngɛ a he.

²⁸ Kɛkɛ nɛ Nebukadnezar de ke, “A je Shadrak, Meshak kɛ Abednego mɛ a Mawu ɔ yi! E tsɔ e bɔfo ɔ kɛ ba je nimli nɛ ɔmɛ nɛ a sɔmɔɔ lɛ, nɛ a ngɔ a hɛ ngɔ fɔ e nɔ ɔ. A kua ye mlaa amɛ a nɔ yemi, nɛ a ngɔ a wami ngɔ ha. A pee enɛ ɔ, ejakaa a sume kaa a ma kpla si nɛ a sɔmɔ mawu kpa ko, pe a Mawu ɔ pɛ.

²⁹ “Lɔ ɔ he ɔ, i ngɛ mlaa woe ke nihi tsuo nɛ je je ma slɔɔtoslɔɔtohi a nɔ, nɛ tuɔ gbi slɔɔtoslɔɔtohi nɛ maa tu Shadrak, Meshak kɛ Abednegomɛ a Mawu ɔ he munyu yaya ko ɔ, a ma tsɔtslɔɔ a mi kpɔ nya kpɔ nya, nɛ a maa pee e we ɔmɛ we doku hi. Ejakaa mawu kpa ko be nɛ ma nyɛ ma he nɔ yi wami kaa kikɛ nɛ ɔ.”

³⁰ Kɛkɛ nɛ Matsɛ Nebukadnezar wó Shadrak, Meshak, kɛ Abednegomɛ a nɔ, nɛ e ha mɛ blɔ nya nguahi ngɛ Babilon kpokpa a nɔ.